Եվրոպական ուսումնասիրությունների կենտրոն

ԵՊՀ եվրոպական ուսումնասիրությունների կենտրոնը գիտակրթական և գիտահետազոտական  հաստատություն է, որը ստեղծվել է 2006 թվականին Երևանի պետական համալսարանի և Հայաստանում Եվրոպական միության պատվիրակության արդյունավետ համագործակցության արդյունքում: Այսօր կենտրոնը ֆինանսավորվում է Եվրահանձնաժողովի կողմից տրամադրվող ամենամյա ծրագրային դրամաշնորհով:

Որպես ԵՄ ուսումնասիրությունների ոլորտում մասնագիտացած կրթական և գիտահետազոտական հաստատություն՝ կենտրոնն իր առջև նպատակ է դրել միջառարկայական հետազոտությունների, ինչպես նաև կրթական ծրագրերի միջոցով խթանել ՀՀ – ԵՄ համագործակցությունը, նպաստել մարդու իրավունքների պաշտպանությանը, ՀՀ քաղաքական համակարգի ժողովրդավարացմանը և եվրոպական ինտեգրմանը: 

Երևանի պետական համալսարանի եվրոպական ուսումնասիրությունների կենտրոնը առաջարկում է եվրոպագիտության մագիստրոսի աստիճան, միջմասնագիտական մագիստրոսական կրթություն, ակադեմիական շարժունակություն, ինչպես նաև փորձագիտական հետազոտություններին մասնակցելու հնարավորություն:

 Կենտրոնը՝

• իրականացնում է միջմասնագիտական կրթական ծրագրեր,
• կատարում է մարդու իրավունքների, ժողովրդավարացմանը , եվրոպական ուսումնասիրություններին վերաբերող համեմատական հետազոտություններ,
• տալիս  է համաեվրոպական արժեքներին համապատասխան որակյալ և մրցունակ կրթություն,
• խթանում է Հայաստանի եվրոպական ինտեգրման գործընթացի արդյունավետ իրականացմանը,
• հանդիսանում Եվրոպական տեղեկատվական կենտրոն (EUi) Հայաստանում` տրամադրելով մասնագիտական գրականություն ուսանողներին և գիտնականներին,
• իրականացնում է վերապատրաստումներ, կլոր-սեղան քննարկումներ։

 Մեր տեսլականն է Հայաստանը Եվրոպայում, որը ենթադրում է՝

• իրազեկ քաղաքացի,
• քաղաքացիակենտրոնություն,
• գիտելիքահենք կառավարում,
• ակտիվ քաղաքացիական հասարակություն:

Կենտրոնը հաջողությամբ իրականացնում է մագիստրոսական երկու ծրագիր, ինչպես նաև մի շարք հետազոտություններ, արդյունավետ համագործակցում է եվրոպական համալսարանների և գիտահետազոտական կենտրոնների հետ: 

Մարդու իրավունքների և օրենքների գերակայության խթանման կարևորությունը վերաիմաստավորելով և շարունակական մասնագիտական կրթությունը եվրոպական չափանիշներին համապատասխանեցնելու համար կենտրոնի գործունեության բաղկացուցիչներից է նաև վերապատրաստման ծրագիրը։

Կենտրոնը Վարչապետի աշխատակազմի քաղաքացիական ծառայության գրասենյակի և Արդարադատության նախարարության հետ համատեղ իրականացնում է վերապատրաստման դասընթացներ քաղաքացիական ծառայողների, պրոբացիայի և քրեակատարողական ծառայողների համար։

2021 թվականից կենտրոնը Ուկրաինայի դատախազների վերապատրաստման կենտրոնի հետ համատեղ իրականացնում է վերապատրաստման դասընթացներ, կլոր-սեղան քննարկումներ։ Վերապատրաստման դասընթացները իրականացվում են տեղական և միջազգային փորձագետների և դասախոսների ներգրավմամբ։