25.09.2015 | 
Մշակույթ
ԵՍ ՔՈ ՄԱՍՆԻԿՆ ԵՄ, Ի՛Մ ՀԱՄԱԼՍԱՐԱՆ
ԵՍ ՔՈ ՄԱՍՆԻԿՆ ԵՄ, Ի՛Մ ՀԱՄԱԼՍԱՐԱՆ
Արդեն ավանդույթ դարձած ԵՊՀ մեծարման և առաջին կուրսեցիների երդման հանդիսավոր արարողությունն անցկացվեց սեպտեմբերի 24-ին: Այս տարի այն նվիրված էր Հայոց ցեղասպանության 100-ամյա տարելիցին:

Միջոցառումը կազմակերպվել էր ԵՊՀ ռեկտորատի, Մշակույթի կենտրոնի ջանքերով, Ուսանողական խորհրդի աջակցությամբ և Հայաստանի երիտասարդական հիմնադրամի ֆինանսավորմամբ: Մայր բուհի բակում միախառնվել էին տոնական համերգի հնչյունները, շփոթված դեմքերը, հպարտ հայացքներն ու հուզաթաթախ ժպիտները:


Համալսարանականի բարձր կոչումը ստանալու և այսուհետ այն արժանապատիվ ու արժանավայել կրելու համար առաջին կուրսեցիներին խրախուսելու և շնորհավորելու էին եկել ԵՊՀ ռեկտորը, պրոռեկտորները, ֆակուլտետների դեկաններ, տարբեր ստորաբաժանումների, պրոֆեսորադասախոսական կազմի և ուսանողական կառույցների ներկայացուցիչներ, ուսանողներ և բոլոր ժամանակների համալսարանականներ:


ԵՊՀ ռեկտոր Արամ Սիմոնյանը միջոցառման ողջույնի իր խոսքում շնորհավորեց առաջին կուրսեցիներին և կոչ արեց նրանց հավատարիմ մնալ երդմանը և իրենց համարել լիիրավ համալսարանականներ:


«Երևանի պետական համալսարանի ուսանող դառնալը մեծ պատիվ է, այս շենքի կամարների տակ քայլելը մեծագույն պատիվ է, և ես սրտանց շնորհավորում եմ ձեզ այդ կապակցությամբ: Երևանի պետական համալսարանն իր ուժերի ներածի չափով կստեղծի բոլոր պայմանները, որպեսզի դուք կարողանաք մասնագիտական կրթություն ստանալ, որպեսզի ձևավորվեք որպես Հայաստանի Հանրապետության արժանագույն քաղաքացիներ, որպես արժանավայել հայեր: Ձեզ հաջողություն, ձեզ բարի երթ, սիրելի՛ առաջին կուրսեցիներ»:


Այս տարի բոլոր առաջին կուրսեցիների անունից բեմահարթակից իրենց երդումը հնչեցնելու պատասխանատվությունը վստահված էր Պատմության ֆակուլտետի առաջին կուրսի ուսանող Արկադի Լալազարյանին և Միջազգային հարաբերությունների ֆակուլտետի առաջին կուրսի ուսանողուհի Ագնեսա Շափաղաթյանին:


Եվ երդվեցին, որ բարձր են պահելու ու արժանի են լինելու կրել ԵՊՀ ուսանողի բարձր կոչումը, որ սիրելու են կրթության դարբնոցը, լույս սփռող դասախոսներին:


Այս տարի լրացավ Հայոց ցեղասպանության 100-ամյա տարելիցը: Ինչքան ժամանակ էլ անցնի, միևնույնն է, հայ ժողովրդի սրտերում դաջված ու աչքերում արտացոլված ցավը երբեք չի մոռացվի, և պատահական չէ, որ այս տարվա միջոցառումը նվիրված էր հենց 100-ամյա տարելիցին: Չէ՞ որ հենց այս սերունդն է, որ դատապարտում ու փոխհատուցում է պահանջելու աշխարհից: Եվ չէ՞ որ համալսարանի հիմնադրումն էր, որ եղեռնապուրծ հայ ժողովրդի կյանքին նոր իմաստ ու նոր երանգ հաղորդեց:


Միջոցառման ընթացքում իրենց կատարումներով առաջին կուրսեցիներին ողջունեցին և շնորհավորեցին ԵՊՀ մշակույթի կենտրոնի երգչախումբը, պարի, թատրոն-ստուդիայի սաները, նոր ձևավորված ժողովրդական գործիքների համույթը, ԵՊՀ ՈՒԽ ազգագրական պարերի համույթը, «Երգող համալսարանական» մրցույթի մասնակիցները և հատուկ հրավիրված հյուրերը: Տոնական երեկոն վարեցին Միջազգային հարաբերությունների ֆակուլտետի շրջանավարտ Մարի Գրիգորյանը և նույն ֆակուլտետի 2-րդ կուրսի ուսանող Էդուարդ Հովհաննիսյանը:

 

Միջոցառման ավարտին հանդիսավարները շնորհակալություն հայտնեցին բոլոր աջակիցներին՝ ԵՊՀ ռեկտոր Արամ Սիմոնյանին, ուսանողական կառույցներին, համալսարանական մի շարք ստորաբաժանումների, միջոցառման գլխավոր բեմադրիչ և ռեժիսոր, ԵՊՀ մշակույթի կենտրոնի տնօրեն Կարինե Դավթյանին, մասնակիցների հագուստների ձևավորող ՀՀ վաստավոր նկարիչ Աննա Հարությունյանին և Հայաստանի երիտասարդական հիմնադրամին` օրը տոնական դարձնելու և միջոցառման կայացմանը մեծապես նպաստելու համար:

 

Միջոցառման բոլոր նկարները կարող եք դիտել պատկերասրահում՝ Առաջին կուրսեցիների երդման արարողություն

Այլ նորություններ
ՄՇԱԿՈՒՅԹՆԵՐԻ ՀԱՂՈՐԴԱԿՑՈՒԹՅԱՆ ՓԱՅԼՈՒՆ ՕՐԻՆԱԿ ԵՊՀ-ՈՒՄ. ԱՇԱԿԵՐՏՆԵՐԸ ՀԱՆԴԵՍ ԵԿԱՆ ՖՐԱՆՍԻԱԿԱՆ ԵՐԳԵՐՈՎ ՈՒ ԱՍՄՈՒՆՔՈՎ
Այսօր ԵՊՀ Չարենցի անվան դահլիճում տեղի ունեցավ Մայր բուհում անցկացվող Ֆրանկոֆոնիայի օրերի շրջանակում մշակութային միջոցառում, որի ընթացքում հանրապետության մի քանի դպրոցների աշակերտներ հանդես եկան ֆրանսիական երգերով և ասմունքեցին ֆրանսիացի ժամանակակից գրողների բանաստեղծությունները:
«Ս. ԶԱՏԿԻՆ ՄԻՇՏ ԲԱԽՏ ԵՆ ԲԱԺԱՆՈՒՄ, ԵՎ ՈՎ ՑԵՐԵԿԸ ՔՆԻ, ԿԶՐԿՎԻ ԻՐ ԲԱԺԻՆ ԲԱԽՏԻՑ». ՀԱՐՑԱԶՐՈՒՅՑ ԵՊՀ ՊՐՈՖԵՍՈՐ ՍԱՄՎԵԼ ՄԿՐՏՉՅԱՆԻ ՀԵՏ
Այս տարի Հայ առաքելական եկեղեցին Ս. Զատիկը` Քրիստոսի հրաշափառ Հարության տոնը, կնշի ապրիլի 1-ին: Ի թիվս այլ Տաղավար տոների՝ (Պայծառակերպության տոն կամ Վարդավառ, Սբ. Աստվածածնի ննջման և վերափոխման տոն, Խաչվերաց) Ս. Զատիկը նույնպես շարժական տոն է և միշտ նշվում է գարնանային գիշերահավասարից հետո՝ լուսնի լրմանը հաջորդող առաջին կիրակի օրը: Ըստ այդմ, այն տեղաշարժվում է մարտի 22-ից ապրիլի 25-ն ընկած ժամանակահատվածում: