06.04.2019 | 
Քաղաքականություն
ԲԱԿՈ ՍԱՀԱԿՅԱՆԸ ՀՅՈՒՐԸՆԿԱԼԵԼ Է ԵՊՀ ՊԱՏՎԻՐԱԿՈՒԹՅԱՆԸ
ԲԱԿՈ ՍԱՀԱԿՅԱՆԸ ՀՅՈՒՐԸՆԿԱԼԵԼ Է ԵՊՀ ՊԱՏՎԻՐԱԿՈՒԹՅԱՆԸ
Եռօրյա այցով Արցախ մեկնած համալսարանականները ապրիլի 5-ին հանդիպեցին Արցախի Հանրապետության նախագահ Բակո Սահակյանի հետ:



Հանդիպմանը ներկա էին ԵՊՀ ռեկտոր Արամ Սիմոնյանը, համալսարանական ստորաբաժանումների ղեկավարներ, ֆակուլտետների դեկաններ, դասախոսներ և ուսանողներ, ինչպես նաև Արցախի Հանրապետության կառավարության անդամներ ու պաշտոնյա այրեր: ԱՀ նախագահ Բակո Սահակյանը, ողջունելով ներկաներին, ուրախությամբ փաստեց, որ ԵՊՀ-ականների՝ դեպի Արցախ կատարվող այցելությունները պարբերական բնույթ են կրում:



ԵՊՀ ռեկտոր Արամ Սիմոնյանը, շնորհակալություն հայտնելով հյուրընկալության և ջերմ ընդունելության համար, ԱՀ նախագահին ներկայացրեց եռօրյա այցի նպատակն ու նախատեսված միջոցառումները՝ նշելով, որ արդեն հիմնադրվել է ԵՊՀ 100-ամյակի պուրակը. «Ինչպես գիտեք, մեր այցելության ընթացքում, բացի ծառատունկից, մենք իրականացնում ենք նաև այլ միջոցառումներ: Այս անգամ կազմակերպել ենք գիտաժողով, որը նվիրված է Արցախի և տարածաշրջանի խնդիրներին: Հույս ունենք, որ այն կարձանագրի դրական արդյունքներ գիտական ու վերլուծական առումով»:



ԵՊՀ ռեկտորը ընդգծեց, որ գիտաժողովն ուշագրավ է նաև այն հիմնավորմամբ, որ հիմնականում զեկուցմամբ հանդես են գալու այն երիտասարդ դասախոսները և գիտաշխատողները, որոնք նախկինում Արցախում գիտաժողովի չեն մասնակցել: Արամ Սիմոնյանը փաստեց, որ այցերը կազմակերպելիս այնպես են անում, որ պատվիրակության կազմում ընդգրկվեն այն ուսանողները, որոնք Արցախում երբևէ չեն եղել:



ԵՊՀ ռեկտորը շնորհակալություն հայտնեց Բակո Սահակյանին, որ միշտ ժամանակ է գտնում և հանդիպում ԵՊՀ պատվիրակության հետ. «Այս հանդիպումները շատ կարևոր են մեզ համար: Մենք դրանցից հետո միշտ գնում ենք հարստացած ու լավ տեղեկացված այն խնդիրների մասին, որոնք մեզ հետ քննարկում եք: Շատ դեպքերում մեդիադաշտը հնարավորություն չի տալիս լավ հասկանալու, վերլուծելու, թե ինչպես է զարգանում իրադրությունը կամ ինչպիսին է իրավիճակը: Այս այցելությունները մեզ գիտական հողի վրա են դնում»:



Հանդիպման ընթացքում կողմերը խոսեցին նաև Արցախի խնդիրների մասին, քննարկեցին մի շարք այլ հարցեր և համագործակցության նոր հեռանկարներ:

 

Քնար Միսակյան

 

Այլ նորություններ
ԵՊՀ ՀՈԳԱԲԱՐՁՈՒՆԵՐԻ ԽՈՐՀՐԴԻ ՆԻՍՏԸ ՏԵՂԻ ՉԻ ՈՒՆԵՑԵԼ. ՆԵՐԿԱ ԵՆ ԵՂԵԼ ՄԻԱՅՆ ՀԱՄԱԼՍԱՐԱՆԱԿԱՆ ԱՆԴԱՄՆԵՐԸ
ԵՊՀ հոգաբարձուների խորհրդի այսօր հրավիրված նիստը չի կայացել՝ քվեակազմի բացակայության պատճառով. 32 անդամներից ներկա էին 14-ը:
«ՍԵՐՎԻՍԻ ԿԱԶՄԱԿԵՐՊԻՉ/ՄԵՆԵՋՄԵՆՏ» ԽՈՐԱԳՐՈՎ ԴԱՍԱԽՈՍՈՒԹՅՈՒՆ ԵՐԵՎԱՆԻ ԹԻՎ 190 ԱՎԱԳ ԴՊՐՈՑՈՒՄ
ԵՊՀ աշխարհագրության և երկրաբանության ֆակուլտետի սերվիսի ամբիոնի վարիչ Սեյրան Սուվարյանն այսօր «Սերվիսի կազմակերպիչ/մենեջմենտ» խորագրով դասախոսություն է կարդացել Երևանի թիվ 190 ավագ դպրոցում: