06.10.2021 | 
Հասարակություն
«ԲՈԼՈՐՍ ՄԵԿ ԸՆԴՀԱՆՈՒՐ ՆՊԱՏԱԿ ՈՒՆԵՆՔ՝ ԶԱՐԳԱՑՆԵԼ ԱՐՑԱԽՆ ՈՒ ԱՄՐԱՊՆԴԵԼ ԿԱՊԸ ՍՓՅՈՒՌՔԻ ՀԵՏ». ՀԱՅԱՍՏԱՆ-ՍՓՅՈՒՌՔ ՀԱՄԱԳՈՐԾԱԿՑՈՒԹՅԱՆ ԱՄՐԱՊՆԴՄԱՆՆ ՈՒՂՂՎԱԾ ՀԱՆԴԻՊՈՒՄ ԵՊՀ-ՈՒՄ
«ԲՈԼՈՐՍ ՄԵԿ ԸՆԴՀԱՆՈՒՐ ՆՊԱՏԱԿ ՈՒՆԵՆՔ՝ ԶԱՐԳԱՑՆԵԼ ԱՐՑԱԽՆ ՈՒ ԱՄՐԱՊՆԴԵԼ ԿԱՊԸ ՍՓՅՈՒՌՔԻ ՀԵՏ». ՀԱՅԱՍՏԱՆ-ՍՓՅՈՒՌՔ ՀԱՄԱԳՈՐԾԱԿՑՈՒԹՅԱՆ ԱՄՐԱՊՆԴՄԱՆՆ ՈՒՂՂՎԱԾ ՀԱՆԴԻՊՈՒՄ ԵՊՀ-ՈՒՄ
ԵՊՀ Հովհաննես Ադամյանի անվան սրահում այսօր տեղի է ունեցել «Սփյուռքի երիտասարդ դեսպան» ծրագիրը, որին մասնակցում էին 16 տարբեր երկրներից ժամանած երիտասարդներ:

Սփյուռքի գործերի գլխավոր հանձնակատարի գրասենյակի կողմից իրականացվող ծրագրի նպատակն է աջակցել Սփյուռքի այն երիտասարդներին, որոնք ներգրավված են Հայաստան-Սփյուռք համագործակցության ամրապնդման գործընթացներում, աշխատանքներ են տանում համայնքային կյանքի ակտիվացման, հայկական շահերի պաշտպանության ուղղությամբ:

 

«Ծրագիրը մեկամյա է, որն ունի տեսական և գործնական հատված: Մասնակիցների համար Հայաստանում ու Արցախում կազմակերպվել են մի շարք դասախոսություններ, աշխատաժողովներ, հանդիպումներ, որոնց արդյունքում երիտասարդներին հնարավորություն է տրվել ձեռք բերելու գիտելիքներ Հայաստանի քաղաքական, սոցիալական, տնտեսական հրատապ խնդիրների լուծման համար, միաժամանակ ընդլայնելու իրենց պատկերացումները համայնքային կյանքում ներգրավվածության և հայկական շահերի պաշտպանության հարցերում: Ծրագրի երկրորդ մասը ենթադրում է ձեռք բերված գիտելիքների փոխանցումն ու դրանց կիրառումն արդեն իրենց հարազատ համայնքներում»,- ասաց Սփյուռքի գործերի գլխավոր հանձնակատարի գրասենյակի ծրագրերի մշտադիտարկման բաժնի պետ, «Սփյուռքի երիտասարդ դեսպան» ծրագրի ղեկավար Գրետա Մնացականյանը:

 

Ծրագրի ղեկավարն ընդգծեց, որ կարևոր բաղադրիչ են նաև մեդիա-կոնտենտին նվիրված միջոցառումներն ու հանդիպումները, որոնց շրջանակում էլ ծրագրի մասնակիցներն այսօր կհանդիպեն ԵՊՀ սոցիոլոգիայի ֆակուլտետի սոցիալական աշխատանքի և սոցիալական տեխնոլոգիաների ամբիոնի դոցենտ Նվարդ Մելքոնյանի հետ:

 

 

«Մեր Սփյուռքի երիտասարդ դեսպանների հետ խոսել եմ հասարակայնության հետ կապերի փիառային հնարքների մասին, որպեսզի նրանք իրենց երկրներում հնարավորինս լավ ներկայացնեն Հայաստանը: Զրուցեցինք նաև երկրի վարկանիշի ձևավորման հիմնական սկզբունքների, դրանց կիրառման տեխնոլոգիաների մասին՝ շեշտը դնելով հետաքրքիր, բազմաբնույթ և լսարանին գրավող բովանդակություն ձևավորելու վրա»,- նշեց Նվարդ Մելքոնյանը:

 

 

Վրաստանից ժամանած Էմիլ Սարգսյանը, որն աշխատում է Վիրահայոց թեմի երիտասարդության հարցերի բաժնում, կարևորում է նմանօրինակ ծրագրի իրականացումն ու երիտասարդների մասնակցությունը. «Մենք համախմբվել ենք Հայաստանում, և բոլորս մեկ ընդհանուր նպատակ ունենք՝ զարգացնել Արցախն ու ամրապնդել կապը Սփյուռքի հետ: Այստեղից ստացած տեղեկատվությունը, գիտելիքներն ու հմտությունները հնարավորինս կփորձեմ փոխանցել իմ գործընկերներին ու ընդհանրապես երիտասարդներին, քանի որ մենք պետք է հետագա համագործակցության նոր ճանապարհներ գտնենք»:

 

Հավելենք, որ երիտասարդները ծրագրի ավարտին կայցելեն նաև Հայաստանի պատմական, մշակութային և հիշատակի վայրեր, կրթական, գիտական, տեխնոլոգիական ինստիտուտներ, կմասնակցեն հասարակական, մշակութային միջոցառումների և կամավորական աշխատանքների։

 

Վարդուհի Զաքարյան

Այլ նորություններ
ԵՊՀ-ԳՈՐԾԱՐԱՐ ԱՇԽԱՐՀ ԿԱՊՆ ԱՄՐԱՊՆԴՎՈՒՄ Է․ ԿՆՔՎԵԼ Է ՀԱՄԱԳՈՐԾԱԿՑՈՒԹՅԱՆ ՀՈՒՇԱԳԻՐ
ԵՊՀ ռեկտոր Հովհաննես Հովհաննիսյանն այսօր «Երեմյան Փրոջեքթս» ընկերության գլխավոր տնօրեն Դավիթ Երեմյանին հանձնել է շնորհակալագիր՝ ԵՊՀ-ում տեղի ունեցած «Կիրառական քիմիա. էքսպո 2022» միջոցառումը կազմակերպելու գործում ունեցած ներդրման և աջակցության համար։ Հ. Հովհաննիսյանը և Դ. Երեմյանն այսօր նաև ստորագրել են համագործակցության հուշագիր՝ իրավաբանորեն ամրագրելով երկու կառույցների միջև առկա համագործակցությունը։
ԵՊՀ-Ն ԼԱՎԱԳՈՒՅՆ ԱՐԺԵՔՆԵՐԻ ԵՎ ԱՎԱՆԴՈՒՅԹՆԵՐԻ ՍՏԵՂԾՈՂ Է․ ՏԵՂԻ ՈՒՆԵՑԱՎ ԵՊՀ ՇՐՋԱՆԱՎԱՐՏՆԵՐԻ ԱՎԱՐՏԱԿԱՆ ՀԱՆԴԻՍԱՎՈՐ ՄԻՋՈՑԱՌՈՒՄԸ
Մայր բուհի պատմության մեջ առաջին անգամ Ա. Սպենդիարյանի անվան օպերայի և բալետի ազգային ակադեմիական թատրոնի համերգասրահում տեղի ունեցավ ԵՊՀ շրջանավարտների ավարտական հանդիսավոր միջոցառումը, որի ընթացքում գիտական աստիճան ստացած շրջանավարտներին հանձնվեցին վկայագրեր։