ԵՊՀ և «Հայկական ծրագրեր» ընկերության միջև կնքված պայմանագրի համաձայն՝ «Հայկական ծրագրեր» ընկերության աշխատակիցների համար 2023-2024 ուստարում ՏՏԿՀ կենտրոնը կազմակերպել է «Օպերացիոն համակարգեր» խորագրով դասընթացը։ Հանդիսավոր արարողությամբ ամփոփվեցին դասընթացի արդյունքները և հավաստագրեր շնորհվեցին մասնակիցներին:
Դասընթացի նպատակն ընկերության աշխատակիցների վերապատրաստումն էր, նոր գիտելիքների և հմտությունների հաղորդումը:
Հավաստագրերի շնորհման արարողությանը ներկա էին ԵՊՀ ակադեմիական/ուսումնական հարցերի գծով պրոռեկտոր Էլինա Ասրիյանը, ՏՏԿՀ կենտրոնի գիտական ղեկավար, ֆ.մ.գ.դ., պրոֆեսոր-էմերիտուս Սամվել Շուքուրյանը:
Դասընթացի մասնակիցներին շնորհավորեց պրոռեկտոր Է. Ասրիյանը՝ կարևորելով բուհ-ձեռնարկություն համագործակցությունը:
Սամվել Շուքուրյանը, շնորհավորելով դասընթացը հաջողությամբ ավարտած մասնակիցներին, հույս հայտնեց, որ դասընթացի շրջանակում ստացած գիտելիքները հիմք կդառնան մասնագիտական աճի համար:
Դասընթացի մասնակից Գևորգ Զանյանը, կարևորելով դասընթացի նշանակությունը, նշեց. «ՏՏԿՀ կենտրոնում «Օպերացիոն համակարգեր» դասընթացին ՀԾ-ի աշխատակիցներս մասնակցում ենք մասնագիտական հմտությունների բարելավման և ոլորտի զարգացումներին համապատասխան գիտելիքներ ձեռք բերելու նպատակով: Դասընթացի ժամանակ ուսումնասիրվում են ոչ միայն համակարգերի աշխատանքի բազային սկզբունքները, այլ նաև նորագույն մոտեցումներն ու ստանդարտները: Դասընթացներն անցնում են բավականին ինտերակտիվ և բովանդակալից՝ գործնական դասընթացի ժամանակ տեսական գիտելիքների կիրառական նշանակության ամրապնդմամբ։ Հատուկ ուշադրություն է դարձվում բոլորի ներգրավվածությանը դասագործընթացին»:
