23.10.2010 | 
Մշակույթ
ՓԱՌԱՏՈՆՈՒՄ` ՈՉ ՊՐՈՖԵՍԻՈՆԱԼՆԵՐԸ
ՓԱՌԱՏՈՆՈՒՄ` ՈՉ ՊՐՈՖԵՍԻՈՆԱԼՆԵՐԸ
Երեկ Համազգային թատրոնում ԵՊՀ «Համալսարանական» թատրոն-ստուդիան ներկայացրեց Աղասի Այվազյանի «Ցուցակը»:

Չնայած ներկայացումը կրում է Աղասի Այվազյանի միայն մեկ ստեղծագործության անունը, բայց այն մի քանի ստեղծագործությունների «խառնուրդ» է: Կոմպոզիցիան մշակել են դրամատուրգի կինը` Գրետա Վերդյան-Այվազյանը եւ ԵՊՀ մշակույթի կենտրոնի տնօրեն Կարինե Դավթյանը: Առաջին անգամ այն բեմադրվել է 2 տարի առաջ` «Այվազյանական ընթերցումների» շրջանակում: Այվազյանի մի քանի գործերի փոքրիկ համադրություն էր, իսկ բուն նյութը վերաբերում էր մեղավոր մարդկությանը:

 

«Զարմանում եմ, թե ինչպես մարդիկ դարեր շարունակ իրենց գործած մեղքերի համար մեղավորներ են փնտրում` չխնայելով անգամ Հիսուսին»,- սկսվեց բեմադրությունը: Գործը պատմում է Հիսուսի` Իեշուայի դեմ աշխատող անտես ուժերի եւ նրանց ձեռքին կամա-ակամա խաղալիք դարձած դավաճանների մասին: Նրանք բոլորը պետք է խաչված Փրկչին վարկաբեկող արտահայտություններ գոռային, քար նետեին նրա վրա: Հանդիսատեսին մեջքով կանգնած ամբոխը նայում է խաչված Հիսուսին: Ամբոխից հերթով դուրս են գալիս Թարսիսը, Ռեբեկան, Հակոբը, Սաղաթելը, Աքազը, Զաքարիան, Հուդան, Ալիծը եւ ծերունին ու պատմում, թե ով ինչ առաքելություն ունի ամբոխի մեջ: «Նրանցից յուրաքանչյուրը լինելիության ցուցակի մեջ է: Ձեզ չի՞ հետաքրքրում այդ անկրկնելի ցուցակը:

 

Մի մեծ ու որոշակի կերպար, ոչ պակաս որոշակի, քան մեր գիտցած Քրիստոսի… Թերեւս հավերժությունը երկու տեր ունի` Քրիստոսը եւ ՑՈՒՑԱԿԸ»,- հանդիսատեսի հետ մտորում է Թարսիսը: Բեմում համալսարանի ուսանողներն էին, ովքեր բոլորովին էլ թատերական կրթություն չունեն: Սակայն հանդիսատես Վալտեր Հակոբյանը զարմացած էր, որ ոչ պրոֆեսիոնալ դերասանները կարողանում են այդքան լուրջ ու համոզիչ խաղալ: Իսկ բեմի լույսը, երաժշտությունն ու դերասանների ձայներն այնքան ազդեցիկ էին, որ մի փոքրիկ աղջնակ մորը նույնիսկ ստիպեց դուրս գալ դահլիճից` պատճառաբանելով, որ վախենում է: «Ներկայացումը ոչ միայն բացահայտում է Այվազյան դրամատուրգին, այլեւ լավագույնս արտացոլում է մեր ժամանակաշրջանը: Շատ բարդ էր անփորձ դերասաններին Այվազյանի արվեստի մի մասնիկը դարձնելը, սակայն մեծ աշխատանքի գնով դա հաջողվեց»,- ասում է ներկայացման ռեժիսոր Կարինե Դավթյանը:

Այլ նորություններ
«ԱՍՏՂԱԶԱՐԴ ԵՐԿԻՆՔՆ ԻՄ ԳԼԽԱՎԵՐԵՎՈՒՄ» ԽՈՐԱԳԻՐԸ ԿՐՈՂ ՀԱՄԵՐԳ՝ ՆՎԻՐՎԱԾ ԼՅՈՒԴՎԻԳ ՎԱՆ ԲԵԹՀՈՎԵՆԻ 250-ԱՄՅԱԿԻՆ
ԵՊՀ մշակույթի կենտրոնում այսօր տեղի ունեցավ Երևանի Կոմիտասի անվան պետական կոնսերվատորիայի Օպերային ստուդիայի՝ «Աստղազարդ երկինքն իմ գլխավերևում» խորագիրը կրող համերգը՝ նվիրված գերմանացի հայտնի կոմպոզիտոր, դաշնակահար, դիրիժոր Լյուդվիգ վան Բեթհովենի 250-ամյակին:
«ՀԻՍՈՒՍ ՔՐԻՍՏՈՍԻ ԿԵՐՊԱՐԸ XX ԴԱՐԻ ԵՎ ԱՐԴԻ ՀԱՅ ԱՐՎԵՍՏՈՒՄ» ԳԻՐՔԸ ՀՈԳԵՎՈՐ ԱՐԺԵՔՆԵՐԻՆ ՄՈՏԵՆԱԼՈՒ ՆՈՐ ՈՒՂԵՆԻՇ
ՀՀ նկարիչների միության մեծ սրահում այսօր տեղի են ունեցել ԵՊՀ հայ արվեստի պատմության և տեսության ամբիոնի դոցենտ, արվեստագիտության թեկնածու Սաթենիկ Վարդանյանի «Հիսուս Քրիստոսի կերպարը XX դարի և արդի հայ արվեստում» գրքի շնորհանդեսը, ինչպես նաև հայ արդի նկարիչների թեմատիկ ստեղծագործությունների ցուցահանդեսը: