15.04.2019 | 
Գիտություն
ՆՈՐ ԳԻՏԵԼԻՔՆԵՐ, ԱՐԴՅՈՒՆԱՎԵՏ ՔՆՆԱՐԿՈՒՄՆԵՐ ԵՎ ՀԱՃԵԼԻ ԺԱՄԱՆՑ. ԱՆՑԿԱՑՎԵԼ Է «ՓԻԼԻՍՈՓԱՅԱԿԱՆ ԵՎ ՀՈԳԵԲԱՆԱԿԱՆ ԳԻՏԱՀԵՏԱԶՈՏԱԿԱՆ ՃԱՄԲԱՐ 2»-Ը
ՆՈՐ ԳԻՏԵԼԻՔՆԵՐ, ԱՐԴՅՈՒՆԱՎԵՏ ՔՆՆԱՐԿՈՒՄՆԵՐ ԵՎ ՀԱՃԵԼԻ ԺԱՄԱՆՑ. ԱՆՑԿԱՑՎԵԼ Է «ՓԻԼԻՍՈՓԱՅԱԿԱՆ ԵՎ ՀՈԳԵԲԱՆԱԿԱՆ ԳԻՏԱՀԵՏԱԶՈՏԱԿԱՆ ՃԱՄԲԱՐ 2»-Ը
Ապրիլի 12-14-ը Ծաղկաձորի «Համալսարանական» ուսումնաարտադրական բազայում անցկացվեց Փիլիսոփայական և հոգեբանական գիտահետազոտական 2-րդ ճամբարը, որին մասնակցում էին ԵՊՀ ուսանողներ և դասախոսներ:

ԵՊՀ փիլիսոփայության և հոգեբանության ֆակուլտետի ՈՒԳԸ-ի նախաձեռնությամբ տեղի ունեցած գիտահետազոտական ճամբարի նպատակն էր համախմբել գիտությամբ հետաքրքրված փիլիսոփա և հոգեբան ուսանողներին, երիտասարդ գիտնականներին՝ նրանց ավելի մոտեցնելու սեփական մասնագիտությանը և խորացնելու թե՛ տեսական, թե՛ կիրառական գիտելիքները:

 

Մեզ հետ զրույցում ֆակուլտետի ՈԻԳԸ նախագահ Մերի Ազիզյանը փաստեց, որ ճամբարի մասնակիցներին հնարավորություն է տրվել ամբողջովին լինելու մասնագիտական միջավայրում, վարելու մասնագիտական զրույցներ և բանավեճեր գործընկերների հետ։

 

Եռօրյա ճամբարի ընթացքում հոգեբանության ոլորտում քննարկվել են «Հոգեսոմատիկա. պատճառներ և հետևանքներ», «Սեռական հարաբերություններ. հոգեբանական դժվարություններ և վախեր», «Մասնագիտական այրում. առաջացման պատճառներ, կանխարգելում», «Որակական հետազոտություններ կատարելու հմտությունների զարգացում», «Գեշտալտ թերապիայի հիմունքներ» թեմաները, իսկ փիլիսոփայության ոլորտում՝ «Փիլիսոփայական կրթության հայեցակարգեր», «Քննադատական տեսություն», «Ներկա իշխանության որոշ հայեցակարգեր», «Բարոյագիտական պարադոքսներ» և «Բուդդիզմի փիլիսոփայություն» թեմաները:

 

Մերի Ազիզյանը մեզ հետ զրույցում ասաց, որ ճամբարի ընթացքում անցկացվել է նաև կլոր սեղան-քննարկում՝ կրթական և գիտահետազոտական առաջարկներ մշակելու նպատակով. «Քննարկման ընթացքում ուսանողներից կազմված երեք խմբեր մշակեցին բակալավրիատի և մագիստրատուրայի կրթական ծրագրերում առկա խնդիրների լուծման, ինչպես նաև գիտահետազոտական առաջարկություններ»:

 

Ճամբարի վերջին օրն ուսանողները եղել են Կեչառիս եկեղեցական համալիրում և մասնակցել  Ծաղկազարդի տոնին նվիրված միջոցառումներին։

 

Մերի Ազիզյանը փաստեց, որ ճամբարին մասնակից բանախոսներին շատ է դուր եկել միջոցառման ձևաչափը. «Նրանք հույս հայտնեցին, որ ճամբարը շարունակական կլինի և կներառի նաև այլ ձևաչափերով քննարկումներ և այլ թեմաներ: Ուսանողները ևս շատ տպավորված էին: Նշում էին, որ շատ լավ ժամանակ են անցկացրել, ստացել են արժեքավոր մասնագիտական գիտելիքներ և լիցքաթափվել են»։

 

Քնար Միսակյան

Այլ նորություններ
ԵՊՀ-Ն ԵՎ ԻՏԱԼԻԱՅԻ ԼՈՒԻՍՍ ՀԱՄԱԼՍԱՐԱՆԸ ԿԻՐԱԿԱՆԱՑՆԵՆ ՈՒՍԱՆՈՂՆԵՐԻ ՓՈԽԱՆԱԿՄԱՆ ԾՐԱԳՐԵՐ
ԵՊՀ միջազգային հարաբերությունների ֆակուլտետի դեկանի աշխատասենյակում այսօր կազմակերպվել էր հանդիպում Իտալիայի Լուիսս համալսարանի պրոֆեսոր, միջազգային կապերի գծով պրոռեկտոր Ռաֆայել Մարկետտիի հետ:
ԳԻՏՆԱԿԱՆՆԵՐԸ ՔՆՆԱՐԿՈՒՄ ԵՆ ՄԻՋՈՒԿԱՅԻՆ ԵՎ ՌԱԴԻԱՑԻՈՆ ՖԻԶԻԿԱՅԻ ՈՒ ՆՅՈՒԹԱԳԻՏՈՒԹՅԱՆ ՀԻՄՆԱԽՆԴԻՐՆԵՐԸ. ԿՈՆՖԵՐԱՆՍ ԵՊՀ-ՈՒՄ
ԵՊՀ գիտխորհրդի նիստերի դահլիճում այսօր մեկնարկել է «Nuclear and Radiation Physics and Materials» («Միջուկային և ռադիացիոն ֆիզիկա և նյութեր») խորագրով միջազգային քառօրյա կոնֆերանսը: