Մարդու իրավունքները և ժողովրդավարացումը Կովկասում (Մոլդովա)

«Մարդու իրավունքները և ժողովրդավարացումը Կովկասում» տարածաշրջանային մագիստրոսական ծրագիրը հիմնադրվել է 2010 թ. «Ժողովրդավարության և մարդու իրավունքների եվրոպական գործիք» (EIDHR) ծրագրի ֆինանսական աջակցությամբ: Այն մեկամյա (60 կրեդիտ) միջմասնագիտական ծրագիր է, որը ներառում է իրավական, քաղաքագիտական և միջգիտակարգային մոդուլներ:

Այն Եվրահանձնաժողովի ֆինանսական աջակցությամբ հիմնադրված «Մարդու իրավունքները և ժողովրդավարացումը Կովկասում» տարածաշրջանային մագիստրոսական յոթ ծրագրերից մեկն է: Դրանք են՝

• Մարդու իրավունքները և ժողովրդավարացումը Եվրոպայում (Վենետիկ),
• Մարդու իրավունքները և ժողովրդավարացումը Հարավարևմտյան Եվրոպայում (Բոլոնիա, Բոսնիա և Հերցեգովինա),
• Մարդու իրավունքները և ժողովրդավարացումը Աֆրիկայում (Պրետորիա),
• Մարդու իրավունքները և ժողովրդավարացումը Լատինական Ամերիկայում (Բուենոս Այրես),
• Մարդու իրավունքները և ժողովրդավարացումը Ասիա-Խաղաղօվկիանոսյան տարածաշրջանում (Բանգկոկ),
• Մարդու իրավունքները և ժողովրդավարացումը Կովկասում (Երևան),
• Մարդու իրավունքները և ժողովրդավարացումը Միջին Արևելքում (Բեյրութ)։

Ծրագրի շրջանակում ուսումնասիրվում են մարդու իրավունքների և ժողովրդավարացման հիմնախնդիրները Արևելյան գործընկերության և հետխորհրդային այլ երկրներում: Այն նախատեսում է ուսանողների ակադեմիական շարժունություն և դասախոսների փոխանակում, ուսուցողական այցելություններ եվրոպական կառույցներ և մասնակից երկրներ: Ծրագիրն իրականացվում է անգլերենով:

Մարդու իրավունքներ «Գլոբալ Կամպուս» ցանցը, որը համակարգում է Վենետիկի մարդու իրավունքների և ժողովրդավարացման եվրոպական միջհամալսարանական կենտրոնը, այսօր ներառում է ավելի քան 100 համալսարաններ և ունի 300-ից ավելի շրջանավարտներ: «Գլոբալ Կամպուս»-ը սերտորեն համագործակցում է ՄԱԿ-ի, ԵԱՀԿ-ի, Եվրոպական հանձնաժողովի, Եվրոպայի խորհրդի և միջազգային ու տարածաշրջանային այլ կազմակերպությունների հետ։

«Մարդու իրավունքները և ժողովրդավարացումը Կովկասում» տարածաշրջանային մագիստրոսական ծրագիրն իրականացվում է հինգ համալսարանների համագործակցությամբ: Մասնակից համալսարաններն են՝

• Երևանի պետական համալսարան (համակարգող),
• Կիևի Տարաս Շևչենկոյի անվան ազգային համալսարան,
• Թբիլիսիի Իվանե Ջավախիշվիլու անվան պետական համալսարան,
• Մոլդովայի պետական համալսարան,
• Կենտրոնական Ասիայի ամերիկյան համալսարան։

«Մարդու իրավունքները և ժողովրդավարացումը Կովկասում» տարածաշրջանային մագիստրոսական ծրագիրը համագործակցում և իրականացնում է ուսուցում տարածաշրջանի առաջատար համալսարանների` Կիևի Տարաս Շևչենկոյի անվան ազգային, Կենտրոնական Ասիայի ամերիկյան, Մոլդովայի պետական և Թբիլիսիի Իվանե Ջավախիշվիլիի անվան պետական համալսարանների հետ: Ծրագրի բաղկացուցիչ տարրերից է ուսանողների ակադեմիական շարժունությունը: Ուսումնառության ընթացքում յուրաքանչյուր ուսանող ստանում է հնարավորություն ուսանելու համագործակցող երեք համալսարաններից մեկում` մասնագիտանալով քաղաքական, իրավական և այլ ուղղություններով:

Առաջին կիսամյակն անցկացվում է Երևանի պետական համալսարանում:

Երկրորդ կիսամյակն անցկացվում է գործընկեր երեք համալսարաններից որևէ մեկում՝ հիմնված մոդուլի մասնագիտացման վրա.

• իրավական մոդուլը՝ Մոլդովայի պետական համալսարան, Կիևի Տարաս Շևչենկոյի անվան ազգային համալսարան,
• սոցիալ-տնտեսական իրավունքների մոդուլը` Թբիլիսիի Իվանե Ջավախիշվիլու անվան պետական համալսարան,
• միջգիտակարգային մոդուլը՝ Կենտրոնական Ասիայի ամերիկյան համալսարան։

«Մարդու իրավունքները և ժողովրդավարացումը Կովկասում» տարածաշրջանային մագիստրոսական ծրագրի արտադրական և ուսումնական պրակտիկայի տևողությունը կազմում է չորս շաբաթ: Յուրաքանչյուր ուսանող ունի հնարավորություն ընտրելու կամ առաջարկելու իր նախընտրած միջազգային կազմակերպությունը կամ պետական կառույցը, ինչպես Հայաստանում, այնպես էլ գործընկեր երկրներից մեկում:

Ծրագրի ուսանողները իրենց արտադրական պրակտիկան անցնում են ՀՀ արդարադատության և ֆինանսների նախարարություններում, Մարդու իրավունքների պաշտպանի գրասենյակում, «Սեյվ դը չիլդրեն»-ի գրասենյակում, «ՅՈՒՆԻՍԵՖ» միջազգային կազմակերպությունում, ՄԱԿ-ի մարդու իրավունքների գերագույն հանձնակատարի և Ղազախստանում ՄԱԿ-ի գրասենյակներում, Ուկրաինայում ԵՄ պատվիրակությունում, Վրաստանում Եվրոպական և Եվրաատլանտյան ինտեգրման նախարարի գրասենյակում, ինչպես նաև Հայաստանի և գործընկեր երկրների հասարակական կազմակերպություններում:

«Մարդու իրավունքները և ժողովրդավարացումը Կովկասում» մագիստրոսական ծրագիրը բաց է բոլոր այն դիմորդների համար, որոնք՝

• ունեն առնվազն բակալավրի աստիճան,
• տիրապետում են անգլերենին և ռուսերենին,
• ունեն ժողովրդավարության և մարդու իրավունքների թեմաներին առնչվող մասնագիտական հետաքրքրություն։ 

Գիտական, մասնագիտական փորձը վերը նշված բնագավառներում կդիտվի որպես առավելություն։

Առկա են անվճար և վճարովի տեղեր։ Ծրագիրն առաջարկում է սահմանափակ քանակությամբ կրթաթոշակներ, որոնք հոգալու են կեցության ծախսերը հյուրընկալող համալսարանում ուսանելու ժամանակահատվածում:

Ընդունելության, պահանջների և ժամկետների վերաբերյալ առավել մանրամասն տեղեկություններ հնարավոր է գտնել https://regionalmaster.net/ կայքէջում։

Մագիստրատուրայի ընդունելության համար դիմորդները պետք է մուտքագրեն հետևյալ փաստաթղթերը (սքանավորված)․

1. առցանց (online) լրացված հայտադիմում,
2. լուսանկար (3X4 չափսի),
3. դիպլոմ(ներ)ի պատճենները,
4. դիպլոմ(ներ)ի միջուկ(ներ)ի պատճենը և նոտարական թարգմանությունը, եթե այն հայերենով չէ,
5. զինվորական գրքույկի (առկայության դեպքում) բնօրինակը (անհրաժեշտ է ներբեռնել 1-4-րդ և 18-19-րդ էջերը),
6. անձնագիրը (1-4-րդ էջերը) կամ նույնականացման քարտը (երկկողմանի),
7. ինքնակենսագրական (Curriculum Vitae),
8. անգլերենով 2 մոտիվացիոն նամակ՝ ընդունելությանը և կրթաթոշակին վերաբերող (450-600 բառ),
9. Էսսե (Essay, 1500-2000 բառ)
10. ընդունելության ծառայությունների համար գանձվող 3000 դրամի վճարման անդորրագիրը (ԵՊՀ «Արդշինբանկ» ՓԲԸ-ի 2470101276000001 հաշվեհամարին)։

Անհրաժեշտ փաստաթղթերը կցելու համար անցե՛ք հետևյալ հղումով՝ https://regionalmaster.net/application-form/։

Եթե փոխանցումը կատարված է առցանց տարբերակով, և անդորրագրի վրա չեն երևում վճարման նպատակը և դիմորդի անուն-ազգանունը, ապա անհրաժեշտ է ձեռագիր ավելացնել և սքանավորել:

*2023 թ. ԵՊՀ շրջանավարտները (դեռևս դիպլոմ չստացած) պետք է ներկայացնեն ակադեմիական տեղեկագիր՝ կնքված և ստորագրված ֆակուլտետի դեկանի կողմից, իսկ ՀՀ այլ բուհերի՝ 2023 թ. շրջանավարտները (դեռևս դիպլոմ չստացած)՝ տվյալ բուհի ռեկտորի ստորագրությամբ տեղեկանք՝ բակալավրիատի շրջանավարտ լինելու մասին, և ակադեմիական տեղեկագիր՝ կնքված և ստորագրված:
Արտասահմանյան բուհի դիպլոմ ներկայացնելու դեպքում դիմորդը դիպլոմի հետ պետք է ներկայացնի նաև Ակադեմիական փոխճանաչման և շարժունության ազգային տեղեկատվական կենտրոնից տեղեկանք՝ դիպլոմի համարժեքության մասին:

Ընդունելության, պահանջների և ժամկետների վերաբերյալ առավել մանրամասն տեղեկություններ հնարավոր է գտնել https://regionalmaster.net/ կայքէջում։