28.02.2022 | 
Հասարակություն
ԴԱՍԱԽՈՍՈՒԹՅՈՒՆՆԵՐԸ՝ ՄԱՍՆԱԳԻՏՈՒԹՅԱՆ ԸՆՏՐՈՒԹՅԱՆ ԿՈՂՄՆՈՐՈՇԻՉՆԵՐ. ԵՊՀ ԴԱՍԱԽՈՍՆԵՐՆ ՕԳՆՈՒՄ ԵՆ ԱՊԱԳԱ ԴԻՄՈՐԴՆԵՐԻՆ
ԴԱՍԱԽՈՍՈՒԹՅՈՒՆՆԵՐԸ՝ ՄԱՍՆԱԳԻՏՈՒԹՅԱՆ ԸՆՏՐՈՒԹՅԱՆ ԿՈՂՄՆՈՐՈՇԻՉՆԵՐ. ԵՊՀ ԴԱՍԱԽՈՍՆԵՐՆ ՕԳՆՈՒՄ ԵՆ ԱՊԱԳԱ ԴԻՄՈՐԴՆԵՐԻՆ
ԵՊՀ ընդունելության և դիմորդների հետ տարվող աշխատանքների կենտրոնի նախաձեռնությամբ ԵՊՀ դասախոսները մասնագիտական կողմնորոշման նպատակով հանդիպել են տարբեր դպրոցների աշակերտների հետ, հանդես եկել դասախոսություններով և պատասխանել նրանց հուզող հարցերին:

ԵՊՀ-ի և ավագ դպրոցների միջև համագործակցության շրջանակում կազմակերպվող և արդեն ավանդական դարձած փոխադարձ այցելությունները նպատակ ունեն նպաստել ավարտական դասարանների աշակերտների մասնագիտական կողմնորոշմանը, բարձրացնել նրանց իրազեկության մակարդակը:

 

Իրավագիտության ֆակուլտետի իրավաբանական կլինիկայի «Իրավունք բոլորի համար» ծրագրի ղեկավար Նաիրա Ավետիսյանը և 4-րդ կուրսի ուսանողներ Աննա Ստեփանյանն ու Արփինե Ալեքսանյանն այցելել են Երևանի թիվ 159 ավագ դպրոց, աշակերտների համար հանդես եկել «Քաղաքացիական իրավունք» թեմայով դասախոսությամբ:

 

Մեզ հետ զրույցում Ն. Ավետիսյանն ասաց, որ «Իրավունք բոլորի համար» ծրագրի շրջանակում աշակերտների հետ բազմաթիվ հանդիպումներ են կազմակերպվում, որոնք մեծ ոգևորությամբ են ընդունվում ապագա ուսանողների կողմից:

 

«Այցելության ընթացքում էլ հանդիպումը բավականին արդյունավետ է անցել: Ներկայացվել են քաղաքացիաիրավական հարաբերությունները, ինչը մեծապես հետաքրքրել ու շատ տպավորել է աշակերտներին: Դրա վկայությունն է նաև գնահատման թերթիկներում գերազանց գնահատականների գերակշռումը»,- նշեց Ն. Ավետիսյանը և հավելեց, որ դասախոսությունն իրականացվել է ինտերակտիվ մեթոդներով, ինչի շնորհիվ աշակերտների ներգրավվածությունն ու ոգևորությունը մեծ է եղել:

 

 

Աստվածաբանության ֆակուլտետի դեկանի տեղակալ Արամ Հովհանիսյանն այցելել է Երևանի թիվ 189 ավագ դպրոց և հանդես եկել «Մլեհ իշխանապետ» թեմայով դասախոսությամբ:

 

Ա. Հովհաննիսյանը նշեց, որ հանդիպումն արդյունավետ էր. «Դասախոսությանը ներկա էին թե՛ աշակերտները, թե՛ ուսուցիչները, որոնք մեծապես հետաքրքրված էին թեմայով և հնչեցրին բազմաթիվ հարցեր»:

 

 

Պատմության ֆակուլտետի Հայաստանի հարակից երկրների պատմության ամբիոնի վարիչ Էդիկ Զոհրաբյանն էլ Երևանի թիվ 114 ավագ դպրոցի աշակերտներին ներկայացել է «Կովկասագիտություն և Անդրկովկասի աշխարհաքաղաքական արդի զարգացումները» թեմայով դասախոսությամբ, ապա գործընկերների՝ Սուսաննա Սերոբյանի և Գոհար Մխիթարյանի հետ այցելել Երևանի թիվ 190 ավագ դպրոցի աշակերտներին:

 

Է. Զոհրաբյանը փաստեց, որ աշակերտներին պատմել է նաև ամբիոնի գործունեության, ընձեռած հնարավորություններ, մասնագիտության արդիականության և կարևորության մասին:

 

Թեմատիկ դասախոսություններով, որոնց ակտիվորեն մասնակցել են թե՛ աշակերտները, թե՛ ուսուցիչները, անդրադարձել են աշխարհաքաղաքական նոր իրողություններին, վերադասավորումներին և տարածաշրջանի հեռանկարներին:

 

Բացի դրանից՝ Է. Զոհրաբյանն ասաց, որ աշակերտներին հրավիրել են Մայր բուհի հիմնադրման օրվանից գործող ֆակուլտետ՝ տեղում ծանոթանալու դրա գործունեությանը և ամբիոնի աշխատանքներին:

 

 

 

Այլ նորություններ
ԵՊՀ-ԳՈՐԾԱՐԱՐ ԱՇԽԱՐՀ ԿԱՊՆ ԱՄՐԱՊՆԴՎՈՒՄ Է․ ԿՆՔՎԵԼ Է ՀԱՄԱԳՈՐԾԱԿՑՈՒԹՅԱՆ ՀՈՒՇԱԳԻՐ
ԵՊՀ ռեկտոր Հովհաննես Հովհաննիսյանն այսօր «Երեմյան Փրոջեքթս» ընկերության գլխավոր տնօրեն Դավիթ Երեմյանին հանձնել է շնորհակալագիր՝ ԵՊՀ-ում տեղի ունեցած «Կիրառական քիմիա. էքսպո 2022» միջոցառումը կազմակերպելու գործում ունեցած ներդրման և աջակցության համար։ Հ. Հովհաննիսյանը և Դ. Երեմյանն այսօր նաև ստորագրել են համագործակցության հուշագիր՝ իրավաբանորեն ամրագրելով երկու կառույցների միջև առկա համագործակցությունը։
ԵՊՀ-Ն ԼԱՎԱԳՈՒՅՆ ԱՐԺԵՔՆԵՐԻ ԵՎ ԱՎԱՆԴՈՒՅԹՆԵՐԻ ՍՏԵՂԾՈՂ Է․ ՏԵՂԻ ՈՒՆԵՑԱՎ ԵՊՀ ՇՐՋԱՆԱՎԱՐՏՆԵՐԻ ԱՎԱՐՏԱԿԱՆ ՀԱՆԴԻՍԱՎՈՐ ՄԻՋՈՑԱՌՈՒՄԸ
Մայր բուհի պատմության մեջ առաջին անգամ Ա. Սպենդիարյանի անվան օպերայի և բալետի ազգային ակադեմիական թատրոնի համերգասրահում տեղի ունեցավ ԵՊՀ շրջանավարտների ավարտական հանդիսավոր միջոցառումը, որի ընթացքում գիտական աստիճան ստացած շրջանավարտներին հանձնվեցին վկայագրեր։