29.11.2019 | 
Հասարակություն
ՄԻՋԲՈՒՀԱԿԱՆ ԴԱՏԱԽԱՂ-ՄՐՑՈՒՅԹՈՒՄ ՀԱՂԹԵԼ Է ԵՊՀ ԹԻՄԸ
ՄԻՋԲՈՒՀԱԿԱՆ ԴԱՏԱԽԱՂ-ՄՐՑՈՒՅԹՈՒՄ ՀԱՂԹԵԼ Է ԵՊՀ ԹԻՄԸ
Հայաստանում նոյեմբերի 23-27-ն առաջին անգամ կազմակերպվել է մարդու իրավունքների միջբուհական դատախաղ-մրցույթ, որի եզրափակիչ փուլում մրցել են ԵՊՀ թիմերը:

Դատախաղը կազմակերպվել էր «Եվրոպայի իրավաբան ուսանողների հայկական ասոցիացիա» ՀԿ-ի և ՀՀ վարչապետի աշխատակազմի Մարդու իրավունքների եվրոպական դատարանում Հայաստանի Հանրապետության ներկայացուցչի գրասենյակի կողմից:

 

Դատախաղի նպատակն էր Մարդու իրավունքների եվրոպական դատարանի և կոնվենցիայով երաշխավորված իրավունքների պաշտպանության վերաբերյալ ուսանողներին փոխանցել առավել խոր գիտելիքների ու ամրապնդել դրանք: Այն նվիրված էր Մարդու իրավունքների եվրոպական կոնվենցիայի 10-րդ հոդվածով երաշխավորված ազատորեն արտահայտվելու իրավունքի իրացման, ատելության խոսքի դրսևորումների և այլ հարցերին:

 

Դատախաղն անցկացվել է երկու փուլով՝ բանավոր և գրավոր, որոնք հնարավորինս նմանեցվել են Եվրոպական դատարանում գործի քննության իսկական ընթացակարգին: Դատախաղին մասնակցելու հայտ է ներկայացրել 13 թիմ: Բոլոր թիմերը հնարավորություն են ստացել մասնակցելու դատախաղի գրավոր փուլին, որտեղ պարտավոր էին ներկայացնել երկու դիրքորոշում՝ դիմումատուի և կառավարության դիրքորոշումները: Մասնակից 13 թիմից միայն վեցն է հաղթահարել այդ փուլի համար նախատեսված միավորների շեմը և հնարավորություն ստացել մասնակցելու բանավոր փուլին:

 

 

Հատկանշական է, որ ԵՊՀ իրավագիտության ֆակուլտետի ուսանողներից կազմված թիմերից մեկը (4-րդ կուրս ուսանողներ՝ Վլադիմիր Մաղաքյան, Վիրաբ Համբարձումյան, Մերի Ղազարյան, Էլլադա Հակոբյան, 2-րդ կուրսի ուսանողուհի Անուշ Բողոսյան, մարզիչ՝ Լ.Պետրոսյան) գրավոր փուլի արդյունքում ստացել է հնարավոր 200 միավորից 197՝ արժանանալով միաժամանակ լավագույն դիմում և լավագույն պատասխան մրցանակներին:

 

Բանավոր փուլի մեկ քառորդ եզրափակիչ և կիսաեզրափակիչ խաղերը տեղի են ունեցել նոյեմբերի 23-ին, որին մասնակցող թիմերից 5-ը ԵՊՀ իրավագիտության ֆակուլտետի ուսանողներից կազմված թիմերն էին, իսկ մեկը՝ Հայ-ռուսական սլավոնական համալասարանի ուսանողներից կազմված թիմը:

 

ԵՊՀ-ից դատախաղի կիսաեզրափակիչ փուլ են անցել 3 թիմ: Այդ փուլի արդյունքում էլ եզրափակիչ փուլ է անցել առավելագույն միավոր հավաքած երկու թիմ, որոնք ներկայացրել են ԵՊՀ-ն: Ընդ որում՝ երրորդ հորիզոնականը զբաղեցրել է կիսաեզրափակիչ փուլում լավագույն գրավոր աշխատանքի մրցանակին արժանացած ԵՊՀ թիմը, որը հաղթել է Հայ-ռուսական սլավոնական համալասարանի ուսանողներից կազմված թիմին:

 

Նոյեմբերի 27-ին կայացած եզրափակիչ խաղին թիմերից մեկը (Մարինա Մաքյան, Սոնա Հայրապետյան, Հարություն Եսոյան, Վիկտորյա Մարտիրոյան, Էդգար Տեր-Հովհաննիսյան, մարզիչ Ա.Ղարսլյան) եզրափակիչ խաղում հանդես է եկել որպես դիմումատու, իսկ մյուս թիմը (Օֆելյա Սիրեկանյան, Լիդա Քոչարյան, Թեհմինե Պապոյան, Էմմա Պետրոսյան, Միլենա Տոնեյան, մարզիչ Լ.Պետրոսյան)՝ որպես Կառավարություն:

 

 

Եզրափակիչ խաղի հաղթող է ճանաչվել ԵՊՀ իրավագիտության ֆակուլտետի 3-րդ կուրսի ուսանողներից կազմված թիմը (Օֆելյա Սիրեկանյան, Լիդա Քոչարյան, Թեհմինե Պապոյան, Էմմա Պետրոսյան, Միլենա Տոնեյան, մարզիչ Լ.Պետրոսյան)՝ ստանալով մրցանակներ:

 

Պատրաստեց Քնար Միսակյանը

Այլ նորություններ
ՀԱՅՏՆԻ Է 2019-2020 ՈՒՍՏԱՐՎԱ ԵՐԿՐՈՐԴ ԿԻՍԱՄՅԱԿԻ ՈՒՍՈՒՄՆԱԿԱՆ ԳՈՐԾԸՆԹԱՑԻ ԿԱԶՄԱԿԵՐՊՄԱՆ ԺԱՄԱՆԱԿԱՑՈՒՅՑԸ
2019-2020 ուստարվա 2-րդ կիսամյակի առկա ուսուցման ուսումնական պարապմունքները սկսվելու են փետրվարի 10-ից:
ՌԳԱ ԵՎՐՈՊԱՅԻ ԻՆՍՏԻՏՈՒՏԻ ՏՆՕՐԵՆ ԱԼԵՔՍԵՅ ԳՐՈՄԻԿՈՆ ՎԱՐՊԵՏՈՒԹՅԱՆ ԴԱՍ ԱՆՑԿԱՑՐԵՑ ԵՊՀ-ՈՒՄ
ԵՊՀ-ում այսօր հյուրընկալվել էր Անդրեյ Գրոմիկոյի անվան արտաքին քաղաքական հետազոտությունների ասոցիացիայի նախագահ, Ռուսաստանի գիտությունների ակադեմիայի թղթակից անդամ, քաղաքագիտության դոկտոր, պրոֆեսոր, ՌԳԱ Եվրոպայի ինստիտուտի տնօրեն Ալեքսեյ Գրոմիկոն: