28.09.2006 | 
Կրթություն
ԲԱՑՎԵՑ ԺՈՒՌՆԱԼԻՍՏԻԿԱՅԻ ՀԱՅԿԱԿԱՆ ԴՊՐՈՑ
ԲԱՑՎԵՑ ԺՈՒՌՆԱԼԻՍՏԻԿԱՅԻ ՀԱՅԿԱԿԱՆ ԴՊՐՈՑ
Հայաստանի ժուռնալիստիկան միջազգային չափանիշներին մոտեցնելու նոր հնարավորություն ստեղծվեց: Սեպտեմբերի 28-ին Երեւանի պետական համալսարանի ժուռնալիստիկայի ֆակուլտետում կայացավ «Ժուռնալիստիկայի հայկական դպրոց» մագիստրոսական նոր միջազգային ծրագրի շնորհանդեսը:

Ֆակուլտետի դեկան, պրոֆեսոր Գառնիկ Անանյանը, շնորհավորելով առաջին շրջանավարտներին, ասաց. «Մեկ տարի առաջ Ժուռնալիստների միջազգային կենտրոնը հայտարարեց ծրագրի մրցույթ, որը շահեց մեր ֆակուլտետը: Այն երկու տարվա ծրագիր է, առաջին տարին արդեն ավարտեցինք»:

Ծրագրի հիմնական նպատակները երկուսն են` հայաստանյան ժուռնալիստիկան մոտեցնել միջազգային չափանիշներին եւ բազմաթիվ ոչ ժուռնալիստական կրթություն ունեցող ուսանողների պատրաստել իբրեւ պրոֆեսիոնալ լրագրողներ:


Անցյալ տարվա ուսանողները վեցն էին: Նրանք սովորում էին անվճար հիմունքներով: Այս տարի ծրագրում ընդգրկվել են ոչ միայն ժուռնալիստիկայի ֆակուլտետի ուսանողներ, այլեւ այլ դիմորդներ: Նրանք 10 հոգի են: Ծրագրի տեւողությունը երկու տարի է: Դասավանդում են ԱՄՆ-ից, Եվրոպայից եւ ԱՊՀ-ից հրավիրված մասնագետներ: Դպրոցի ուսումնական ծրագիրն ապահովում է Ժուռնալիստների միջազգային կենտրոնը:

Ծրագրի առաջին շրջանավարտներից մեկը` Հասմիկ Մկրտչյանն, ասաց, որ գործնական ժուռնալիստիկա ուսումնասիրելու առումով մագիստրոսական այս ծրագիրն անկրկնելի է: «Սովորեցինք նկարել ինքներս, կարող ենք եւ օպերատոր լինել, եւ մոնտաժը ինքներս անել»: Ուսանողների պատրաստած նյութերը տպագրվել եւ հեռարձակվել են հայաստանյան տարբեր լրատվամիջոցներով:

Հայկական դպրոցի շրջանավարտները ստանում են ինչպես ԵՊՀ ժուռնալիստիկայի ֆակուլտետի մագիստրատուրայի դիպլոմ, այնպես էլ` Ժուռնալիստների միջազգային կենտրոնի կողմից միջազգային ճանաչում ունեցող հավաստագիր:

Առաջին շրջանավարտներին շնորհավորելու էր եկել ԵՊՀ ռեկտոր, պրոֆեսոր Արամ Սիմոնյանը: «Ուզում եմ, որ մեր ժուռնալիստիկայի որակական փոփոխությունների մեջ նկատելի լինի ԵՊՀ ժուռնալիստիկայի ֆակուլտետի ուսանողների դերը: Ամեն ինչ կանենք, որ ձեր ուսումն ընթանա ժամանակին համաքայլ` տեխնիկական բոլոր նոր միջոցների կիրառմամբ»:

Ռեկտորի առաքելությունը, սակայն, այդքանով չէր սահմանափակվում: Ժուռնալիստիկայի ֆակուլտետում բացվեց Մուլտիմեդիա կենտրոն: «Նոր կենտրոն կառուցելու նախագիծը վաղուց էր ներկայացված: Նախկին ղեկավարությունը բարյացակամ էր վերաբերվում, բայց այն ներդրումները, որ կատարվել են, կապվեցին ԵՊՀ նոր ռեկտորի անվան հետ»,- ասաց դեկան Գառնիկ Անանյանը: Կենտրոնում գործում է ռադիոստուդիա, խմբագրություն, հեռուստաստուդիա, եթերային ստուդիա, ձայնագրման ստուդիա, տեղեկատվական կենտրոն, մուլտիմեդիա, համակարգչային կենտրոն:

Այլ նորություններ
ՎԻՐՏՈՒԱԼ ՇՐՋԱՅՑ ՀԱՅԱՍՏԱՆԻ ՊԱՏՄՈՒԹՅԱՆ ԹԱՆԳԱՐԱՆՈՒՄ
ԵՊՀ պատմության ֆակուլտետի ուսանողական գիտական ընկերության և Հայաստանի պատմության թանգարանի համատեղ նախաձեռնությամբ օգոստոսի 3-ին տեղի ունեցավ վիրտուալ շրջայց Հայաստանի պատմության թանգարանում։ Էքսկուրսիան անցկացրեց թանգարանի էքսկուրսիոն բաժնի վարիչ Լիլիթ Հովհաննիսյանը:
ԵՊՀ ՀԱՅ ԲԱՆԱՍԻՐՈՒԹՅԱՆ ՖԱԿՈՒԼՏԵՏԻ ԿԱՐԾԻՔԸ՝ ՀԱՆՐԱԿՐԹՈՒԹՅԱՆ ՊԵՏԱԿԱՆ ԱՌԱՐԿԱՅԱԿԱՆ ՉԱՓՈՐՈՇԻՉՆԵՐԻ ԵՎ ԾՐԱԳՐԵՐԻ ՄԱՍԻՆ
Այս օրերին տեղի են ունենում քննարկումներ «Հայոց լեզու 7-12-րդ դասարաններ» և «Գրականություն 7-12-րդ դասարաններ» հանրակրթության պետական առարկայական չափորոշիչների և ծրագրերի շուրջ: Արտահայտվեցին բազմաթիվ հայագետներ, այդ թվում՝ ԵՊՀ հայ բանասիրության ֆակուլտետի դասախոսներ: Հարցը քննարկվել է նաև ֆակուլտետի գիտխորհրդի նիստում: