21.10.2021 | 
Հասարակություն
ԴՐԱՄԱՎԱՐԿԱՅԻՆ ՔԱՂԱՔԱԿԱՆՈՒԹՅԱՆ ԾՐԱԳՐԻ ՔՆՆԱՐԿՈՒՄ ԵՊՀ-ՈՒՄ ԿԵՆՏՐՈՆԱԿԱՆ ԲԱՆԿԻ ՆԵՐԿԱՅԱՑՈՒՑԻՉՆԵՐԻ ՀԵՏ
ԴՐԱՄԱՎԱՐԿԱՅԻՆ ՔԱՂԱՔԱԿԱՆՈՒԹՅԱՆ ԾՐԱԳՐԻ ՔՆՆԱՐԿՈՒՄ ԵՊՀ-ՈՒՄ ԿԵՆՏՐՈՆԱԿԱՆ ԲԱՆԿԻ ՆԵՐԿԱՅԱՑՈՒՑԻՉՆԵՐԻ ՀԵՏ
Տնտեսագիտության և կառավարման ֆակուլտետի նախաձեռնությամբ ԵՊՀ-ում այսօր տեղի է ունեցել ՀՀ կենտրոնական բանկի ներկայացուցիչների հետ արդեն ավանդական դարձած հանդիպումը:

Հանդիպմանը ներկա էին ԵՊՀ տնտեսագիտության ֆակուլտետի դեկան Հայկ Սարգսյանը, ՀՀ կենտրոնական բանկի խորհրդի անդամ Հասմիկ Ղահրամանյանը, Դրամավարկային քաղաքականության վարչության պետ Հայկ Ավետիսյանը, Կենտրոնական բանկի ու ֆակուլտետի պրոֆեսորադասախոսական կազմի ներկայացուցիչներ, ուսանողներ:

Մասնակիցներին նախ ողջունեց Հայկ Սարգսյանը՝ նշելով, որ նմանատիպ հանդիպումներն արդեն ավանդույթ են դարձել, Տնտեսագիտության և կառավարման ֆակուլտետի ու Կենտրոնական բանկի համագործակցության շնորհիվ ներկաներն այս անգամ էլ հնարավորություն ունեն ՀՀ կենտրոնական բանկի ներկայացուցիչներից ստանալու իրենց հուզող հարցերի պատասխանները:

 

Հասմիկ Ղահրամանյանը մասնակիցներին ներկայացրեց հանդիպման օրակարգը, որը վերաբերում էր Կենտրոնական բանկի երկու հիմնական նպատակների իրականացման գործընթացին՝ գների կայունության և ֆինանսական կայունության ապահովմանը:

 

 

Այնուհետև Կենտրոնական բանկի ներկայացուցիչ Հայկ Ավետիսյանն անդրադարձավ դրամավարկային քաղաքականության ծրագրին. «Այս ծրագիրն արտացոլում է մեր պատկերացումներն ու դատողությունները թե՛ ներքին տնտեսության, թե՛ արտաքին աշխարհի վերաբերյալ, որի հիման վրա կառուցվում է ԿԲ-ի դրամավարկային քաղաքականությունը»:

 

Նա խոսեց Հայաստանում դրամավարկային քաղաքականության և ֆինանսական կայունության ընթացիկ միտումների մասին, ներկայացրեց ամբողջ աշխարհում ու Հայաստանում համավարակի ստեղծած տնտեսական մարտահրավերները:

 

Բանախոսն անդրադարձավ 2020 թ. մարտահրավերների պայմաններում մակրոտնտեսական միջավայրի յուրահատկություններին, ֆինանսական կայունության ապահովմանն ուղղված միջոցառումներին, ինչպես նաև ճգնաժամային իրավիճակում իրականացված մակրոպրուդենցիալ քաղաքականության առանձնահատկություններին:

Հանդիպման վերջում ներկայացվեց ֆինանսական կայունության հաշվետվությունը, որից հետո տեղի ունեցավ հարցուպատասխան:

Այլ նորություններ
ԲԱՆԱԽՈՍՈՒԹՅՈՒՆ ՄՐՑԱԿՑՈՒԹՅԱՆ ՊԱՇՏՊԱՆՈՒԹՅԱՆ ՀԱՆՁՆԱԺՈՂՈՎԻ ՄԱՍԻՆ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏՈՒՄ
ԵՊՀ իրավագիտության ֆակուլտետի դատական նիստերի դահլիճում կազմակերպվել էր միջոցառում, որի ընթացքում ՄՊՀ անդամ, Իրավագիտության ֆակուլտետի դասախոս, ի.գ.թ.Տիգրան Մարկոսյանը ԵՊՀ իրավագիտության ֆակուլտետի ուսանողներին ներկայացրեց Մրցակցության պաշտպանության հանձնաժողովի գործառույթներն ու լիազորությունները:
«ՉՆԱՅԱԾ ԱՐՏԵՐԿՐՈՒՄ ԱՌԱՋԱՐԿՆԵՐՆ ԱՎԵԼԻ ԳՐԱՎԻՉ ԵՆ, ԲԱՅՑ ՄԵՐԸ ՀԱՅԱՍՏԱՆՆ Է, ՄԵՆՔ՝ ՀԱՅԱՍՏԱՆԻՆԸ». ԱՆԱՀԻՏ ՕՐԲԵԼՅԱՆ
ԵՊՀ աշխարհագրության և երկրաբանության ֆակուլտետի սերվիս բաժնի 3-րդ կուրսի ուսանողուհի Անահիտ Օրբելյանը վստահ է, որ Հայաստանը զբոսաշրջության ոլորտում մեծ ներուժ ունի: Երիտասարդ համալսարանականն ունի իր տեսլականը պետության զարգացման համար, որի առանցքային տարրը երիտասարդն է՝ հայրենասեր ու նպատակասլաց: