28.09.2021 | 
Հասարակություն
ԱՊԱԳԱՆ ՀՈԳԵԲԱՆՈՒԹՅԱՆՆ Է. ԴԱՍԱԽՈՍՈՒԹՅՈՒՆ ԵՊՀ ՓԻԼԻՍՈՓԱՅՈՒԹՅԱՆ ԵՎ ՀՈԳԵԲԱՆՈՒԹՅԱՆ ՖԱԿՈՒԼՏԵՏՈՒՄ
ԱՊԱԳԱՆ ՀՈԳԵԲԱՆՈՒԹՅԱՆՆ Է. ԴԱՍԱԽՈՍՈՒԹՅՈՒՆ ԵՊՀ ՓԻԼԻՍՈՓԱՅՈՒԹՅԱՆ ԵՎ ՀՈԳԵԲԱՆՈՒԹՅԱՆ ՖԱԿՈՒԼՏԵՏՈՒՄ
ԵՊՀ փիլիսոփայության և հոգեբանության ֆակուլտետում այսօր տեղի է ունեցել «Կիրառական գիտելիքներ և հմտություններ զարգացման հոգեբանության բնագավառում» թեմայով դասախոսություն, որը վարում էր ԱՄՆ-ից ժամանած լիցենզավորված կլինիկական հոգեբան, Բրաունի համալսարանի դոկտոր Անահիտ Ազարյանը:

Դասախոսությանը, որը կազմակերպել էր ԵՊՀ ընդհանուր հոգեբանության ամբիոնը, ներկա էին ամբիոնի վարիչ Հրանտ Ավանեսյանը, ամբիոնի դասախոսներ, հյուրեր, ուսանողներ:

 

Ողջունելով ներկաներին՝ Հրանտ Ավանեսյանը հյուրերին ներկայացրեց Անահիտ Ազարյանին՝ նշելով, որ նա իր մասնագիտական կյանքի ընթացքում առիթ է ունեցել առերեսվելու բազմաթիվ ճգնաժամերի հետ և կարողացել է մասնագիտական օգնություն ցուցաբերել խոցելի խմբերին:

 

 

Դասախոսության ընթացքում Անահիտ Ազարյանը փաստեց, որ այժմ հոգեբանությունն ամենանորաձև մասնագիտություններից մեկն է դարձել, և մարդիկ ապագան հոգեբանության զարգացման հետ են կապում:

 

«Հարկ է նշել, որ այժմ ամբողջ աշխարհում գնալով ավելի մեծ հեղինակություն է ձեռք բերում հոգեբանի մասնագիտությունը, և բոլոր առաջադեմ համալսարանները մեծ տեղ և նշանակություն են տալիս հոգեբանական հետազոտություններին»,- փաստեց բանախոսը:

 

 

Նրա խոսքով, այս պահին շատ արդիական հարց է, թե, ի վերջո, ինչով են միմյանցից տարբերվում հոգեբանն ու հոգեբույժը:

 

«Երբ մարդը հայտնվում է սթրեսային իրավիճակում, սկզբնական փուլում հոգեբանի օգնությամբ կարող է հաղթահարել խնդիրը, բայց երբ արդեն ամեն ինչ բարդանում է՝ խանգարվում են քունն ու ախորժակը, այդ դեպքում կարող է դիմել հոգեբույժի օգնությանը, որն իրավունք ունի նաև համապատասխան դեղեր նշանակելու»,- բացատրեց Անահիտ Ազարյանը:

 

Նա պատմեց, որ ԱՄՆ-ում ընդունված պրակտիկա է, երբ հոգեբանն ու հոբեբույժը համատեղ ջանքերով փորձում են այցելուին օգտակար լինել:

 

 

Բանախոսն անդրադարձավ նաև արտակարգ իրավիճակներում անձի հոգեբանության դրսևորած 4 փուլերին՝ հերքում, բարկություն, տխրություն, ընդունում:

 

«Դժվար է ասել, թե այս փուլերից յուրաքանչյուրն ինչքան է տևում, բայց մի բան հստակ է՝ դրանք հնարավոր չէ շրջանցել և միանգամից հայտնվել «ընդունում» փուլում»,- ասաց հոգեբանը:

 

Վերջում ներկաները հնարավորություն ունեցան հարցեր տալու և սպառիչ պատասխաններ ստանալու:

 

Անի Պողոսյան

Այլ նորություններ
ՄԱՅՐ ԲՈՒՀԸ ՄՇՏԱՊԵՍ ԿԱՆԳՆԵԼՈՒ Է ԱՐՑԱԽԻ ԿՈՂՔԻՆ. ԵՊՀ-Ի ԵՎ ԱՐՊՀ-Ի ՄԻՋԵՎ ԿՆՔՎԵԼ Է ՀԱՄԱԳՈՐԾԱԿՑՈՒԹՅԱՆ ՆՈՐ ՊԱՅՄԱՆԱԳԻՐ
ԵՊՀ ռեկտորի ժ.պ. Հովհաննես Հովհաննիսյանը և Արցախի պետական համալսարանի ռեկտոր Արմեն Սարգսյանն այսօր ստորագրել են երկու բուհերի միջև համագործակցության նոր պայմանագիր՝ զարգացնելու կրթական, գիտահետազոտական և ուսումնամեթոդական ոլորտներում առկա փոխգործակցությունը:
«ԴՈԿՏՈՐԱԿԱՆ ԿՐԹՈՒԹՅԱՆ ԿԱՐԳԱՎՈՐՄԱՆ ՇՐՋԱՆԱԿԸ». ԵՌՕՐՅԱ ԱՇԽԱՏԱԺՈՂՈՎ՝ ՆՎԻՐՎԱԾ ՀՀ ԱՍՊԻՐԱՆՏԱԿԱՆ ԿՐԹԱԿԱՆ ԾՐԱԳՐԵՐԻ ԲԱՐԵԼԱՎՄԱՆԸ
Ծաղկաձորում մեկնարկել և ընթանում է «Erasmus+» կարողությունների զարգացման ծրագրի «Armdoct» նախագծի շրջանակում կազմակերպված եռօրյա աշխատաժողովը՝ «Դոկտորական կրթության կարգավորման շրջանակը» խորագրով։