Սանկտ Պետերբուրգի համալսարանը համարվում է ՌԴ ամենահին բուհը։ Այն հիմնադրվել է Պետրոս Առաջինի օրոք։ 2024 թվականին բուհը դարձավ 300 տարեկան, և հոբելյանական տարեդարձի կապակցությամբ համալսարանում անցկացվում են մի շարք միջոցառումներ։
Ս․թ․ հունիսի 21-ին և 22-ին տեղի ունեցավ «Քրեական դատավարության և կրիմինալիստիկայի գիտական դպրոց» 16-րդ գիտաժողովը, որն այս տարի նվիրված էր համալսարանի 300-ամյակին և համալսարանական նշանավոր գիտնականներին և ժամանակակից քրեական դատավարության հարցերի քննարկմանը:
Գիտաժողովին մասնակցում էին Սանկտ Պետերբուրգի պետական համալսարանի ռեկտոր, ՌԴ ԳԱ թղթակից անդամ Նիկոլայ Կրոպաչովը, Սանկտ Պետերբուրգի համալսարանի իրավագիտության ֆակուլտետի դեկան Սերգեյ Բելովը, Լենինգրադի մարզի իրավաբանների միության նախագահ Դենիս Լակտիոնովը, ինչպես նաև շուրջ 200 գիտնականներ և ուսուցիչներ Ռուսաստանից, Հայաստանից, Ղազախստանից, Ղրղզստանից և Իրաքի Հանրապետությունից։
Բուհի պաշտոնական հրավերով՝ որպես գիտաժողովի պատվավոր հյուրեր և զեկուցողներ Հայաստանից ներկա էին ի.գ.դ., ԵՊՀ պրոֆեսոր-էմերիտուս, ՀՀ ԳԱԱ ակադեմիկոս Գագիկ Ղազինյանը (զեկույցի թեման՝ «Проблемы апелляции и кассации в уголовном процессе Республики Армения») և ԵՊՀ քրեական դատավարության և կրիմինալիստիկայի ամբիոնի վարիչ, պրոֆեսոր Սամվել Դիլբանդյանը (զեկույցի թեման՝ «Правовая природа негласных следственных действий в уголовном судопроизводстве Республики Армения»)։
Գիտաժողովին բացման խոսքով հանդես եկավ Սանկտ Պետերբուրգի պետական համալսարանի ռեկտոր Նիկոլայ Միխայլովիչ Կրոպաչովը։ Նա նշեց․ «Իրավաբանական գիտությունը համալսարանում միշտ զարգացել է այլ ոլորտների և այլ երկրների բուհերի գիտնականների հետ համագործակցությամբ։ Երեք դարերի ընթացքում Սանկտ Պետերբուրգի համալսարանը ձևավորել և զարգացրել է իրավաբանների և քրեագետների պատրաստման յուրահատուկ ավանդույթներ, որոնք այսօր հայտնի են ՌԴ-ում»:
Ռեկտոր հիշեցրեց, որ ուսուցիչների ղեկավարությամբ համալսարանի գիտնականները պատրաստել են ավելի քան հազար հրապարակումներ, որոնք մեծ պահանջարկ ունեն իրավական համայնքի շրջանում։ Դրանցից շատերը ճանաչվել են լավագույնը համալսարանական աշխատանքի համամիութենական մրցույթներում և արժանացել դրական գնահատականների, ինչպես նաև կրթել են երիտասարդ փաստաբանների՝ մեկից ավելի սերունդներ։
Պրոֆեսոր Գագիկ Ղազինյանը, ընդգծելով միջոցառման գիտագործնական նշանակությունը, նշեց , որ միջոցառումը մասնագիտական մեծ կարևորություն ունի և շատ ներկայացուցչական է։
ԵՊՀ պրոֆեսորները Սանկտ Պետերբուրգի համալսարանի իրավագիտության ֆակուլտետի դեկան Սերգեյ Բելովի հետ կայացած հանդիպման շրջանակում նաև պայմանավորվածություն ձեռք բերեցին համաձայնագրի նախագիծ մշակելու և առաջիկայում համագործակցության հուշագիր ստորագրելու վերաբերյալ։
Գիտաժողովի հիմնական զեկույցները ներկայացվեցին կլոր սեղանի շուրջ և նվիրված էին ՌԴ-ում և այլ երկրներում քրեական դատավարության արդի հիմնախնդիրներին։
