28.11.2008 | 
Գիտություն
ՆՈՐԻՑ ՄԵԾ ԱՍՏՂԱԳԵՏԻ ՄԱՍԻՆ
ՆՈՐԻՑ ՄԵԾ ԱՍՏՂԱԳԵՏԻ ՄԱՍԻՆ
Վիկտոր Համբարձումյանի ծննդյան 100-ամյակին նվիրված ուսանողական գիտաժողովին զեկույցներով հանդես կգան 7 ուսանող:

ԵՊՀ ուսանողական գիտական ընկերությունը եւ Ֆիզիկայի ու Ռադիոֆիզիկայի ֆակուլտետների ուսանողները նոյեմբերի 28-ից դեկտեմբերի 1-ը կանցկացնեն ուսանողական գիտաժողով:

Գիտաժողովին մասնակցում են ոչ միայն Մայր բուհի ուսանողները, այլեւ Բյուրականի աստղադիտարանից հրավիրված մասնագետներ:

Նոյեմբերի 28-ին ԵՊՀ Կոնֆերենց դահլիճում տեղի ունեցավ գիտաժողովի հանդիսավոր բացումը: Բացման խոսքով հանդես եկան Ռադիոֆիզիկայի ֆակուլտետի դեկան Յուրի Վարդանյանը, Աստղաֆիզիկայի ամբիոնի պրոֆեսոր Մուշեղ Ղազարյանը եւ ԵՊՀ ՈՒԳԸ-ի նախագահ Կառլեն Խաչատրյանը:

Յուրի Վարդանյանը կարեւորեց նման նախաձեռնության շարունակությունը, քանի որ նմանաբնույթ գիտաժողովներն անմար են պահում գիտության ասպարեզում մեծ վաստակ ու համբավ ունեցող, աշխարհահռչակ հայորդու` Վիկտոր Համբարձումյանի հիշատակը: 

«Մոտ մեկ ամիս առաջ հենց նույն դահլիճում ձեր ավագ ընկերները` ձեր դասախոսները, նմանօրինակ գիտաժողով էին կազմակերպել: Սիրելի´ ուսանողներ, ձեր ընտրած մասնագիտությունը հնարավորություն է տալիս շփվելու ողջ տիեզերքի հետ, քանի որ ֆիզիկան գիտությունների գիտությունն է: Դուք այսօր հնարավորություն ունեք զբաղվելու գիտական գործունեությամբ,եւ գիտության ասպարեզում առկա խոչընդոտները թող երբեք ձեզ չվախեցնեն, այլեւ ուժ ու համառություն հաղորդեն ամուր քայլերով առաջ շարժվելու համար»,- ասաց Յուրի Վարդանյանը: 

Գիտաժողովի ընթացքում կարդացած զեկույցների հիմնական թեմաներն էին` «Ակտիվ գալակտիկաների ռադիո եւ ինֆրակարմիր բնութագրերը», «Հեռավոր (z>1) ռադիոգալակտիկաների ուսումնասիրությունը», «Քվարկային աստղերը որպես նոր տիպի գերխիտ երկնային մարմիններ»:

Շնորհավորելով գիտաժողովի մասնակիցներին` ԵՊՀ ՈՒԳԸ-ի նախագահ Կառլեն Խաչատրյանը ավելացրեց. «Նմանաբնույթ գիտաժողովները եւս մեկ անգամ հաստատում են, որ մեր երկրում ամենեւին էլ գիտությունը չի մահանում, ավելին` այն զարգանում է, ինչպես օրինակ` մեր շախմատի արքաների փայլուն հաղթանակը»:

Ի դեպ, նոյեմբերի 29-ին գիտաժողովի մասնակիցները կլինեն Բյուրականում, կայցելեն աստղադիտարան, կլսեն դասախոսություններ, իսկ դեկտեմբերի 1-ին ԵՊՀ-ում տեղի կունենա Վիկտոր Համբարձումյանի ծննդյան 100-ամյակին նվիրված գիտաժողովի փակումը, որի ընթացքում մասնակիցները կպարգեւատրվեն պատվոգրերով:

Այլ նորություններ
«ՔՐԴԱԳԻՏԱԿԱՆ ՀԵՏԱԶՈՏՈՒԹՅՈՒՆՆԵՐ»․ ԳԻՏԱԺՈՂՈՎ ԵՎ ԳՐՔԻ ՇՆՈՐՀԱՆԴԵՍ ԵՊՀ-ՈՒՄ
ԵՊՀ Պալեանների անվան դահլիճում այսօր տեղի է ունեցել «Քրդերն ու Իրաքյան Քուրդիստանը տարածաշրջանային զարգացումների համատեքստում» խորագրով գիտաժողով:
ԵՊՀ ԱՍՊԻՐԱՆՏՆԵՐԸ՝ ԳԻՏՈՒԹՅԱՆ ԿՈՄԻՏԵԻ ՀԱՅՏԱՐԱՐԱԾ ՄՐՑՈՒՅԹԻ ՀԱՂԹՈՂ
Դեռևս մայիսին ՀՀ ԿԳՄՍՆ գիտության կոմիտեն կազմակերպել էր գիտական և գիտատեխնիկական գործունեության պայմանագրային (թեմատիկ) ֆինանսավորման նպատակով գիտական թեմաների հայտերի ընտրության «Ասպիրանտների և երիտասարդ հայցորդների հետազոտությունների աջակցության ծրագիր-2020» մրցույթը: