30.11.2022 | 
Կրթություն, Գիտություն
ԴԻՎԱՆԱԳԵՏԻ ԱՌԱՔԵԼՈՒԹՅՈՒՆՆ ԻՍՊԱՆԻԱՅԻ ԹԱԳԱՎՈՐՈՒԹՅՈՒՆՈՒՄ ՀՀ ԴԵՍՊԱՆԻ ՕՐԻՆԱԿՈՎ. ԱՌՑԱՆՑ ԴԱՍԱԽՈՍՈՒԹՅՈՒՆ ԵՊՀ-ՈՒՄ
ԴԻՎԱՆԱԳԵՏԻ ԱՌԱՔԵԼՈՒԹՅՈՒՆՆ ԻՍՊԱՆԻԱՅԻ ԹԱԳԱՎՈՐՈՒԹՅՈՒՆՈՒՄ ՀՀ ԴԵՍՊԱՆԻ ՕՐԻՆԱԿՈՎ. ԱՌՑԱՆՑ ԴԱՍԱԽՈՍՈՒԹՅՈՒՆ ԵՊՀ-ՈՒՄ
ԵՊՀ միջազգային հարաբերությունների ֆակուլտետում դասավանդվող «Դիվանագիտական գրագրություն (իսպաներեն)» առարկայի շրջանակում ուսանողները մասնակցել են Իսպանիայի Թագավորությունում ՀՀ արտակարգ և լիազոր դեսպան Սոս Ավետիսյանի հետ առցանց դասախոսությանը՝ «Հայ-իսպանական հարաբերությունները և դիվանագիտական ծառայության առանձնահատկությունները» թեմայով։

Հանդիպման նպատակն էր ուսանողներին մասնագիտական նոր գիտելիքներ փոխանցելը:

 

Հանդիպման սկզբում միջազգային հարաբերությունների ֆակուլտետի դեկան Գեղամ Պետրոսյանը դեսպանին ողջունելուց հետո անդրադարձել է ֆակուլտետի ստեղծմանն ու զարգացմանը, որից հետո դեսպանը ներկայացրել է երկու երկրների փոխգործակցության պատմությունն ու հեռանկարները: Նա իր օրինակով ներկայացրել է դիվանագետի առաքելությունը, հիմնական գործառույթները և պարտավորությունները, դիվանագիտական բանակցություններ վարելու, դիվանագիտական արարողակարգի և վարվեցողության առանձնահատկությունները։

 

«Դիվանագիտական գրագրություն (իսպաներեն)» առարկայի դասախոս, ԵՊՀ դիվանագիտական ծառայության և մասնագիտական հաղորդակցման ամբիոնի դոցենտ, բ․գ․թ. Ռուզաննա Պետրոսյանը, շեշտելով, որ առցանց դասախոսությունը ֆակուլտետի ուսանողների և պրոֆեսորադասախոսական կազմի համատեղ աշխատանքի արդյունք է, նշեց․ «Դասախոսությունը կազմակերպելու գաղափարը ստեղծվել է ուսանողների հետ քննարկումների արդյունքում՝ հաշվի առնելով, թե որքան կարևոր են դիվանագետների և հատկապես դեսպանների հետ հանդիպումները: Այնուհետև ֆակուլտետի ղեկավարությունն օժանդակեց հանդիպման կազմակերպման հարցում»։

 

 

Դեսպան Սոս Ավետիսյանը, կարևորելով նմանատիպ հանդիպումներն ու նախաձեռնությունները ուսանողների մասնագիտական կայացման և զարգացման տեսանկյունից, ուսանողներին խորհուրդ տվեց անընդհատ ուսումնասիրել մասնագիտական գրականություն՝ չսահմանափակվելով սակավաթիվ հոդվածներով և, որ ամենակարևորն է, չամաչել հարցեր տալուց, քանզի պրոֆեսիոնալ մասնագետ են դառնում հիմնականում հարցասերները:

 

 

 

ԵՊՀ միջազգային հարաբերությունների ֆակուլտետի ուսանող Թամարա Սարգսյանը, մեզ հետ զրույցում անդրադառնալով կազմակերպված հանդիպման կարևորությանը, նշեց. «Դեսպանի տված խորհուրդները կդառնան մասնագիտական զարգացման կարևոր ուղենիշ և մոտիվացիայի աղբյուր: Հանդիպելով այսօրինակ ձեռքբերումներ ունեցող մասնագետների հետ՝ գիտակցում ենք, որ մեր մասնագիտության մեջ հմտանալու և մեր հայրենիքին արժանի լինելու համար պետք է ձգտենք ավելիին»:

 

 

Նշենք, որ առցանց դասախոսությանը մասնակցել է նաև դեսպանության երրորդ քարտուղար, ԵՊՀ միջազգային հարաբերությունների ֆակուլտետի շրջանավարտ Ժենյա Գյուլբանգյանը։ Ռ. Պետրոսյանի խոսքով՝ վերջինս լավ օրինակ է ուսանողների համար հասկանալու, որ որակյալ կրթության, ջանադիր աշխատանքի և անձնային որակների շնորհիվ նրանցից յուրաքանչյուրը կարող է դառնալ լավ դիվանագետ և մեր երկրի շահերը ներկայացնել այլ պետություններում:

Այլ նորություններ
«ՄՐՑՈՒՅԹՆԵՐՆ ՈՒՍԱՆՈՂԻ ՀԱՄԱՐ ՀԻԱՆԱԼԻ ԱՌԻԹ ԵՆ ՎԵՐԱՐԺԵՎՈՐԵԼՈՒ ՍԵՓԱԿԱՆ ԿԱՐՈՂՈՒԹՅՈՒՆՆԵՐԸ». ԱՇՈՏ ՄԿՐՅԱՆ
ԵՊՀ հայ բանասիրության ֆակուլտետի ուսանող Աշոտ Մկրյանը մագիստրոսի կրթական ծրագրով «Լավագույն ուսանող» հանրապետական մրցույթի հայագիտական ոլորտում 2-րդ տեղի մրցանակակիր է: Աշոտի հետ զրույցը ուղենշում է, թե ինչ ճանապարհ է անհրաժեշտ անցնել լավագույն ուսանող ճանաչվելու համար:
ԻՆՉՊԵ՞Ս ԴԻՄԵԼ «ԷՐԱԶՄՈՒՍ+» ՓՈԽԱՆԱԿՄԱՆ ԾՐԱԳՐԻՆ. ՈՒՂԵՑՈՒՅՑ
ԵՊՀ ուսանողներն ու ասպիրանտները յուրաքանչյուր կրթական աստիճանում հնարավորություն ունեն մեկ անգամ մասնակցելու «Էրազմուս+» փոխանակման ծրագրին և կրթություն ստանալու եվրոպական մի շարք բուհերում։ Ընդհանուր ուսումնառության ժամկետը չի կարող լինել 3 ամսից պակաս և 12 ամսից ավելի: