19.09.2007 | 
Կրթություն
ԾՐԱԳՐԱՎՈՐՄԱՆ ՆՈՐ ԴԱՍԸՆԹԱՑՆԵՐ
ԾՐԱԳՐԱՎՈՐՄԱՆ ՆՈՐ ԴԱՍԸՆԹԱՑՆԵՐ
ԵՊՀ-ն հայտարարում է ընդունելություն «Տեղեկատվական տեխնոլոգիաներ» (ՏՏ) մասնագիտական վերապատրաստման կրթական ծրագրով:

Երեւանի պետական համալսարանի հետբուհական լրացուցիչ կրթության վարչության ու ԵՊՀ տեղեկատվական տեխնոլոգիաների կրթական եւ հետազոտական նորաստեղծ կենտրոնի նախաձեռնությունը ուսանողներին նշված ոլորտի մասին նոր, ավելի խորը գիտելիքներ տալու նպատակ ունի: 

«Նմանատիպ ծրագրի մասին մենք վաղուց էինք մտածում, բայց չունեինք անհրաժեշտ բազա: Այժմ կա ՏՏ կրթական ու հետազոտական կենտրոնը, որն էլ զբաղվելու է ուսանողների կրթությամբ»,- ասաց ԵՊՀ հետբուհական լրացուցիչ կրթության վարչության պետ Ժասմեն Աղասյանը: 

Նա նշեց, որ ծրագրին կարող են մասնակցել ինֆորմատիկայի բնագավառում բարձրագույն կրթություն ստացած եւ ստացող անձինք, ովքեր ուզում են հարստացնել իրենց գիտելիքները, նաեւ` բուհերի բնագիտական ֆակուլտետների շրջանավարտներ, ովքեր ուզում են մասնագիտանալ ՏՏ ոլորտում: Այսինքն` ծրագիրը միայն ԵՊՀ ուսանողների ու շրջանավարտների համար չէ: 

Ուսուցման ձեւը առկա է: Ուսանողները կարող են յուրացնել 500 ժամ ծավալով ամբողջ ծրագիրը կամ մասնակցել առանձին դասընթացների: Առաջին դեպքում ծրագրի մասնակիցներին կտրվի ներդիրով վկայական, երկրորդ դեպքում` հավաստագիր: 

Պարապմունքները անցկացվելու են ԵՊՀ ՏՏ կրթական ու հետազոտական կենտրոնում, որի ղեկավարն է ֆիզիկամաթեմատիկական գիտությունների դոկտոր, պրոֆեսոր, ՀՀ ԳԱԱ ակադեմիկոս Սամվել Շուքուրյանը: Կրթական ծրագիրը վարելու են ԵՊՀ հեղինակավոր դասախոսներ, տարբեր հետազոտական կազմակերպություններից ու ՏՏ ոլորտին տիրապետող գրասենյակներից հրավիրված մասնագետներ: 

Ծրագիրը ներառում է հետեւյալ դասընթացները` ծրագրավորման հիմունքներ, ծրագրավորման տեխնոլոգիաներ, համակարգային ծրագրավորում, տվյալների բազաների համակարգերի հիմունքներ, տվյալների պահպանման եւ մշակման տեխնոլոգիաներ: 

Ուսուցումը վճարովի է, բայց գործում են զեղչային ճկուն համակարգեր: Դիմողը պետք է ներկայացնի դիմում պրոռեկտորի անունով, կրթության փաստաթղթի պատճենը կամ տեղեկանք ուսումնառության մասին (եթե ուսանող է), անձնագիր եւ 2 լուսանկար: Դասերը կսկսվեն հոկտեմբերի 1-ից: 

Դիմումները ներկայացնել ԵՊՀ հետբուհական լրացուցիչ կրթության վարչություն` հետեւյալ հասցեով. Աբովյան 52, 3-րդ հարկ, 332 սենյակ: Լրացուցիչ տեղեկությունների համար զանգահարել (010) 54 43 97 կամ (091) 45 95 81 կամ գրել jasmenysu@yahoo.fr:

Այլ նորություններ
ՎԻՐՏՈՒԱԼ ՇՐՋԱՅՑ ՀԱՅԱՍՏԱՆԻ ՊԱՏՄՈՒԹՅԱՆ ԹԱՆԳԱՐԱՆՈՒՄ
ԵՊՀ պատմության ֆակուլտետի ուսանողական գիտական ընկերության և Հայաստանի պատմության թանգարանի համատեղ նախաձեռնությամբ օգոստոսի 3-ին տեղի ունեցավ վիրտուալ շրջայց Հայաստանի պատմության թանգարանում։ Էքսկուրսիան անցկացրեց թանգարանի էքսկուրսիոն բաժնի վարիչ Լիլիթ Հովհաննիսյանը:
ԵՊՀ ՀԱՅ ԲԱՆԱՍԻՐՈՒԹՅԱՆ ՖԱԿՈՒԼՏԵՏԻ ԿԱՐԾԻՔԸ՝ ՀԱՆՐԱԿՐԹՈՒԹՅԱՆ ՊԵՏԱԿԱՆ ԱՌԱՐԿԱՅԱԿԱՆ ՉԱՓՈՐՈՇԻՉՆԵՐԻ ԵՎ ԾՐԱԳՐԵՐԻ ՄԱՍԻՆ
Այս օրերին տեղի են ունենում քննարկումներ «Հայոց լեզու 7-12-րդ դասարաններ» և «Գրականություն 7-12-րդ դասարաններ» հանրակրթության պետական առարկայական չափորոշիչների և ծրագրերի շուրջ: Արտահայտվեցին բազմաթիվ հայագետներ, այդ թվում՝ ԵՊՀ հայ բանասիրության ֆակուլտետի դասախոսներ: Հարցը քննարկվել է նաև ֆակուլտետի գիտխորհրդի նիստում: