19.12.2018 | 
Հասարակություն
ՍԻՐԱՀԱՐՎԵԼ ԵՆ ՈՉ ԹԵ ԴԱՍԱԽՈՍՆ ՈՒ ԻՐ ՈՒՍԱՆՈՂԸ, ԱՅԼ ԱՐՏԱԼՍԱՐԱՆԱԿԱՆ ՇՓՈՒՄՆԵՐ ՈՒՆԵՑՈՂ ՄԱՐԴԻԿ. ԱՄՈՒՍՆԱԿԱՆ ԶՈՒՅԳԻ ՀԱՆԴԻՊՄԱՆ ՃԱԿԱՏԱԳՐԱԿԱՆ ՎԱՅՐԸ ԵՊՀ-Ն ԷՐ
ՍԻՐԱՀԱՐՎԵԼ ԵՆ ՈՉ ԹԵ ԴԱՍԱԽՈՍՆ ՈՒ ԻՐ ՈՒՍԱՆՈՂԸ, ԱՅԼ ԱՐՏԱԼՍԱՐԱՆԱԿԱՆ ՇՓՈՒՄՆԵՐ ՈՒՆԵՑՈՂ ՄԱՐԴԻԿ. ԱՄՈՒՍՆԱԿԱՆ ԶՈՒՅԳԻ ՀԱՆԴԻՊՄԱՆ ՃԱԿԱՏԱԳՐԱԿԱՆ ՎԱՅՐԸ ԵՊՀ-Ն ԷՐ
ԵՊՀ փիլիսոփայության և հոգեբանության ֆակուլտետի դասախոս, Սոցիալական փիլիսոփայության և բարոյագիտության ամբիոնի դոցենտ Արման Ղարագուլյանի և կնոջ՝ Ժուռնալիստիկայի ֆակուլտետում դասավանդող Մանե Մադոյանի հանդիպման ճակատագրական վայրը ԵՊՀ-ն էր:

Ժուռնալիստիկայի  ֆակուլտետը դարձավ մեր սիրո «առաջին վկան»

 

Սեպտեմբերյան մի արևոտ օր, երբ Արման Ղարագուլյանն առաջին անգամ սկսում է աշխատանքը Ժուռնալիստիկայի ֆակուլտետի երկրորդ կուրսում, դասից մի փոքր ուշացած ներս է մտնում Մանեն:

 

«Ես ծանոթանում եմ ուսանողների հետ, պատրաստվում եմ սկսել առաջին դասը, մեկ էլ մի ուսանող բացում է դուռը և կարծես փոշմանած փակում»,- հիշում է Ղարագուլյանը:

 

Շուտով «գաղտնիքը բացվում է»: «Ես իմ պատկերացումներում կերտել էի փիլիսոփայության ավագ դասախոսի կերպար, որը չէր կարող այդքան երիտասարդ լինել, որքան Արմանն էր»,- ժպիտով պարզաբանում է Մադոյանը:

 

Սակայն շուտով Մանեն մտնում է լսարան և «համակերպվում» այն մտքին, որ դասախոսն այդքան երիտասարդ է:

 

Երիտասարդ դասախոսը դառնում է կուրսի ուսանողներից շատերի մոտ ընկերը, հրավիրվում նրանցից մեկի ծննդին, դասից դուրս շփվում և ճանաչում ուսանողներին:

 

Ահա այս շփումներն էլ մտերմացնում են ապագա զույգին:

 

Սիրահարվել են ոչ թե դասախոսն ու իր ուսանողը, այլ արտալսարանական շփումներ ունեցող մարդիկ:

 

«Ես սիրահարվել եմ ոչ թե ընկեր Ղարագուլյանին, այլ լսարանից դուրս իմ մտերիմ ընկերոջը»,- ասում է Մանե Մադոյանը:

 

Հանդիպումները գնալով դառնում են բազմաբնույթ: Զույգի հավաստմամբ, իրենց մտերիմ ընկերներն ավելի շուտ էին հասկացել, որ ընկերական կապը վերաճում է այլ հարաբերությունների, բայց իրենք դա դեռ չէին գիտակցում:

 

«Ճանապարհորդությունները, տարաբնույթ հանդիպումներն ամրացրին մեր կապը, մենք ճանաչեցինք մեկս մյուսին, խոսում էինք ամենատարբեր թեմաներից՝ փիլիսոփայությունից մինչև հեքիաթագրություն»,- փաստում է Մադոյանը:

 

Ահա մի օր էլ Մանեն ստանում է ամուսնության առաջարկություն: 

 

«Ինձ բավական էր Մանեին ճանաչելու այն կարճ ժամանակահատվածը, որ ես ամուսնության առաջարկություն անեի»,- վստահեցնում է Արմանը: 

 

Իսկ Մանեն հավելում է. «Ես ուզում էի սիրել և այնպես սիրել, որ անունս մոռանայի»:

 

«Ձմռան մոտ մեր սերը ծաղկեց»

 

2006 թ. նոյեմբերի 30-ին զույգն օրինականացնում է հարաբերությունները:

 

«Առարկայացած սիրուց երկու տարի անց մենք ամուսնանում ենք»,- ասում է Մանեն:

 

«Մենք նայում ենք նույն ուղղությամբ, նույն գաղափարներն ունենք, նույն նպատակները, միայն թե նպատակներին հասնելու ձևերն են տարբեր»,- նշում է Ղարագուլյանը:

 

Վերջինս կարծում է, որ կնոջ՝ լրագրողի մասնագիտությունը լրացնում է իրեն, իսկ իր մասնագիտությունը՝ նոր բացահայտումներ անում կնոջ համար:

 

«Ժուռնալիստիկայի ֆակուլտետում ինձ ջերմությամբ են ընդունում, դեկանն էլ անընդհատ կրկնում է՝ քեզ աղջիկ եմ տվել»,- ժպիտով պատմում է դոցենտը:

 

 «Ամենահամեղ բիբարով ձվածեղը պատրաստում է Մանեն»

 

Արման Ղարագուլյանի խոսքով, ինքն ուտելու հարցում բծախնդիր չէ, բայց լավագույն ուտեստների շարքում Մանեի պատրաստած «բիբարով ձվածեղն» իր ուրույն տեղն ունի:

Իսկ Մադոյանն էլ պնդում է. «Ես գիտեմ՝ Արմանն ինչ կհավանի, որ ֆիլմը կընտրի, որ գիրքը կընթերցի»:

 

Բայց և այնպես, Մանեն մի տարբերություն է տեսնում. «Ես սիրում եմ առավոտյան վաղ արթնանալ, իսկ Արմանը՝ ոչ, բայց դա իր առանձնահատկությունն ունի. չկա ավելի երանելի պահ, քան արթնանալուն պես տեսնել, թե ինչպես է հանգիստ քնած ընտանիքդ»,- ասում է Մանեն:

«Խաղաղ ընտանիք ունենալը մեզ համար բարձրագույն արժեք է»

 

Զույգի ընտանեկան խաղաղ կյանքի բանաձևը փոխզիջումը, սերն ու հարգանքն է: «Խաղաղությունը պայմանավորված է սիրով և հարգանքով, այլ ոչ թե բուռն կրքերով»,- մեկնաբանում է Մանեն:

 

Ըստ զույգի՝ անլուծելի խնդիրներ չկան, բայց խնդիրները մեծ են թվում, երբ մյուս կողմի համար դրանք նկատելի չեն. «Ինձ համար ամենափոքր խնդիրն անգամ դժվարամարս է, եթե Արմանը դա չի նկատում»:

 

 «Մենք գործի ենք դնում մեր բոլոր ջանքերն ընտանեկան խաղաղ հարկի տակ ապրելու համար»,- փաստում է զույգը:

 

Ամուսինները միասին են արդեն 12 տարի: Երկու գեղեցկագույն աղջիկները, որոնց անունները ¥Արփի, Մարի¤ զույգն ընտրել է երկնային զգացողություն պարգևելու խորհրդով, քաղցրացնում և ջերմացնում են նրանց կյանքը:

Անգին Խաչատրյան

Այլ նորություններ
ԴԱՍԱԴՈՒԼ ԵՊՀ ՄԻՋԱԶԳԱՅԻՆ ՀԱՐԱԲԵՐՈՒԹՅՈՒՆՆԵՐԻ ՖԱԿՈՒԼՏԵՏՈՒՄ
ԵՊՀ միջազգային հարաբերությունների ֆակուլտետի տարբեր կուրսերի ուսանողներ այսօր համալսարանի կենտրոնական մասնաշենքի նախասրահում դասադուլ էին կազմակերպել՝ hաջակցություն Միջազգային հարաբերությունների ֆակուլտետի դեկանի տեղակալ, քաղաքական գիտությունների թեկնածու, դոցենտ Էդգար Քալանթարյանի, որը վերջերս աշխատանքից ազատման դիմում էր ներկայացրել:
ԵՊՀ ԹԻՄԸ ԿՐԿԻՆ ԱՌԱՋԻՆՆ Է ՄԻՋԲՈՒՀԱԿԱՆ ՊԱՅՔԱՐՈՒՄ.  ՏԵՂԻ Է ՈՒՆԵՑԵԼ ԱՄԵՆԱՄՅԱ ԱՐԲԻՏՐԱԺ ԴԱՏԱԽԱՂ-ՄՐՑՈՒՅԹԸ
Մարտի 23-24-ը Հայաստանի ամերիկյան համալսարանում Եվրոպայի խորհրդի և «ԷյԴիԱր փարթներս» ընկերության կողմից կազմակերպված արբիտրաժ դատախաղ-մրցույթին մասնակցել են համալսարանական երկու թիմեր, որոնցից մեկը զբաղեցրել է առաջին հորիզոնականը: