ԵՊՀ ռեկտոր

Արամ Սիմոնյան
Երևանի պետական համալսարանի ռեկտոր, ՀՀ ԳԱԱ թղթակից անդամ, պատմական գիտությունների դոկտոր, պրոֆեսոր, հրապարակախոս:

Ծնվել է 1955 թ., ապրիլի 12, Հայաստանի Հանրապետություն, Սյունիքի մարզ, քաղաք Գորիս։

1972 թ.-ին Արամ Սիմոնյանը ավարտել է Երևանի թիվ 19 միջնակարգ դպրոցը։ 1972 - 1977 թթ. ուսումը շարունակել է Երևանի պետական համալսարանի պատմության ֆակուլտետում։ 1981 թ.-ին ավարտել է Մոսկվայի ԽՍՀՄ ԳԱ ԽՍՀՄ պատմության ինստիտուտի ասպիրանտուրան։

1982 - 1986 թթ. ՀԽՍՀ ԳԱ Պատմության ինստիտուտ` կրտսեր գիտաշխատող, այնուհետև` գիտաշխատող։ 1983 թ. պաշտպանել է թեկնածուական ատենախոսություն։ 1986 - 2000 թթ. ԵՊՀ ԽՍՀՄ պատմության ամբիոնի ասիստենտ, Հայոց պատմության ամբիոնի դոցենտ։ 1993 - 1995 թթ. ԵՊՀ գիտքարտուղար։ 2000 թ. պաշտպանել է դոկտորական ատենախոսություն։ 1995 - 2000 թթ. ԵՊՀ ուսումնական վարչության պետ։ 2005 թ. ստացել է պրոֆեսորի գիտական կոչում։ 2000 - 2006 թթ. ուսումնական աշխատանքների գծով պրոռեկտոր։ 2006 թ. մայիսից ԵՊՀ ռեկտոր։ 2006 թ-ից ՀՀ ԳԱԱ թղթակից անդամ է: 2008 թ. հուլիսի 10-ից ԵՊՀ Հայագիտական հետազոտությունների ինստիտուտի տնօրեն։

Հեղինակ է հարյուրից ավելի գիտական աշխատանքների, որոնցից չորսը մենագրություններ են։ Գիտական հետազոտությունները վերաբերում են հայ ժողովրդի 19-րդ դարի երկրորդ կեսի և 20-րդ դարասկզբի պատմության հիմնահարցերին` մասնավորապես պատմական վիճակագրությանը, արդյունաբերական կապիտալի, ինչպես նաև Արցախի և Զանգեզուրի 1917 - 1921 թթ. պատմության խնդիրներին։ Նրա ղեկավարությամբ պաշտպանվել են 12 թեկնածուական ատենախոսություններ։ Մասնակցել է բազմաթիվ միջազգային և հանրապետական գիտաժողովների։ Բազմիցս հրավիրվել է Իտալիայի, Բելգիայի, Մեծ Բրիտանիայի, Գերմանիայի, Իսպանիայի, ԱՄՆ-ի, Իրանի և աշխարհի մի շարք այլ երկրների գիտակրթական կենտրոններ, որտեղ զբաղվել է գիտակրթական գործունեությամբ։

Արժանցել է «Վաչագան Բարեպաշտ», Մովսես Խորենացի մեդալների եւ ՀՀ գիտության վաստակավոր գործչի կոչման: Ստացել է Ղազախստանի և Թուրքմենիայի պետական պարգևներ:

Լեզուներ` հայերեն, ռուսերեն, անգլերեն։ Ամուսնացած է, ունի երկու դուստր։ Հայաստանի հանրապետական կուսակցության անդամ է։