03.06.2020 | 
Հասարակություն
ԵՊՀ ՀՈԳԵԲԱՆՈՒԹՅԱՆ ՄԱՍՆԱԳԻՏԱԿԱՆ ԽՈՐՀՈՒՐԴՆ ԱՆՑԿԱՑՆԵԼՈՒ Է ԹԵԿՆԱԾՈՒԱԿԱՆ ԱՏԵՆԱԽՈՍՈՒԹՅՈՒՆՆԵՐԻ ՊԱՇՏՊԱՆՈՒԹՅՈՒՆՆԵՐ
ԵՊՀ ՀՈԳԵԲԱՆՈՒԹՅԱՆ ՄԱՍՆԱԳԻՏԱԿԱՆ ԽՈՐՀՈՒՐԴՆ ԱՆՑԿԱՑՆԵԼՈՒ Է ԹԵԿՆԱԾՈՒԱԿԱՆ ԱՏԵՆԱԽՈՍՈՒԹՅՈՒՆՆԵՐԻ ՊԱՇՏՊԱՆՈՒԹՅՈՒՆՆԵՐ
Այս տարի Երևանի պետական համալսարանի փիլիսոփայության և հոգեբանության ֆակուլտետը դիմել է ՀՀ բարձրագույն որակավորման կոմիտե և ստացել թույլտվություն հոգեբանության մասնագիտական խորհուրդ ձևավորել և անցկացնել թեկնածուական ատենախոսությունների պաշտպանություններ ԺԹ.00.01 մասնագիտությամբ:

Մեզ հետ զրույցում Փիլիսոփայության և հոգեբանության ֆակուլտետի դոցենտ, ԵՊՀ հոգեբանության մասնագիտական խորհրդի քարտուղար Դավիթ Հայրապետյանն ասաց, որ նմանօրինակ խորհուրդ Հայաստանում երկար ժամանակ չկար, բայց կար դրա պահանջարկը. «Շատ ասպիրանտներ շուտով պետք է պաշտպանեն իրենց թեկնածուական աշխատանքները, իսկ դրանք կազմակերպելու համար Երևանի պետական համալսարանը դիմել է ԲՈԿ և ստացել թույլտվություն։ Հոգեբանության մասնագիտական խորհուրդը կարելի է ասել միջբուհական է»:

 

Դոցենտը պարզաբանեց՝ նշելով, որ ձևավորված խորհրդը կազմված է 8 անդամից, որոնք ՀՀ բարձրագույն ուսումնական տարբեր հաստատությունների պրոֆեսորադասախոսական անձնակազմի անդամներ են, իսկ խորհրդի նախագահն է  ԵՊՀ փիլիսոփայության և հոգեբանության ֆակուլտետի պրոֆեսոր Սվետլանա Հարությունյանը:

 

ԵՊՀ հոգեբանության մասնագիտական խորհրդի քարտուղարի հավաստմամբ, թեկնածուական հայտերի ընդունումն արդեն սկսված է և կրելու է շարունակական բնույթ, իսկ պաշտպանություններն իրականացվելու են խորհրդի ստեղծման օրից առնվազն երկու ամիս անց:

 

 

Այն հարցին, թե հնարավո՞ր է արդյոք արտակարգ դրության պայմաններում կազմակերպել առցանց պաշտպանություն, Դ. Հայրապետյանը պատասխանեց․ «Չեմ կարծում, քանի որ պաշտպանությունը ենթադրում է խորհրդի անդամների փակ, գաղտնի քվեարկություն, իսկ ՀՀ-ում չկան նմանօրինակ քվեարկություն անցկացնելու համար նախատեսված առցանց գործիքներ: Հուսանք, որ մինչև սեպտեմբեր, այսինքն` մինչև պաշտպանությունների սկիզբը, իրավիճակը կփոխվի դեպի լավը, ամեն ինչ կանցկացվի բնականոն հունով»:

 

Նաև նշենք, որ Հոգեբանության մասնագիտական խորհրդի գործունեության ժամկետը սահմանվել է մինչև 2021 թ. դեկտեմբերի 31-ը:

Մասնագիտական խորհուրդների գործունեությանը կարող եք հետևել https://www.bok.am/councils կայքէջում։ 

Մարինա Առաքելյան

Այլ նորություններ
«ԺԱՄԱՆԱԿԱԿԻՑ ԱՇԽԱՐՀՈՒՄ ՄՐՑԱԿՑՈՒԹՅԱՆ ԴՈՄԻՆԱՆՏ ԱՌԱՐԿԱՆ ԱՅԼԵՎՍ ՆՅՈՒԹԱԿԱՆ ՀԻՄՔԸ ՉԷ». ԼԻԼԻԹ ՇԱՔԱՐՅԱՆ
ԵՊՀ սոցիալական աշխատանքի և սոցիալական տեխնոլոգիաների ամբիոնի դասախոս Լիլիթ Շաքարյանը հրատարակել է իր երկրորդ՝ «Հաղորդակցության մարտահրավերները տեղեկատվական հասարակությունում» գիրքը, որտեղ դիտարկվել են տեղեկատվական հեղափոխության դերն ու նշանակությունը մարդկության և հասարակական ոլորտների զարգացման գործընթացում: Տիկին Շաքարյանի հետ զրուցել ենք գրքի, դրանում արծարծված թեմաների ու առաջիկա ծրագրերի մասին:
«ԱՐՑԱԽԸ ԵՎ ՄԻՋԱԶԳԱՅԻՆ ՔՐԵԱԿԱՆ ԴԱՏԱՐԱՆԸ. ՆՈՐ ՀԵՌԱՆԿԱՐՆԵՐ». ԱՌՑԱՆՑ ՍԵՄԻՆԱՐ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏՈՒՄ
ԵՊՀ իրավագիտության ֆակուլտետի ՈՒԳԸ-ի նախաձեռնությամբ տեղի է ունեցել «Արցախը և միջազգային քրեական դատարանը. նոր հեռանկարներ» խորագրով առցանց սեմինար, որը վարել է Միջազգային քրեական դատարանի ավագ դատական ծառայող Էդուարդո Տոլեդոն։