18.01.2007 | 
Հասարակություն
ԳԻՏԱԿԱՆ ԳՐԱԴԱՐԱ՞Ն, ԹԵ՞ ԳՐՔԵՐԻ ԹԱՆԳԱՐԱՆ
ԳԻՏԱԿԱՆ ԳՐԱԴԱՐԱ՞Ն, ԹԵ՞ ԳՐՔԵՐԻ ԹԱՆԳԱՐԱՆ
ԵՊՀ գիտական գրադարանի ընթերցասրահն աշխատում է 9:00-ից մինչեւ 21:00-ն:

Ինֆորմատիկայի եւ կիրառական մաթեմատիկայի ֆակուլտետի ուսանող Ստեփանն ամեն օր` մինչեւ երեկոյան ժամը 7-ը, պարապում է համալսարանի գիտական գրադարանի ճշգրիտ գիտությունների ընթերցասրահում: «Տանը փոքրիկ քույրիկ ունեմ, որ խանգարում է ինձ: Եվ այդ պատճառով գրադրանում եմ պատրաստվում բոլոր քննություններին»,- պատմում է Ստեփանը:

Չնայած ԵՊՀ գրադարանի ընթերցասրահները ամռան ամիսներից սկսած բաց են մինչեւ ժամը 21:00-ն, ուսանողներն ավելի երկար մնալ չեն կարող. ընթերցասրահներում ջերմաստիճանը ձմռան ամիսներին լավագույն դեպքում 9 աստիճան է: Ճշգրիտ գիտությունների ընթերցասրահի գրադարանավար Նառա Համբարձումյանն ասաց, որ իրենք ստիպված են էլեկտրական սալիկներ միացնել ցուրտը մի քիչ կոտրելու համար:

Բայց կոմունալ հարցերը չեն, որ կազմում են ԵՊՀ գիտական գրադարանի խնդիրների ցանկը: Նորամուծությունները բուհի գրադարանում սկսվել են դեռեւս 2006-ի ամռան ամիսներին: Նախ` բոլոր ընթերցասրահներում այսուհետ գործելու է ինքնասպասարկման սկզբունքը: «Ողջ աշխարհում ընդունված է, որ ուսանողն ինքն է փնտրում եւ գտնում իրեն անհրաժեշտ գրքերը, որոնք ոչ թե փակի տակ են, այլ մատչելի են յուրաքանչյուրի համար»,- տեղեկացրեց գրադարանի տնօրեն Աշոտ Ալեքսանյանը:

Ըստ տնօրենի` ԵՊՀ ընթերցասրահներում գտնվող գրքերի 60 տոկոսը չօգտագործվող գրականություն է: «Այդ գրքերը շուտով պիտի փոխարինվեն արվեստաբանության, էկոլոգիայի, հայոց պատմության եւ մի շարք այլ առարկաների նոր գրքերով: Թե չէ հետխորհրդային գրադարանները գրքերի թանգարան են հիշեցնում»,- ասաց Աշոտ Ալեքսանյանը: Նա անդրադարձավ նաեւ գրապահարանների պակասի խնդրին` նշելով, որ համալսարանը պատվիրել է նոր գրապահարաններ ընթերցասրահների համար:

Գրադարանի զարգացման համար շատ կարեւոր է թվայնացումը: Աբոնեմենտի բաժնում շուտով կտեղադրվի 32 համակարգիչ, որոնք ուսանողները կարող են անվճար օգտագործել ինչպես ինտերնետ մուտք գործելու, այնպես էլ իրենց կուրսային, դիպլոմային աշխատանքները մուտքագրելու համար: Պարոն Ալեքսանյանը նշեց, որ շուտով կսկսեն գործել էլեկտրոնային քարտարաններ: «Մենք մշակում ենք գրադարանի տոմսերի նոր տարբերակներ: Դրանք կմուտքագրվեն համակարգիչ, եւ ուսանողը հատուկ գաղտնաբառով կկարողանա տնից գիրք պատվիրել, հետո գալ եւ ստանալ այն: Այսպիսով` մենք կխուսափենք նաեւ թղթաբանությունից,- ասաց տնօրենը:- Դա հասու կլինի 2007-08 ուստարվա բակալավրի եւ մագիստրատուրայի առաջին կուրսեցիներին»:

Առաջիկայում նախատեսվում է Տեմպուս-Տասիս ծրագրի շրջանակներում ԵՊՀ գրադարանը համալրել 400 համակարգիչով: Դրանցից մի քանիսը նախատեսված են կույր ուսանողների համար. ձայնային համակարգով հատուկ ստեղնաշար ունեն:

«Մենք գրադարանի զարգացման ծրագիր ենք մշակել: Աստիճանաբար կլուծենք բոլոր խնդիրները: Պարզապես մոտ 30 տարի կպահանջվի, որ այն դառնա միջազգային չափանիշներին համապատասխան բուհական գրադարան»:

Այլ նորություններ
«ԱՐՑԱԽՅԱՆ ՀԱԿԱՄԱՐՏՈՒԹՅԱՆ ԸՆԿԱԼՄԱՆ ՀԻՄՆԱԽՆԴԻՐՆԵՐԻ ՇՈՒՐՋ» ԽՈՐԱԳՐՈՎ ՔՆՆԱՐԿՈՒՄ ԵՊՀ-Ի ԵՎ ՈՒՐՈՒԳՎԱՅԻ ՀԱՆՐԱՊԵՏՈՒԹՅԱՆ ՀԱՄԱԼՍԱՐԱՆԻ ՄԻՋԵՎ
Երևանի պետական և Ուրուգվայի Հանրապետության համալսարանների միջև այսօր տեղի է ունեցել «Արցախյան հակամարտության ընկալման հիմնախնդիրների շուրջ» խորագրով քննարկում:
«ՑԵՂԱՍՊԱՆՈՒԹՅՈՒՆԸ ԺԱՄԱՆԱԿԱԿԻՑ ԱՇԽԱՐՀՈՒՄ. ՈՒՍՈՒՄՆԱՍԻՐՄԱՆ ՀԵՌԱՆԿԱՐՆԵՐԸ ԵՎ ՄԱՐՏԱՀՐԱՎԵՐՆԵՐԸ». ՏԵՂԻ Է ՈՒՆԵՑԵԼ ԵՌՕՐՅԱ ՄԻՋԱԶԳԱՅԻՆ ԳԻՏԱԺՈՂՈՎ
ԵՊՀ ՀՀԻ ցեղասպանության և այլ զանգվածային ոճրագործություների կանխարգելման և կրթության ՅՈՒՆԵՍԿՕ-ի ամբիոնի նախաձեռնությամբ և ԿԳՄՍ նախարարության գիտական կոմիտեի աջակցությամբ նոյեմբերի 5-7-ը տեղի է ունեցել «Ցեղասպանությունը ժամանակակից աշխարհում. Ուսումնասիրման հեռանկարները և մարտահրավերները» եռօրյա միջազգային առցանց գիտաժողով: