16.11.2018 | 
Հասարակություն
ՀԱՄԱԼՍԱՐԱՆԱԿԱՆՆԵՐԸ՝ ՀՐԱԶԴԱՆԻ N10 ԵՎ N13 ԱՎԱԳ ԴՊՐՈՑՆԵՐՈՒՄ
ՀԱՄԱԼՍԱՐԱՆԱԿԱՆՆԵՐԸ՝ ՀՐԱԶԴԱՆԻ N10 ԵՎ N13  ԱՎԱԳ ԴՊՐՈՑՆԵՐՈՒՄ
Հրազդանի N10 և N13 ավագ դպրոցներն այսօր հյուրընկալեցին ԵՊՀ պրոֆեսորադասախոսական կազմի ներկայացուցիչներին:

Հիշեցնենք, որ ԵՊՀ մինչհամալասարանական կրթության վարչության նախաձեռնությամբ իրականցվող դասախոսների մարզային այցելությունները, ինչպես նաև աշակերտների հյուրընկալությունները ԵՊՀ-ում նպաստում են դիմորդների մասնագիտության կողմնորոշմանը:

Երկու դպրոցներում էլ համալսարանականներն ավարտական դասարանների աշակերտների համար դասախոսություններ կարդացին՝ փոխանցելով մասնագիտական գիտելիքներ:

Հրազդանի N 10 ավագ դպրոց հյուրընկալվել էին Ֆիզիկայի ֆակուլտետի դեկան Ռաֆիկ Հակոբյանը, Մաթեմատիկայի և մեխանիկայի ֆակուլտետի ընդհանուր մաթեմատիկայի ամբիոնի դոցենտ Կարեն Սահակյանը, Հայ բանասիրության ֆակուլտետի հայ նորագույն գրականության ամբիոնի ասիստենտ Սևակ Ղազարյանը, Հայոց լեզվի ամբիոնի դոցենտ Փառանձեմ Մեյթիխանյանը և Ռոմանագերմանական բանասիրության ֆակուլտետի միջմշակութային հաղորդակցության անգլերենի ամբիոնի դասախոս Աննա Օհանյանը:

Փառանձեմ Մեյթիխանյանն աշակերտներին ներկայացրեց հայերենի փոխառությունների, նորաբանությունների ու օտարաբանությունների վերաբերյալ դասախոսություն: Դասախոսության թեման հետաքրքիր էր աշակերտների համար: Հայոց լեզվի ամբիոնի դոցենտը դասն անցկացրեց տպավորիչ օրինակներով և հարցուպատասխանի ձևաչափով, որի ընթացքում աշակերտները ստացան իրենց հուզող բոլոր հարցերի պատասխանները: Տիկին Մեյթիխանյանը դատարկաձեռն չէր այցելել դպրոց. նա դպրոցին նվիրեց իր հեղինակած բառարանը:

Իսկ միջմշակութային հաղորդակցության նրբություններին ծանոթացրեց Աննա Օհանյանը: Հայ նորագույն գրականության ամբիոնի ասիստենտ Սևակ Ղազարյանն աշակերտներին ներկայացրեց Համո Սահյանի պոեզիայում մարդու և բնության դերը. «Դասախոսությունը չավարտվեց միայն հայ գրականության մեծերի վերաբերյալ քննարկմամբ: Մենք խոսեցինք նաև արտասահմանյան գրականության, ինչպես նաև արդի հիմնախնդիրների մասին»:

Մեզ հետ զրույցում դասախոսները հավելեցին, որ ծրագրային թեմաներից զատ՝ աշակերտներին ներկայացրել են այլ թեմաներ, քննարկել մասնագիտական հիմնախնդիրներն ու դրանց լուծման վերաբերյալ արտահայտել են դիրքորոշումներ:

Հրազդանի N13 ավագ դպրոց այցելել էին Պատմության ֆակուլտետի հնագիտության և ազգագրության ամբիոնի վարիչ Հայկ Ավետիսյանը, Քիմիայի ֆակուլտետի անօրգանական և անալիտիկ քիմիայի ամբիոնի դոցենտ Հայկ Բեգլարյանը, Կենսաբանության ֆակուլտետի կենսաքիմիայի, մանրէաբանության և կենսատեխնոլոգիայի ամբիոնի դոցենտ Ինգա Բազուկյանը և Հայ բանասիրության ֆակուլտետի հայ նորագույն գրականության ամբիոնի դոցենտ Լիլիթ Սեյրանյանը:



Այս դպրոցում ևս մասնագիտական դասախոսություններից բացի՝ ծավալվել են ակտիվ քննարկումներ:

«Հայ բանասիրության զարգացումն անհրաժեշտություն է»,- ընդգծեց Լիլիթ Սեյրանյանն ու նշեց, որ քննարկման կենտրոնում եղել են արդի հայ գրականության հիմնախնդիրները:

Հնագիտական ուսումնասիրություններին անդրադարձել է Հայկ Ավետիսյանը: Ամբիոնի վարիչի խոսքով, աշակերտներից շատերն արդեն հստակ կողմնորոշված էին՝ ինչ մասնագիտություն ընտրել:

 

Անգին Խաչատրյան

Այլ նորություններ
«ԺԱՄԱՆԱԿԱԿԻՑ ԱՇԽԱՐՀՈՒՄ ՄՐՑԱԿՑՈՒԹՅԱՆ ԴՈՄԻՆԱՆՏ ԱՌԱՐԿԱՆ ԱՅԼԵՎՍ ՆՅՈՒԹԱԿԱՆ ՀԻՄՔԸ ՉԷ». ԼԻԼԻԹ ՇԱՔԱՐՅԱՆ
ԵՊՀ սոցիալական աշխատանքի և սոցիալական տեխնոլոգիաների ամբիոնի դասախոս Լիլիթ Շաքարյանը հրատարակել է իր երկրորդ՝ «Հաղորդակցության մարտահրավերները տեղեկատվական հասարակությունում» գիրքը, որտեղ դիտարկվել են տեղեկատվական հեղափոխության դերն ու նշանակությունը մարդկության և հասարակական ոլորտների զարգացման գործընթացում: Տիկին Շաքարյանի հետ զրուցել ենք գրքի, դրանում արծարծված թեմաների ու առաջիկա ծրագրերի մասին:
«ԱՐՑԱԽԸ ԵՎ ՄԻՋԱԶԳԱՅԻՆ ՔՐԵԱԿԱՆ ԴԱՏԱՐԱՆԸ. ՆՈՐ ՀԵՌԱՆԿԱՐՆԵՐ». ԱՌՑԱՆՑ ՍԵՄԻՆԱՐ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏՈՒՄ
ԵՊՀ իրավագիտության ֆակուլտետի ՈՒԳԸ-ի նախաձեռնությամբ տեղի է ունեցել «Արցախը և միջազգային քրեական դատարանը. նոր հեռանկարներ» խորագրով առցանց սեմինար, որը վարել է Միջազգային քրեական դատարանի ավագ դատական ծառայող Էդուարդո Տոլեդոն։