25.04.2015 | 
Քաղաքականություն
ՀՈՒՅՆ ՔԱՂԱՔԱԿԱՆ ԳՈՐԾԻՉՆԵՐՆ ԱՅՑԵԼԵՑԻՆ ԵՊՀ
ՀՈՒՅՆ ՔԱՂԱՔԱԿԱՆ ԳՈՐԾԻՉՆԵՐՆ ԱՅՑԵԼԵՑԻՆ ԵՊՀ
Այսօր համալսարանականների հետ հանդիպեցին Հունաստանի Ազգային ժողովի նախագահ Զոյի Կոնստանտապուլոսն ու ՀՀ-ում Հունաստանի արտակարգ և լիազոր դեսպան Իոաննիս Տայիսը:

Հայոց ցեղասպանության 100-րդ տարելիցին նվիրված միջոցառումների շրջանակներում գտնվելով Հայաստանում` Զոյի Կոնստանտապուլոսը ցանկություն էր հայտնել հանդիպում ունենալ Մայր բուհի ներկայացուցիչների հետ: Հանդիպումը տեղի ունեցավ ԵՊՀ հունագիտության կենտրոնում: Ներկա էին ԵՊՀ ռեկտոր Արամ Սիմոնյանը, Ուսումնական աշխատանքների գծով պրոռեկտոր Ալեքսանդր Գրիգորյանը, Ռուս բանասիրության ֆակուլտետի դեկան Պավել Բալայանը, ԵՊՀ հունագիտության կենտրոնի տնօրեն Լևոն Հակոբյանն ու հունարեն բաժնում սովորող ուսանողները:


Ողջունելով հյուրերին՝ ԵՊՀ ռեկտորը նշեց, որ այս օրերին մեզ համար թանկ են մեր այն բարեկամները, ովքեր Հայոց ցեղասպանության 100-րդ տարելիցի կապակցությամբ այցելել են Հայաստան: Պարոն Սիմոնյանը փաստեց, որ հայերը ամբողջ աշխարհում շատ բարեկամներ ունեն, և որ հատկապես առանձնահատուկ է Հայաստանի ու Հունաստանի բարեկամական կապը, իսկ այդ կապը հնուց է գալիս, և այդ երկու երկրների ժողովուրդների հարաբերությունները երկար տարիների պատմություն ունեն:

«Կարևորելով Հունագիտության կենտրոնի գոյությունը՝ լիահույս ենք, որ այն առաջիկայում ևս շարունակելու է իր ակտիվ գործունեությունը և ավելի շատ ուսանողներ են ցանկություն հայտնելու սովորել հունարեն լեզուն և ուսումնասիրել հունական մշակույթը: Ավելին՝ Հայաստանում նրանք լինելու են հունական մշակույթի ու հույն գրականության տարածողները,- նշեց ռեկտորը, այնուհետև անդրադարձ կատարելով նաև Մայր բուհի պատմությանը՝ փաստեց,- ունենալով շուրջ 20.000 ուսանող, 3.000 աշխատող և ավելի քան 270 համալսարանների ու գիտական կենտրոնների հետ համագործակցություն՝ Հայոց համալսարանը շարժվում է ժամանակի մարտահրավերներին համապատասխան»:

Հունաստանի Ազգային ժողովի նախագահ Զոյի Կոնստանտապուլոսը, կարևորելով իր այցելությունը Հայաստանի Մայր բուհ, փաստեց, որ հունարենի դասավանդումը և հունական գրականության լայնածավալ ուսումնասիրությունը Հունաստանի հանդեպ Հայաստանի հետաքրքրվածության մասին է վկայում: Ազգային ժողովի նախագահի հավաստմամբ` այդ հետաքրքրությունը փոխադարձ է, և ինքն էլ անձամբ հայ մշակույթի երկարամյա երկրպագուն է:

«Այն փաստը, որ Հայաստանի Մայր բուհում գործում է Հունագիտական կենտրոն, շատ նպատակային է, քանզի կարևորվում է մեր երկու երկրների դերն ու բարեկամական ընդհանուր կապը: Հունաստանի Կառավարության պարտականությունն է, այս օրերին գտնվել հայ ժողովրդի կողքին և անել հնարավոր ամեն ինչ, որպեսզի տարբեր երկրների կողմից տարվող գործընթացները Հայոց ցեղասպանությունը տանեն դեպի միջազգային ճանաչման: Եվ թերևս պատահական չէ, որ հույն ժողովուրդը հայերին համարում է իր եղբայրը»,- նշեց Զոյի Կոնստանտապուլոսը՝ հավելելով, որ Հունաստանում հայ համայնքը ակտիվ կյանք է վարում:

ԵՊՀ ռեկտորը, դիմելով հունարեն ուսումնասիրող ուսանողներին, հորդորեց, որ լավ սովորեն, քանի որ տարիներ անց հենց նրանց մեջ են լինելու այն շրջանավարտները, որոնք դասավանդելու են եկող սերնդին: Հունարենը լուրջ և միևնույն ժամանակ դժվար լեզու է, իսկ խելացի կադրեր ունենալու դեպքում պարոն Սիմոնյանը չբացառեց նաև, որ ԵՊՀ-ում մագիստրոսական ծրագրեր բացվեն: Տեղեկացնենք նաև, որ արդեն երեք տարի է, ինչ Ռուս բանասիրության ֆակուլտետում գործում է հունարեն լեզվի բաժինը: Բաժնում սովորում են 30 ուսանողներ:

Հայաստանի և Հունաստանի նախագահների կողմից Հունագիտության կենտրոնը Մայր բուհում բացվել է 1999 թ.-ին: Հունագիտության կենտրոնի գրադարանը Հայաստանում ամենամեծն է, որում տեղ են գտել հունական գրականության հին ու ժամանակակից ինչպես գեղարվեստական ստեղծագործությունները, այնպես էլ գիտական ուսումնասիրությունները:

Այլ նորություններ
ՀԱՄԱՊԱՏԱՍԽԱՆ ՔԱՆԱԿԻ ԿՐԵԴԻՏՆԵՐ ՉՀԱՎԱՔԱԾ ԵՎ ՈՒՍՄԱՆ ՎԱՐՁԵՐԸ ՉՎՃԱՐԱԾ ՈՒՍԱՆՈՂՆԵՐԸ ԿՀԵՌԱՑՎԵՆ. ԵՊՀ ՌԵԿՏՈՐԱՏԻ ՆԻՍՏՈՒՄ ԱՄՓՈՓՎԵՑ ՔՆՆԱՇՐՋԱՆԸ
Այսօր ԵՊՀ գիտխորհրդի նիստերի դահլիճում տեղի ունեցավ ռեկտորատի հերթական նիստը, որի ընթացքում ամփոփվեց 2017-2018 ուստարվա երկրորդ կիսամյակի քննաշրջանը:
4 ԴԵԿԱՆՆԵՐԻ ՈՒ 31 ԱՄԲԻՈՆԻ ՎԱՐԻՉՆԵՐԻ ԸՆՏՐՈՒԹՅՈՒՆՆԵՐԻ ՀԱՍՏԱՏՈՒՄ, ՆՈՐ ՊՐՈՖԵՍՈՐՆԵՐ, ԴՈՑԵՆՏՆԵՐ. ԹԵԺ ՔՆՆԱՐԿՈՒՄ՝ ԵՊՀ ԳԻՏԽՈՐՀՐԴՈՒՄ
Այսօր ԵՊՀ գիտխորհրդի նիստերի դահլիճում տեղի ունեցավ գիտխորհրդի հերթական նիստը, որի օրակարգում ընդգրկված էին ութ օրակարգային և մի քանի ընթացիկ հարցեր: