07.05.2009 | 
Ուսանողական, Կրթություն, Մշակույթ
ԱՐՎԵՍՏԸ ԲՈՒԺՈՒՄ Է ՀՈԳԻՆ
ԱՐՎԵՍՏԸ ԲՈՒԺՈՒՄ Է ՀՈԳԻՆ
ԵՊՀ կիրառական հոգեբանության կենտրոնում իրականացվում են հոգեթերապեւտիկ տարբեր ուղղությունների թրեյնինգային ծրագրեր:

Մայիսի 7-ին ԵՊՀ կիրառական հոգեբանության կենտրոնի արտ-թերապիայի բազային տեխնիկաներ թրեյնինգային դասընթացներ անցած ուսանողները կազմակերպել էին ցուցահանդես, որտեղ ներկայացրել էին դասընթացի ընթացքում ստեղծված իրենց անհատական եւ խմբակային նկարները, ինչպես նաեւ կենցաղային իրեր, որոնք պատրաստել էին կավի միջոցով:

 

Արտ-թերապիայի բազային տեխնիկաներ թրեյնինգային դասընթացների ընթացքում մասնագետը ստեղծագործական ակտիվացման միջոցով ձեռք է բերում ինքնազարգացման, ինքնաճանաչման, ինքնաարտահայտման հմտություններ, անդրադառնում սեփական ներհոգեկան հույզերի եւ ապրումների բացահայտմանը, ինչը նպաստում է անձի զարգացմանը:

 

Կիրառական հոգեբանության կենտրոնը գործում է 2008 թ-ի հոկտեմբերից եւ նպատակ ունի բնակչությանը մատուցելու խորհրդատվական բնույթի ծառայություններ, աջակցելու Հայաստանում կիրառական հոգեբանության զարգացմանը ու որակի բարձրացմանը եւ հոգեբանությամբ մասնագիտացող ուսանողների մասնագիտական կրթության որակի բարելավմանը: «Գաղտիք չէ, որ Հայաստանում կիրառական հոգեբանությունն այդքան էլ զարգացած չէ, եւ մենք կարիք ունենք արհեստավարժ հոգեբանական աջակցության եւ հոգեբան մասնագետներին պրակտիկ գիտելիքների տրամադրման:

 

Մեր կենտրոնում իրականացվում են հոգեթերապեւտիկ տարբեր ուղղությունների տեսական գիտելիքների եւ գործնական հմտությունների ձեւավորման ու զարգացման թրեյնինգային ծրագրեր»,- ասում է ԵՊՀ կիրառական հոգեբանության կենտրոնի տնօրեն Դավիթ Գեւորգյանը: Դավիթ Գեւորգյանը պատմում է, որ դասընթացներն անցկացվում են 8-12 հոգուց բաղկացած խմբերով, որոնց մասնակցում են հոգեբանության ոլորտում մասնագիտացող ուսանողները, հոգեբան մասնագետները, ինչպես նաեւ հարակից ոլորտների մասնագետները, օրինակ` բժիշկներ, սոցաշխատողներ եւ այլն: Ներկայումս կենտրոնում իրականացվում են թրեյնինգային հետեւյալ դասընթացները` հոգեդինամիկ հոգեթերապիա, հեքիաթաթերապիա, խաղային հոգեթերապիա, կրեատիվության թրեյնինգ, ինքնավերլուծության հմտությունների զարգացում, արտ-թերապիայի բազային տեխնիկաներ եւ այլն:

 

Թրեյնինգային եւ խորհրդատվական աշխատանքներն իրականացվում են կենտրոնի` դասավանդման, հոգեբանական խորհրդատվության եւ խմբակային աշխատանքների ոլորտում փորձ ունեցող եւ վերապատրաստված հմուտ մասնագետների եւ դասախոսների կողմից: ԵՊՀ կիրառական հոգեբանության կենտրոնում նախատեսվում է նաեւ իրականացնել գիտահետազոտական աշխատանքներ կիրառական հոգեբանության տարբեր ոլորտներում, մասնավորապես` բիզնեսի, քաղաքական հոգեբանության, հոգեախտորոշման, HR- եւ PR-մենեջմենթի եւ այլն:

Այլ նորություններ
 ԱՐԻ՛ ԵՊՀ. ՄԵԿՆԱՐԿԵԼ Է «EXPO 2021» ՄԻՋՈՑԱՌՈՒՄԸ
ԵՊՀ մինչհամալասարանական կրթության վարչության նախաձեռնությամբ ԵՊՀ բոլոր ֆակուլտետներում ու ինստիտուտներում մարտի 1-5-ն իրականացվելու են իրազեկող առցանց հանդիպումներ՝ նպաստելու դիմորդների մասնագիտական կողմնորոշմանը և գիտակից ընտրությանը: Միջոցառումն այսօր մեկնարկել է Քիմիայի ֆակուլտետում:
«ԱՍՏՂԱԶԱՐԴ ԵՐԿԻՆՔՆ ԻՄ ԳԼԽԱՎԵՐԵՎՈՒՄ» ԽՈՐԱԳԻՐԸ ԿՐՈՂ ՀԱՄԵՐԳ՝ ՆՎԻՐՎԱԾ ԼՅՈՒԴՎԻԳ ՎԱՆ ԲԵԹՀՈՎԵՆԻ 250-ԱՄՅԱԿԻՆ
ԵՊՀ մշակույթի կենտրոնում այսօր տեղի ունեցավ Երևանի Կոմիտասի անվան պետական կոնսերվատորիայի Օպերային ստուդիայի՝ «Աստղազարդ երկինքն իմ գլխավերևում» խորագիրը կրող համերգը՝ նվիրված գերմանացի հայտնի կոմպոզիտոր, դաշնակահար, դիրիժոր Լյուդվիգ վան Բեթհովենի 250-ամյակին: