15.05.2021 | 
Հասարակություն
«ՇԵՂՎՈՂ ՎԱՐՔԻ ՀՈԳԵԲԱՆՈՒԹՅՈՒՆԸ»․ ԲԱՆԱԽՈՍՈՒԹՅՈՒՆ ԵՊՀ-ՈՒՄ
«ՇԵՂՎՈՂ ՎԱՐՔԻ ՀՈԳԵԲԱՆՈՒԹՅՈՒՆԸ»․ ԲԱՆԱԽՈՍՈՒԹՅՈՒՆ ԵՊՀ-ՈՒՄ
ԵՊՀ ՈւԽ իրավական հանձնաժողովը նախաձեռնել և կազմակերպել է հանդիպում ԵՊՀ փիլիսոփայության և հոգեբանության ֆակուլտետի դոցենտ Արթուր Կոբելյանի հետ, որի ընթացքում բանախոսը մասնակիցներին ներկայացրել է շեղվող վարքի հոգեբանությունը։

Մեզ հետ զրույցում ՈւԽ իրավական հանձնաժողովի նախագահ Կարոլինա Հարությունյանը պատմեց, որ հանդիպումը կազմակերպու գաղափարն առաջացել է Ռադիոֆիզիկայի ֆակուլտետի ուսանողների շրջանում, որոնք դիմել են իրեն՝ կազմակերպելու բանախոսություն և ստանալու հարցերի պատասխաններ, թե ինչպես է մարդու հոգեկան ներաշխարհը հանգեցնում հանցավոր վարքագծի, ինչու որոշ անձանց դեպքում այս կամ այն երևույթն ազդում է հանցավոր վարքագծի դրսևորման վրա, իսկ մյուսների դեպքում հանցավոր վարքագիծ չի դրսևորում։

 

«Առաջարկը ստանալուց հետո պարզվեց, որ թեման հետաքրքրում է ԵՊՀ բոլոր ուսանողներին, և որոշեցինք ծրագիրը կազմակերպել ոչ թե ֆակուլտետային, այլ համալսարանական ձևաչափով, որ բոլոր ուսանողները հնարավորություն ունենան ստանալու իրենց հուզող հարցերի պատասխանները»,- ասաց Կարոլինա Հարությունյանը։

 

Հանդիպման ընթացքում, որին մասնակցել է ավելի քան 150 ուսանող, Արթուր Կոբելյանն անդրադարձել է շեղվող վարքի տեսկաներին, հակասոցիալական (դելիկվենտ) և ասոցիալական վարքին, հակասոցիալական վարքի հոգեբանական նախադրյալներին և հետևանքներին, ինչպես նաև կախվածությունների տեսակներին։

 

 

Բանախոսը, պատասխանելով ուսանողների հարցերին, նրանց ներկայացրել է նաև  հանցագործի գենի տեսությունը, Չեզարե Լոմբրոզոյի տեսությունը, հոգեկան առողջության որոշ խնդիրներ, որոնք կարող են ազդել մարդու իրավաչափ և հանցավոր վարքագծի վրա, տարբեր հանցագործությունների հիմքում ընկած հոգեբանական հնարավոր նախադրյալները և այլ թեմաներ։

 

Արթուր Կոբելյանը մեզ հետ զրույցում ասաց, որ բավականին ոգևորիչ է այն հանգամանքը, որ շեղվող վարքի հոգեբանության նկատմամբ կա նման բարձր հետաքրքրվածություն տարբեր մասնագիտություններ ընտրած ուսանողների շրջանում. «Շեղվող վարքի հոգեբանության իմացությունը մասնագետներին թույլ է տալիս կանխել հանցագործությունները, իսկ հասարակությանը՝ իրականացնել հանրային վերահսկողություն»։

 

«Հանդիպումը բավականին հետաքրքիր անցավ նաև ինձ համար, քանի որ մասնակիցներն ակտիվ էին, և հնարավորություն ունեցանք անդրադառնալու շեղվող վարքի տարբեր դրսևորումներին, տեսություններին, քննարկելու ուսանողների տեսակետները։ Հուսով եմ՝ նման հանդիպումները կլինեն շարունակական»,- նշեց հանդիպման բանախոսը։

 

ՈւԽ իրավական հանձնաժողովի նախագահ Կարոլինա Հարությունյանը փաստեց, որ նման հանդիպումների կարևորությունն այն է, որ ուսանողները, որոնք հետագայում ստանձնելու են պետության ու պետականության պահպանման և զարգացման կարևոր առաքելությունը, կհասկանան՝ ինչն է ընկած մարդու վարքագծի, թե ինչու են որոշ դեպքերում մարդիկ դրսևորում այս կամ այն վարքագիծը։

 

«Բացի դրանից՝ ուսանողները կկարողանան հասկանալ, թե ինչն է ընկած շեղվող, հանցավոր վարքագծի հիմքում, որպեսզի հետագայում այն կարողանան կանխել և խափանել»,- հավելեց Կարոլինա Հարությունյանը և վստահեցրեց, որ նման հանդիպումները շարունակական են լինելու։

 

Պատրաստեց Քնար Միսակյանը

Այլ նորություններ
«ՄԵԾԱՊԵՍ ԱՐԺԵՎՈՐՈՒՄ ԵՄ ՇԱՐՈՒՆԱԿԱԿԱՆ ԿՐԹՈՒԹՅՈՒՆԸ, ԵՎ ԵԹԵ ՄԵՆՔ ԿԱՐՈՂԱՆԱՆՔ ՈՒՍԱՆՈՂՆԵՐԻՆ ԱՅԴ ՈՒՂՈՒ ՎՐԱ ԴՆԵԼ, ՄԵՐ ԱՌԱՔԵԼՈՒԹՅՈՒՆԸ ԿԱՐԵԼԻ Է ՀԱՋՈՂՎԱԾ ՀԱՄԱՐԵԼ ». ԼԻԼԻԹ ՍԱՐԳՍՅԱՆ
ԵՊՀ եվրոպական լեզուների և հաղորդակցության ֆակուլտետի անգլերենի թիվ 2 ամբիոնի դոցենտ Լիլիթ Սարգսյանը «Երևանի պետական համալսարանում դասավանդման գերազանցության մրցանակ» ամենամյա մրցույթի բանասիրական անվանակարգի հաղթողներից մեկն է: Տիկին Սարգսյանի հետ զրուցել ենք մանկավարժական ու գիտական գործունեության, կրթության և գիտության ոլորտների հիմնախնդիրների, դրանց լուծման ճանապարհների և այլ թեմաների մասին:
ԵՊՀ ՈՒՍԱՆՈՂԸ ՄԱՍՆԱԿՑԵԼ Է ՄԻՋԱԶԳԱՅԻՆ ՍԵՄԻՆԱՐԻ ԵՎ ԴՐԱ ՇՐՋԱՆԱԿՈՒՄ ԻՐԱԿԱՆԱՑՎԱԾ ՄՐՑՈՒՅԹԻՆ ԶԲԱՂԵՑՐԵԼ ԱՌԱՋԻՆ ՏԵՂԸ
ԵՊՀ աշխարհագրության և երկրաբանության ֆակուլտետի ֆիզիկական աշխարհագրության և ջրաօդերևութաբանության ամբիոնի 4-րդ կուրսի ուսանող Գոռ Խաչատրյանն իր գիտական ղեկավարի հետ մասնակցել է որակավորման բարձրացման սեմինարի և դրա շրջանակում տեղի ունեցած մրցույթին զբաղեցրել առաջին հորիզոնականը: