12.10.2021 | 
Հասարակություն
«ՄԵՆՔ ՀԱՎԱՏԱՐԻՄ ԵՆՔ ՄՆԱՑԵԼ ՄԵՐ ՄԵԾ ԱՌԱՔԵԼՈՒԹՅԱՆԸ». ԵՊՀ ՄԱՆԿԱՎԱՐԺՈՒԹՅԱՆ ԱՄԲԻՈՆԸ 100 ՏԱՐԵԿԱՆ Է
«ՄԵՆՔ ՀԱՎԱՏԱՐԻՄ ԵՆՔ ՄՆԱՑԵԼ ՄԵՐ ՄԵԾ ԱՌԱՔԵԼՈՒԹՅԱՆԸ». ԵՊՀ ՄԱՆԿԱՎԱՐԺՈՒԹՅԱՆ ԱՄԲԻՈՆԸ 100 ՏԱՐԵԿԱՆ Է
ԵՊՀ գիտական խորհրդի նիստերի դահլիճում այսօր տեղի է ունեցել ԵՊՀ մանկավարժության ամբիոնի հիմնադրման 100-ամյակին նվիրված հոբելյանական միջոցառումը, որը կազմակերպել էր ԵՊՀ մանկավարժության և կրթության զարգացման կենտրոնը:

Հոբելյանական միջոցառումը մեկնարկեց ԵՊՀ մանկավարժության և կրթության զարգացման կենտրոնի տնօրեն, Մանկավարժության ամբիոնի վարիչ, մանկ. գիտ. դոկտոր, պրոֆեսոր Նազիկ Հարությունյանի բացման խոսքով. «Այսօր լրանում է ԵՊՀ մանկավարժության ամբիոնի հիմնադրման 100-ամյակը, իսկ դա նշանակում է արդյունավետ գործունեության երկար ու ձիգ ճանապարհ, ձեռքբերումներ ու հաջողություններ, ստեղծագործ աշխատանք, մեծ նվիրում, երիտասարդ սերունդ կրթելու և որակյալ մասնագետներ պատրաստելու մեծ առաքելություն: Գիտական գործունեության ողջ ընթացքում կենտրոնն իր առջև դրել է մի մեծ նպատակ՝ պահպանել մեր ավագ գործընկերների ստեղծած արժեքները և զարգացնել ու նոր որակի բարձրացնել Մանկավարժության ամբիոնի գիտակրթական աշխատանքը: Եվ այսօր մեծ հպարտությամբ կարող եմ ասել, որ մենք հավատարիմ ենք մնացել մեր մեծ առաքելությանը»:

 

 

Հանդիսավոր նիստի ընթացքում ամբիոնի դասախոսները պարգևատրվեցին համալսարանի արծաթե և բրոնզե մեդալներով, պատվոգրերով, ինչից հետո ցուցադրվեց Մանկավարժության ամբիոնի գիտակրթական բեղմնավոր գործունեության, անցած 100-ամյա ուղու մասին պատմող փաստավավերագրական ֆիլմը:  

 

 

 

Մանկավարժության ամբիոնի գիտակրթական արդյունավետ գործունեությանն անդրադարձավ ԵՊՀ ռեկտորի ժամանակավոր պաշտոնակատար Հովհաննես Հովհաննիսյանը, որն արժևորեց ամբիոնի տեղական և միջազգային գործունեությունը՝ կարևորելով վերջինիս ներդրումը համալսարանական կյանքում:

 

 

«Այսօր հիրավի նշանակալի օր է Մայր բուհի կյանքում, քանի որ Մանկավարժության ամբիոնն այն հիմնասյուներից է, որի վրա կառուցվել է համալսարանի հարյուրամյա պատմությունը: Մենք բոլորս մանկավարժներ ենք, մեր կյանքը նվիրել ենք մեր հայրերին ու պետությանն արժանի երիտասարդ սերնդի դաստիարակությանը: Այս գործում անգնահատելի է համալսարանի դերը»,- նշեց Հովհաննես Հովհաննիսյանը և հավելեց, որ Մանկավարժության ամբիոնն այսօր էլ շարունակում է լինել մանկավարժական առաջատար գաղափարների ներմուծողն ու նորարարը։

 

 

Ռեկտորի ժ.պ.-ն Նազիկ Հարությունյանին նվիրեց Արցախից բերված «Մոխանք Արևագորգ»:

 

 

ԿԳՄՍ փոխնախարար Կարեն Թռչունյանը կարևորեց ամբիոնի դերակատարությունը նորարարական գաղափարների տարածման և մանկավարժության զարգացման տեսանկյունից. «Մեր բուհական համակարգի ամենակարևոր գործը նոր սերունդ կրթելն է՝ կիրառելով նոր մոտեցումներ ու տեխնոլոգիաներ, քանի որ 20-րդ դարի կրթությունն էապես տարբերվում է նոր ժամանակների կրթությունից: Այն երկրները, որոնք կկարողանան կրթական համակարգը հարմարեցնել ժամանակի պահանջներին, կլինեն առաջամարտիկները: Այս գործընթացները, որտեղ անչափ կարևոր է մանկավարժների դերը, աստիճանաբար են կատարվում: Վստահ եմ, որ ԵՊՀ մանկավարժության ամբիոնը կունենա իր ներդրումը տվյալ գործում»:

 

 

ԵՊՀ հումանիտար և հասարակագիտական մասնագիտությունների գծով պրոռեկտոր Էլինա Ասրիյանը ողջույնի խոսքում նշեց, որ ամբիոնի գործունեության ընթացքը նշանակալից է համալսարանի գիտակրթական զարգացման գործում. «Հարյուր տարիների ընթացքում ամբիոնը կարողացել է ձևավորել մի շարք կրթական ավանդույթներ, միևնույն ժամանակ որդեգրել է ինովացիոն մոտեցումներ: Ամբիոնը շատ հաճախ մեզ համար դարձել է նորարարական մի հարթակ, որտեղ մենք հնարավորություն ենք ունեցել փորձարկելու տարբեր մոտեցումներ ու մեթոդներ»:

 

Միջոցառման ընթացքում հնչեցին շնորհավորական ուղերձներ Ավստրիայի Գրացի, Լեհաստանի Վարշավայի և Ժեշովի, ինչպես նաև ՌԴ Մոսկվայի պետական հոգեբանամանկավարժական համալսարաններից:

 

Հոբելյանական միջոցառման ընթացքում ողջույնի խոսքերով հանդես եկան ԵՊՀ աստվածաբանության ֆակուլտետի դեկան, գերաշնորհ տեր Անուշավան եպս. Ժամկոչյանը, հայաստանյան տարբեր բուհերի ներկայացուցիչներ:

 

 

«Շատ դժվար ճանապարհ է անցել հայ մանկավարժը դարերի հորձանուտներում, աննկարագրելի թռիչքներ է իրականացրել, արհամարhել դարերի ընթացքում կրած հարվածները և շարունակել իր աստվածահաճո լուսավորության գործը՝ մխիթարելով, գոտեպնդելով, ուղղորդելով ու առաջնորդելով հայ մանկանն ու երիտասարդին»,- ասաց Աստվածաբանության ֆակուլտետի դեկանը:

 

Բանախոսները կարևորեցին ԵՊՀ մանկավարժության ամբիոնի մշտական համագործակցությունը հայաստանյան բուհերի հետ, ինչպես նաև բացառիկ համարեցին  պարբերաբար կազմակերպվող միջազգային գիտաժողովների, կենտրոնում գործող «Կրթությունը 21-րդ դարում» գիտամեթոդական միջազգային գրախոսվող հանդեսի միջոցով մանկավարժական մտքի ժամանակակից ուղենիշների ներդրման և տարածման գործում ԵՊՀ մանկավարժության ամբիոնի դերակատարությունը:

 

ԵՊՀ ՈԻԽ նախագահ Դավիթ Ափոյանը նկատեց, որ այսօր էլ Հայաստանում կրթության կազմակերպման գործում մանկավարժի բարդ ու պատվաբեր մասնագիտությունն են ընտրում ուսանողներից շատերը, որոնք ցանկություն ունեն սերունդների կրթման գործում իրենց գիտելիքներն ի սպաս դնելու և զինվելու մասնագիտական ամուր գիտելիքներով, Մանկավարժության ամբիոնն այդ առումով մշտապես ուսանողների կողքին է:

 

Նազիկ Հարությունյանը ներկայացրեց «Մանկավարժության ամբիոնի 100-ամյա անցած ուղին» խորագրով տպագրված գիրքը, որն իր նկարազարդ էջերում ամփոփում է 100-ամյա ամբիոնի գործունեությունը: Հավելենք, որ գիրքը տպագրվել է «Վարդանանք» կրթահամալիրի մեկենասությամբ։

 

 

«Լավագույն ուսանող» անվանակարգում խրախուսական պատվոգրեր շնորհվեցին կենտրոնի երկու ուսանողի՝ բակալավրիատի «Սոցիալական մանկավարժություն» կրթական ծրագրի չորրորդ կուրսի ուսանողուհի Մարգարիտա Ոսկանյանին և մագիստրատուրայի «Կրթության կազմակերպում» կրթական ծրագրի երկրորդ կուրսի ուսանողուհի Մանե Ալեքսանյանին:

 

Միջոցառման ավարտին ցուցադրվեց ԵՊՀ մանկավարժության ամբիոնի՝ աշխարհով մեկ սփռված շրջանավարտների երախտիքի խոսքերն ու շնորհավորանքներն ամփոփող տեսաֆիլմ, որից հետո հանդիսավոր միջոցառումը եզրափակվեց «Էլեգիա» երաժշտական քառյակի կատարումներով:

 

ՄԻջոցառման ամբողջական լուսանկարների շարքն այստեղ՝  https://bit.ly/3at9HSf 

 

Վարդուհի Զաքարյան

 

 

 

 

Այլ նորություններ
ԲԱՆԱԽՈՍՈՒԹՅՈՒՆ ՄՐՑԱԿՑՈՒԹՅԱՆ ՊԱՇՏՊԱՆՈՒԹՅԱՆ ՀԱՆՁՆԱԺՈՂՈՎԻ ՄԱՍԻՆ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏՈՒՄ
ԵՊՀ իրավագիտության ֆակուլտետի դատական նիստերի դահլիճում կազմակերպվել էր միջոցառում, որի ընթացքում ՄՊՀ անդամ, Իրավագիտության ֆակուլտետի դասախոս, ի.գ.թ.Տիգրան Մարկոսյանը ԵՊՀ իրավագիտության ֆակուլտետի ուսանողներին ներկայացրեց Մրցակցության պաշտպանության հանձնաժողովի գործառույթներն ու լիազորությունները:
«ՉՆԱՅԱԾ ԱՐՏԵՐԿՐՈՒՄ ԱՌԱՋԱՐԿՆԵՐՆ ԱՎԵԼԻ ԳՐԱՎԻՉ ԵՆ, ԲԱՅՑ ՄԵՐԸ ՀԱՅԱՍՏԱՆՆ Է, ՄԵՆՔ՝ ՀԱՅԱՍՏԱՆԻՆԸ». ԱՆԱՀԻՏ ՕՐԲԵԼՅԱՆ
ԵՊՀ աշխարհագրության և երկրաբանության ֆակուլտետի սերվիս բաժնի 3-րդ կուրսի ուսանողուհի Անահիտ Օրբելյանը վստահ է, որ Հայաստանը զբոսաշրջության ոլորտում մեծ ներուժ ունի: Երիտասարդ համալսարանականն ունի իր տեսլականը պետության զարգացման համար, որի առանցքային տարրը երիտասարդն է՝ հայրենասեր ու նպատակասլաց: