02.03.2022 | 
Հասարակություն
ՄԱՍՆԱԳԻՏԱԿԱՆ ԿՈՂՄՆՈՐՈՇՄԱՆ ՆՊԱՏԱԿՈՎ ՀԱՆԴԻՊՈՒՄՆԵՐԸ ՇԱՐՈՒՆԱԿՎՈՒՄ ԵՆ. ԵՊՀ ԴԱՍԱԽՈՍՆԵՐՆ ԱՅՑԵԼԵԼ ԵՆ ՀԱՆՐԱՊԵՏՈՒԹՅԱՆ ՏԱՐԲԵՐ ԴՊՐՈՑՆԵՐ
ՄԱՍՆԱԳԻՏԱԿԱՆ ԿՈՂՄՆՈՐՈՇՄԱՆ ՆՊԱՏԱԿՈՎ ՀԱՆԴԻՊՈՒՄՆԵՐԸ ՇԱՐՈՒՆԱԿՎՈՒՄ ԵՆ. ԵՊՀ ԴԱՍԱԽՈՍՆԵՐՆ ԱՅՑԵԼԵԼ ԵՆ ՀԱՆՐԱՊԵՏՈՒԹՅԱՆ ՏԱՐԲԵՐ ԴՊՐՈՑՆԵՐ
ԵՊՀ ընդունելության և դիմորդների հետ տարվող աշխատանքների կենտրոնը, համագործակցելով տարբեր ֆակուլտետների հետ, իրականացնում է դասախոսների և հանրապետության տարբեր դպրոցների աշակերտների հանդիպումներ՝ նպատակ ունենալով նպաստելու ապագա դիմորդների մասնագիտական կողմնորոշմանը, հաղորդելու նոր գիտելիքներ ու բարձրացնելու իրազեկության նրանց մակարդակը:

Մասնագիտական կողմնորոշման նպատակով կազմակերպված դասախոսությունների ժամանակ ԵՊՀ դասախոսներն աշակերտներին ներկայացնում են Մայր բուհի կառուցվածքը, գործունեությունը, իրենց ֆակուլտետների աշխատանքները, հանդես գալիս թեմատիկ դասախոսություններով և պատասխանում նրանց հարցերին:

 

Աստվածաբանության ֆակուլտետի կրոնի պատմության և տեսության ամբիոնի դոցենտ Լիզա Քարիմյանը և Հայ եկեղեցու պատմության և եկեղեցաբանության ամբիոնի ասիստենտ Լիդա Սահակյանն այցելել են Երևանի թիվ 198 ավագ դպրոց և աշակերտների համար հանդես եկել «Կրոնական զբոսաշրջություն» թեմայով դասախոսությամբ:

 

Լ. Քարիմյանն ասաց, որ «Կրոնական զբոսաշրջություն»-ը ֆակուլտետի կրթական նոր ծրագիր է, որը գործելու է հաջորդ տարվանից: Նրա խոսքով, աշակերտներին մանրամասն ներկայացվել է այդ ծրագրի առավելությունները, մասնագիտացման արդիականությունը և հեռանկարները:

 

 

Պատմության ֆակուլտետի հայոց պատմության ամբիոնի դոցենտ Տիգրան Ղանալանյանը հանդիպել է Երևանի թիվ 159 ավագ դպրոցի աշակերտներին և նրանց համար հանդես եկել «Արցախյան գոյամարտ» թեմայով դասախոսությամբ:

 

Մեզ հետ զրույցում Տ. Ղանալանյանն ասաց, որ դասախոսության ընթացքում ներկայացվել է Արցախյան հիմնահարցը, անդրադարձ է կատարվել պատմական իրողություններին ու ներկայիս իրավիճակին: Նրա խոսքով, հանդիպումը բավականին արդյունավետ է անցել. հնչել են բազմաթիվ հարցեր ու տեղի ունեցել ակտիվ քննարկումներ:

 

Աշխարհագրության և երկրաբանության ֆակուլտետի սերվիսի ամբիոնի վարիչ Սեյրան Սուվարյանը Երևանի թիվ 184 ավագ դպրոցի աշակերտներին ներկայացրել է «Ինչպես ընտրել մասնագիտություն» և «Սերվիսը՝ որպես ժամանակակից հետազոտության օբյեկտ» թեմաներով դասախոսությունները:

 

Մեզ հետ զրույցում Ս. Սուվարյանը նշեց, որ հանդիպմանն աշակերտներին վստահեցրել է, որ չկա վատ մասնագիտություն, կան լավ ու վատ մասնագետներ: Ամբիոնի վարիչն աշակերտներին ներկայացրել է ֆակուլտետի կրթական ծրագրերը, սերվիսի վերաբերյալ տարածված կարծրատիպերը և պատասխանել նրանց հարցերին:

 

 

Ֆիզիկայի ֆակուլտետի դեկան Ռաֆիկ Հակոբյանը Վանաձորի մաթեմատիկայի և բնագիտական առարկաների խորացված ուսուցմամբ «Էվրիկա» հատուկ դպրոցի և թիվ 5, 11, 17, 10, 13, ինչպես նաև ՀՊՃՀ Վանաձորի մասնաճյուղի ավագ ու միջնակարգ դպրոցների աշակերտների համար հանդես է եկել «Ժամանակակից ֆիզիկայի արդի խնդիրները, մասնագիտական կողմնորոշումը և ԵՊՀ ֆիզիկայի ֆակուլտետը» թեմայով դասախոսությամբ:

 

Ռ. Հակոբյանն ասաց, որ աշակերտների հետ հանդիպմանը ներկայացվել են ԵՊՀ ֆիզիկայի ֆակուլտետը, իրականացված փոփոխությունները, ինչպես նաև ֆիզիկայի բնագավառում վերջին տարիների նորարարությունները:

 

Ի դեպ, Վանաձոր այցելության ժամանակ դեկանին ուղեկցել են ֆակուլտետի առաջին կուրսի ուսանողներ Էրիկ Գևորգյանը, Սամվել Վարդանյանը, որոնք «Էվրիկա» դպրոցի շրջանավարտներ են, ինչպես նաև Միլենա Սաֆարյանը և Լիլիա Ազարյանը: Ուսանողները նույնպես մասնակցել են աշակերտների հետ հանդիպումներին և պատասխանել նրանց հարցերին:

 

 

Մաթեմատիկայի և մեխանիկայի ֆակուլտետն էլ հյուրընկալել է «Մխիթար Հերացի» ավագ դպրոցի ավարտական դասարանի աշակերտներին, որոնց հետ հանդիպմանը մասնակցել են ֆակուլտետի դեկան Արթուր Սահակյանը և Ֆինանսական մաթեմատիկայի ամբիոնի վարիչ Միքայել Պողոսյանը:

 

Ա. Սահակյանն աշակերտներին ներկայացրել է ֆակուլտետի պատմությունն ու ձեռքբերումները,  մասնագիտությունների ցանկը, ընդունելության կարգն ու պայմանները: Ֆինանսական մաթեմատիկայի ամբիոնի վարիչը խոսել է «Ակտուարական և ֆինանսական մաթեմատիկա» և «Կիրառական վիճակագրություն և տվյալների գիտություն» բակալավրիատի մասնագիտացումների առավելությունների, կրթական ծրագրերի առանձնահատկությունների մասին, նկարագրել, թե որտեղ և ինչպես են կարող կիրառվել ֆակուլտետում ստացված գիտելիքները:

 

Հանդիպմանն աշակերտները հղել են իրենց հետաքրքրող հարցերն ու ստացել դրանց պատասխանները: Ա. Սահակյանը հույս է հայտնել, որ հանդիպմանը մասնակից աշակերտներից ոմանք սեպտեմբերին կլինեն արդեն ֆակուլտետի ուսանողի կարգավիճակում:

 

Այլ նորություններ
ԵՊՀ-ԳՈՐԾԱՐԱՐ ԱՇԽԱՐՀ ԿԱՊՆ ԱՄՐԱՊՆԴՎՈՒՄ Է․ ԿՆՔՎԵԼ Է ՀԱՄԱԳՈՐԾԱԿՑՈՒԹՅԱՆ ՀՈՒՇԱԳԻՐ
ԵՊՀ ռեկտոր Հովհաննես Հովհաննիսյանն այսօր «Երեմյան Փրոջեքթս» ընկերության գլխավոր տնօրեն Դավիթ Երեմյանին հանձնել է շնորհակալագիր՝ ԵՊՀ-ում տեղի ունեցած «Կիրառական քիմիա. էքսպո 2022» միջոցառումը կազմակերպելու գործում ունեցած ներդրման և աջակցության համար։ Հ. Հովհաննիսյանը և Դ. Երեմյանն այսօր նաև ստորագրել են համագործակցության հուշագիր՝ իրավաբանորեն ամրագրելով երկու կառույցների միջև առկա համագործակցությունը։
ԵՊՀ-Ն ԼԱՎԱԳՈՒՅՆ ԱՐԺԵՔՆԵՐԻ ԵՎ ԱՎԱՆԴՈՒՅԹՆԵՐԻ ՍՏԵՂԾՈՂ Է․ ՏԵՂԻ ՈՒՆԵՑԱՎ ԵՊՀ ՇՐՋԱՆԱՎԱՐՏՆԵՐԻ ԱՎԱՐՏԱԿԱՆ ՀԱՆԴԻՍԱՎՈՐ ՄԻՋՈՑԱՌՈՒՄԸ
Մայր բուհի պատմության մեջ առաջին անգամ Ա. Սպենդիարյանի անվան օպերայի և բալետի ազգային ակադեմիական թատրոնի համերգասրահում տեղի ունեցավ ԵՊՀ շրջանավարտների ավարտական հանդիսավոր միջոցառումը, որի ընթացքում գիտական աստիճան ստացած շրջանավարտներին հանձնվեցին վկայագրեր։