03.06.2019 | 
Կրթություն
ԱՄՓՈՓՎԵՑ «ԵՊՀ ՕԼԻՄՊԻԱԴԱ-2019»-Ը. ԼԱՎԱԳՈՒՅՆՆԵՐԸ ՊԱՐԳԵՎԱՏՐՎԵՑԻՆ
ԱՄՓՈՓՎԵՑ «ԵՊՀ ՕԼԻՄՊԻԱԴԱ-2019»-Ը. ԼԱՎԱԳՈՒՅՆՆԵՐԸ ՊԱՐԳԵՎԱՏՐՎԵՑԻՆ
ԵՊՀ մեծ դահլիճում այսօր տեղի ունեցավ «ԵՊՀ օլիմպիադա-2019»-ի փակման և պարգևատրման հանդիսավոր արարողությունը:

ԵՊՀ մինչհամալսարանական կրթության վարչության նախաձեռնությամբ արդեն    11-րդ տարին անցկացվող դպրոցական օլիմպիադային այս տարի մասնակցել են 189 հանրակրթական դպրոցների շուրջ 2298 աշակերտներ: Լավագույն արդյունքի հասած մասնակիցներից 95-ն այսօր արժանացան առաջին, երկրորդ և երրորդ կարգերի դիպլոմների, իսկ 183-ը՝ գովասանագրերի:

 

ԵՊՀ մինչհամալսարանական կրթության վարչության պետ Վաչագան Գալստյանը մեզ հետ զրույցում նշեց, որ այս տարի ակտիվ մասնակցել են 25 դպրոցներ, որոնք պարգևատրվել են ԵՊՀ շնորհակալագրերով և գրքերով: 

 

Միջոցառմանը ներկա էին ԵՊՀ ուսումնական աշխատանքների գծով պրոռեկտոր Մենուա Սողոմոնյանը, Մինչհամալասարանական կրթության վարչության պետ Վաչագան Գալստյանը, վարչության աշխատակիցները, ԵՊՀ տարբեր ֆակուլտետների դեկաններ, դպրոցի տնօրեններ, ուսուցիչներ և ծնողներ:

 

Ողջունելով ներկաներին և շնորհավորելով լավագույն արդյունքներ ցուցաբերածներին՝ Մենուա Սողոմոնյանն ընդգծեց, որ այս սերունդն առանձնահատուկ է, քանի որ պարգևատրվում է այն տարում, երբ ԵՊՀ-ն տոնում է հիմնադրման 100-ամյակը. «Թող ձեր ուսումնառության տարիները նշանավորվեն հաղթանակներով, իսկ ձեր ծնողներն այսօրվա հպարտությամբ հետևեն ձեր բոլոր հաղթանակներին: Դուք եք լինելու Մայր բուհի դեմքն ու դիմագիծը»:

 

Վերջինս դպրոցականներին հանձնեց դիպլոմներն ու գրքերը:

 

«ԵՊՀ օլիմպիադա 2019»-ի «Ֆրանսերեն» առարկայից առաջին հորիզոնական զբաղեցրած Սուսաննա Հարությունյանը Երևանի թիվ 119 ավագ դպրոցի աշակերտուհի է:

Սուսաննան ԵՊՀ եվրոպական լեզուների և հաղորդակցության ֆակուլտետի դիմորդ է: «Ես մանկուց երազել եմ սովորել ԵՊՀ-ում: Քայլ առ քայլ իրագործում եմ երազանքս»,- նշեց նա:

 

Արթիկի թիվ 3 ավագ դպրոցի աշակերտ Արգիշտի Բիչախչյանին «ԵՊՀ օլիմպիադա 2019»-ին բերել է «Գերմաներենը»: Արգիշտին ԵՊՀ իրավագիտության ֆակուլտետի դիմորդ է:

 

Հիշեցնենք, որ բացի պարգևատրումից՝ ԵՊՀ գիտական խորհրդի որոշմամբ, oլիմպիադայի երկրորդ փուլում 1-3-րդ տեղերը զբաղեցրած աշակերտները վճարովի համակարգով ԵՊՀ ընդունվելու դեպքում առաջին կուրսում ստանալու են ուսման վարձի զեղչ՝ համապատասխանաբար 50%, 40% և 30%։

 

Նշենք, որ միջոցառման ընթացքում պարգևատրվեցին ոչ միայն «ԵՊՀ օլիմպիադա 2019»-ի հաղթողները, այլև ԵՊՀ տարբեր ֆակուլտետների այն լավագույն 5 ուսանողները, որոնք Համազգային հայ կրթական և մշակութային միության կողմից արժանացել են «Հակոբ Կարապենց» հիմնադրամի սահմանած ամենամյա կրթաթոշակին:

 

Պարգևներն ուսանողներին հանձնեց Համազգային հայ կրթական և մշակութային միության երևանյան գրասենյակի տնօրեն Ռուզաննա Առաքելյանը:




Անգին Խաչատրյան

 

 

Այլ նորություններ
ԵՊՀ-ՈՒՄ ՏԵՂԻ Է ՈՒՆԵՑԵԼ ԻԻՀ ԽՈՐՀՐԴԱՐԱՆԻ ՀԱՅԱԶԳԻ ՊԱՏԳԱՄԱՎՈՐԻ ՊԱՐՍԿԵՐԵՆ ՄԵՆԱԳՐՈՒԹՅԱՆ ՇՆՈՐՀԱՆԴԵՍԸ
ԵՊՀ արևելագիտություն ֆակուլտետի իրանագիտության ամբիոնում այսօր տեղի են ունեցել ԻԻՀ խորհրդարանի հայազգի պատգամավոր, պատմագիտության դոկտոր Կարեն Խանլարյանի «Հայաստանի աշխարհագրության սահմանումը ըստ իսլամական աղբյուրների» պարսկերեն մենագրության շնորհանդեսը և հեղինակի հետ հանդիպումը։
ՍԱՀՄԱՆՎԵԼ Է ԵՊՀ 2019-2020 ՈՒՍՈՒՄՆԱԿԱՆ ՏԱՐՎԱ ՀԱՄԱՐ ՄԻՋԻՆ ՈՐԱԿԱԿԱՆ ԳՆԱՀԱՏԱԿԱՆԻ (ՄՈԳ) ՇԵՄԸ
ԵՊՀ-ում 2019-2020 ուսումնական տարվա համար միջին որակական գնահատականի (ՄՈԳ) շեմը բակալավրիատում սահմանվել է 11.00-ն, իսկ մագիստրատուրայում՝ 15.00-ն: