18.11.2022 | 
Ուսանողական, Կրթություն
«ԵՊՀ-ՈՒՄ ՍՏԱՑԱԾ ԿՐԹՈՒԹՅՈՒՆՍ ՎԱՂԵՄԻ ՆՊԱՏԱԿՆԵՐՍ ԿՅԱՆՔԻ ԿՈՉԵԼՈՒ ԳՐԱՎԱԿԱՆՆ Է». ՀԵՂԻՆԵ ՆԱՎԱՍԱՐԴՅԱՆ
«ԵՊՀ-ՈՒՄ ՍՏԱՑԱԾ ԿՐԹՈՒԹՅՈՒՆՍ ՎԱՂԵՄԻ ՆՊԱՏԱԿՆԵՐՍ ԿՅԱՆՔԻ ԿՈՉԵԼՈՒ ԳՐԱՎԱԿԱՆՆ Է». ՀԵՂԻՆԵ ՆԱՎԱՍԱՐԴՅԱՆ
Հեղինե Նավասարդյանը ԵՊՀ ինֆորմատիկայի և կիրառական մաթեմատիկայի ֆակուլտետի ուսանող է: Նրա հետ զրուցել ենք համալսարանում ստացած կրթության կարևորության, նպատակների, հաջողության հասնելու ճանապարհի և այլ թեմաների վերաբերյալ:

Պատմում է Հեղինեն:

 

Ոլորտում առաջատար մասնագետ լինելու համար կարևոր է ակադեմիական կրթություն ստանալը:

 

Ակադեմիական կրթությունն ինձ օգնում է լինել ոլորտում ավելի ինքնավստահ և մրցունակ մասնագետ: Ինֆորմատիկայի և կիրառական մաթեմատիկայի ֆակուլտետում կրթություն ստանալուն զուգահեռ՝ աշխատում եմ որպես ծրագրավորող, սակայն հետագայում ինձ տեսնում եմ կրթության և գիտության ոլորտում: Արդեն իսկ սկսել եմ որոշակի քայլեր կատարել այդ ուղղությամբ:

 

 

ԵՊՀ-ում ստացած կրթությունս վաղեմի նպատակներս կյանքի կոչելու գրավականն է։

 

Ինֆորմատիկայի և կիրառական մաթեմատիկայի ֆակուլտետում ստացած մասնագիտական խոր գիտելիքները նպատակիս իրականացման համար առաջին քայլը կատարելու համարձակություն տվեցին: Իմ նախաձեռնությամբ և համակուրսեցիներիս օգնությամբ այժմ դպրոցականներին սովորեցնում ենք ծրագրավորում, օգնում ենք մասնագիտական կողմնորոշման հարցում և փորձում ձևավորել, այսպես ասած, երազանքները նպատակ դարձնելու, և, ի վերջո, դրանք իրագործելու բնավորություն: Հարազատ ֆակուլտետում ստացած հիմնային գիտելիքներս փոխանցում եմ երեխաներին ու նրանց մեջ սերմանում ակադեմիական կրթություն ստանալու կարևորության գիտակցումը: Այդպիսով ես ամեն օր մոտենում եմ իմ երազանքների իրականացմանը:

 

Աշխատանքների պլանավորման գործում ինքնուրույնությունս թերևս պայմանավորված է նրանով, որ մինչ համալսարան ընդունվելը բազմիցս մասնակցել եմ կամավորական աշխատանքների, դասընթացների, ծրագրերի, դասավանդել եմ մարզերի դպրոցներում:

 

 

Սիրում եմ միաժամանակ մի քանի բանով զբաղվել:

 

Սովորելուն, աշխատելուն ու դասավանդելուն զուգահեռ՝ գիտական գործունեություն եմ ծավալում: Այնուամենայնիվ, իմ ունեցածն ինձ չի բավարարում․ միշտ ձգտում եմ ավելիին՝ նաև գիտության մեջ նպաստ ունենալու համար:

 

Հավատում եմ, որ յուրաքանչյուրիս կատարած փոքր գործն աշխարհն ավելի լավը կդարձնի:

 

Հաջողություններս կապում եմ ամենօրյա, անտրտունջ, առանց ընկճվելու և հոգնելու՝ աշխատանք կատարելու հետ: Ինձ առաջ են մղում միտքս ու երևակայությունս. երբ ինչ-որ բան պարզորոշ պատկերացնում եմ, կյանքում ավելի հեշտ է ստացվում մտածածս կյանքի կոչելը: Վստահ եմ՝ հաջողության հասնելու և ցանկալի արդյունք գրանցելու համար պետք է սիրել սեփական աշխատանքը։

 

Կարինե Հովհաննիսյան

Այլ նորություններ
«ՄՐՑՈՒՅԹՆԵՐՆ ՈՒՍԱՆՈՂԻ ՀԱՄԱՐ ՀԻԱՆԱԼԻ ԱՌԻԹ ԵՆ ՎԵՐԱՐԺԵՎՈՐԵԼՈՒ ՍԵՓԱԿԱՆ ԿԱՐՈՂՈՒԹՅՈՒՆՆԵՐԸ». ԱՇՈՏ ՄԿՐՅԱՆ
ԵՊՀ հայ բանասիրության ֆակուլտետի ուսանող Աշոտ Մկրյանը մագիստրոսի կրթական ծրագրով «Լավագույն ուսանող» հանրապետական մրցույթի հայագիտական ոլորտում 2-րդ տեղի մրցանակակիր է: Աշոտի հետ զրույցը ուղենշում է, թե ինչ ճանապարհ է անհրաժեշտ անցնել լավագույն ուսանող ճանաչվելու համար:
ԻՆՉՊԵ՞Ս ԴԻՄԵԼ «ԷՐԱԶՄՈՒՍ+» ՓՈԽԱՆԱԿՄԱՆ ԾՐԱԳՐԻՆ. ՈՒՂԵՑՈՒՅՑ
ԵՊՀ ուսանողներն ու ասպիրանտները յուրաքանչյուր կրթական աստիճանում հնարավորություն ունեն մեկ անգամ մասնակցելու «Էրազմուս+» փոխանակման ծրագրին և կրթություն ստանալու եվրոպական մի շարք բուհերում։ Ընդհանուր ուսումնառության ժամկետը չի կարող լինել 3 ամսից պակաս և 12 ամսից ավելի: