21.11.2022 | 
Ուսանողական, Կրթություն
«ԵՊՀ ՖԱՐՄԱՑԻԱՅԻ ԻՆՍՏԻՏՈՒՏ ԸՆԴՈՒՆՎԵԼԸ ԽՈՍՏՈՒՄՆԱԼԻՑ ԱՊԱԳԱ ՈՒՆԵՆԱԼՈՒ ԵՐԱՇԽԻՔՆԵՐԻՑ Է». ՍՈՆԱ ԵԳՈՐՅԱՆ
«ԵՊՀ ՖԱՐՄԱՑԻԱՅԻ ԻՆՍՏԻՏՈՒՏ ԸՆԴՈՒՆՎԵԼԸ ԽՈՍՏՈՒՄՆԱԼԻՑ ԱՊԱԳԱ ՈՒՆԵՆԱԼՈՒ ԵՐԱՇԽԻՔՆԵՐԻՑ Է». ՍՈՆԱ ԵԳՈՐՅԱՆ
ԵՊՀ ֆարմացիայի ինստիտուտի ուսանողներից է Սոնա Եգորյանը: Մեզ հետ զրույցում նա պատմել է մասնագիտության ընտրության, ֆարմացիայի ինստիտուտի ընձեռած հնարավորությունների, ստացած գիտելիքներն աշխատանքում կիրառելու և իր նպատակների մասին:

Պատմում է Սոնան:

 

Մասնագիտությանս հանդեպ սերը ձևավորվել է ուսումնառության ընթացքում, երբ բացահայտեցի ֆարմացիայի առանձնահատկությունը։

 

Առհասարակ մասնագիտություն ընտրելիս պետք է հաշվի առնես ընդունակություններդ, կարողություններդ և հետաքրքրություններիդ շրջանակը: Անկեղծորեն նշեմ, որ ֆարմացիայի ինստիտուտում որոշել եմ սովորել՝ առաջնորդվելով ինստիտուտում սովորող ընկերներիս բարձր գնահատականով ու դրական կարծիքով: Հինգ տարի անց վստահաբար կարող եմ ասել՝ դա իմ լավագույն որոշումն էր. այսօր մասնագիտական կողմնորոշման նպատակով ես եմ մտերիմներիս խորհուրդ տալիս ընդունվել ԵՊՀ ֆարմացիայի ինստիտուտ:

 

 

ԵՊՀ ֆարմացիայի ինստիտուտ ընդունվելը խոստումնալից ապագայի երաշխիքներից է:

 

Ինստիտուտը հնարավորությունների լայն շրջանակ է ստեղծում, և այն ավարտելով՝ դառնում ես պահանջված և մրցունակ մասնագետ: Սովորելով այստեղ՝ ձեռք ես բերում Հայաստանում արդիական ոլորտի՝ դեղագործության վերաբերյալ գիտելիքների մեծ պաշար, հնարավոր դարձնում դեղերի շուկայում շրջանառվող մի շարք խնդիրների լուծումներ և այլն: Այս ամենից զատ՝ ինստիտուտում գործում են Դեղապատրաստուկների որակի հսկման և մոնիթորինգի գիտաուսումնական կենտրոնի լաբորատորիան և Ֆարմացիայի ինստիտուտի գիտահետազոտական կենտրոնը, ինչպես նաև առկա է դեղատան մոդել։ Ստեղծված պայմանները հնարավորություն են տալիս ուսանողներին ունենալու համակողմանի գիտելիքներ դեղերի որակի վերահսկողության և ապահովման մասին, ուսման պրոցեսին զուգընթաց՝ իրականացնելու հետազոտական տարբեր աշխատանքներ, և, իհարկե, ծանոթանալու դեղատան գործունեությանը։

 

 

 

Ընդունվելով ԵՊՀ՝ քայլ առ քայլ մոտենում ես սահմանածդ նպատակների իրագործմանը:

 

ԵՊՀ-ն ընձեռում է այնպիսի հնարավորություններ, որոնք նպաստում են ուսանողների բազմակողմանի զարգացմանը: ԵՊՀ ընդունվելուց առաջ հիմնական նպատակս էր իմ մասնագիտությամբ աշխատելը. դա այսօր իրականություն է։

 

Ֆարմացիայի ինստիտուտի համագործակցության լայն շրջանակը նպաստում է ուսանողների՝ աշխատաշուկա հեշտությամբ մուտք գործելուն:

 

Ինստիտուտն իր գործունեությամբ նպաստում է, որ ուսանողները գտնեն իրենց արժանի տեղը և ունենան մեծ առաջխաղացում մասնագիտական ոլորտում: Դեղատների ցանցերի հետ գործընկերային հարաբերությունները, որոնց շրջանակում պրակտիկա ենք անցնում տարբեր դեղատներում, ևս նպաստում են մեր մասնագիտական աճին։

 

 

Հույս ունեմ՝ իմ գործունեությամբ կնպաստեմ ԵՊՀ զարգացմանն ու առաջընթացին:

 

Նպատակներիցս է մագիստրոսական կրթությունս ավարտելուց հետո, աշխատանքին զուգահեռ, ուսումս շարունակել ասպիրանտուրայում:

Մարինե Մկրտչյան

Այլ նորություններ
«ՄՐՑՈՒՅԹՆԵՐՆ ՈՒՍԱՆՈՂԻ ՀԱՄԱՐ ՀԻԱՆԱԼԻ ԱՌԻԹ ԵՆ ՎԵՐԱՐԺԵՎՈՐԵԼՈՒ ՍԵՓԱԿԱՆ ԿԱՐՈՂՈՒԹՅՈՒՆՆԵՐԸ». ԱՇՈՏ ՄԿՐՅԱՆ
ԵՊՀ հայ բանասիրության ֆակուլտետի ուսանող Աշոտ Մկրյանը մագիստրոսի կրթական ծրագրով «Լավագույն ուսանող» հանրապետական մրցույթի հայագիտական ոլորտում 2-րդ տեղի մրցանակակիր է: Աշոտի հետ զրույցը ուղենշում է, թե ինչ ճանապարհ է անհրաժեշտ անցնել լավագույն ուսանող ճանաչվելու համար:
ԻՆՉՊԵ՞Ս ԴԻՄԵԼ «ԷՐԱԶՄՈՒՍ+» ՓՈԽԱՆԱԿՄԱՆ ԾՐԱԳՐԻՆ. ՈՒՂԵՑՈՒՅՑ
ԵՊՀ ուսանողներն ու ասպիրանտները յուրաքանչյուր կրթական աստիճանում հնարավորություն ունեն մեկ անգամ մասնակցելու «Էրազմուս+» փոխանակման ծրագրին և կրթություն ստանալու եվրոպական մի շարք բուհերում։ Ընդհանուր ուսումնառության ժամկետը չի կարող լինել 3 ամսից պակաս և 12 ամսից ավելի: