Մեզ հետ զրույցում ԵՊՀ իրավագիտության ֆակուլտետի ՈՒԽ նախագահ Գոհար Ավագյանն ասաց, որ ամեն տարի՝ ուսումնական առաջին կիսամյակից հետո, երբ առաջինկուրսեցիներն արդեն ձեռք են բերում մասնագիտական որոշ գիտելիքներ, նրանց համար կազմակերպվում է վիկտորինա:

Նրա տեղեկացմամբ, միջոցառմանը մասնակցելու համար առաջինկուրսեցիները, ըստ հոսքերի, ձևավորում են խմբեր և մրցում իրար դեմ: Վիկտորինայի հարցերը կազմվում են՝ ըստ ուսումնական առաջին կիսամյակում անցած առարկաների:

Գոհար Ավագյանի խոսքով, հարցերը կազմել են ավագ կուրսերի ուսանողները. «Մասնագիտական ժյուրի չունենք, որովհետև հարցերը կազմվել են այնպես, որ հաղորդավարները տեղում հաշվեն միավորները և որոշեն հաղթող թիմին»:

ԵՊՀ իրավագիտության ֆակուլտետի ՈՒԽ նախագահը մեզ հետ զրույցում փաստեց նաև, որ այս միջոցառումը լավ հնարավորություն է առաջինկուրսեցիների համար՝ ստուգելու յուրացրած գիտելիքները:

«Բացի դրանից՝ առաջինկուրսեցիներն անցած կիսամյակում, կորոնավիրուսով պայմանավորված, դասերն իրականացրել են հեռավար, և այս միջոցառումն առիթ է ուսանողական կյանքն առավել հետաքրքիր դարձնելու և Ուսանողական խորհրդի աշխատանքներին ներգրավելու համար»,- նշեց Գոհար Ավագյանը:

Այսօր տեղի ունեցած մասնագիտական վիկտորինային մասնակցել է 3 թիմ՝ «Էրուդիտ», «Նիկե-63» և «MVV»: Վիկտորինայի երեք փուլերի արդյունքում հաղթող է ճանաչվել «Նիկե-63» թիմը:

Քնար Միսակյան

Կենտրոնի տնօրեն՝ Արմեն Բուդաղյան 

Հասցե՝ Ալեք Մանուկյան 1, ԵՊՀ կենտրոնական մասնաշենք, 402 սենյակ

Հեռ.՝ (+374 60) 710121,
11-21 (ներքին), quality_center@ysu.am