Победные результаты ЕГУ в турнире по стрельбе

Առաջնությանը մասնակցում էին ՀՀ 13 բուհերի հավաքական թիմեր։ ԵՊՀ հավաքականի կազմում էին 3 տղա և 3 աղջիկ: Մրցաշարի արդյունքում ընդհանուր հաշվարկով ԵՊՀ հրաձգության հավաքականը գրավեց մրցանակային առաջին տեղը (249 միավոր): Երկրորդ տեղում է Հայաստանի ֆիզիկական կուլտուրայի և սպորտի պետական ինստիտուտի հրաձգության հավաքականը (240 միավոր), իսկ երրորդ տեղում` Հայաստանի պետական տնտեսագիտական համալսարանինը (225 միավոր):

Թիմային մրցաշարից բացի՝ անցկացվեց նաև անհատական առաջնություն, որտեղ ևս ԵՊՀ ուսանողները գրավեցին առաջին և երրորդ հորիզոնականները։

Առանձին անհատական առաջնությունում ԵՊՀ ֆիզիկայի ինստիտուտի 2-րդ կուրսի ուսանողուհի Անի Գաբրիելյանը 44 միավորով գրավեց առաջին մրցանակային տեղը՝ ճանաչվելով որպես Հայաստանի Հանրապետության բուհերի աղջիկների շրջանում լավագույն հրաձիգ: Նա պարգևատրվեց մրցանակային առաջին տեղի մեդալով:

Տղաների անհատական առաջնությունում հետաքրքիր պայքար էր ընթանում. երեք բուհերի ներկայացուցիչներ հավասար միավորներով հավակնում էին դառնալու առաջին տեղի մրցանակակիր, քանի որ բոլորը հավաքել էին 50-ից 45 միավոր: Արդյունքում դիպուկ կրակոցների հաշվարկով ԵՊՀ ինֆորմատիկայի և կիրառական մաթեմատիկայի ֆակուլտետի 4-րդ կուրսի ուսանող Կարեն Գիժլարյանը գրավեց 3-րդ մրցանակային տեղը: 

Թիմային հաշվարկով ԵՊՀ աղջիկների հավաքականը գրավեց մրցանակային առաջին տեղը՝ հավաքելով 226 միավոր: Երկրորդ տեղը զբաղեցրեց Խաչատուր Աբովյանի անվան մանկավարժական համալսարանի աղջիկների հավաքական թիմը՝ 115 միավորով, երրորդ մրցանակային տեղը գրավեց Հայաստանի ֆիզիկական կուլտուրայի և սպորտի պետական ինստիտուտի աղջիկների հավաքական թիմը՝ վաստակելով 111 միավոր: 

Թիմային հաշվարկով առաջին տեղը գրավեց Հայաստանի ֆիզիկական կուլտուրայի և սպորտի պետական ինստիտուտի տղաների հավաքականը (129 միավոր), երկրորդը՝ ԵՊՀ տղաների հավաքական թիմը (123 միավոր), երրորդը՝ Հայաստանի պետական տնտեսագիտական համալսարանինը (116 միավոր): 

Հրաձգության թիմի գրանցած հաղթական արդյունքների մասին զրուցեցինք ԵՊՀ ֆիզիկական դաստիարակության և սպորտի ամբիոնի վարիչ, մարզիչ Վլադիմիր Ավագիմյանցի հետ:

«Այսպիսի հաղթանակներ գրանցում են աշխատասիրության, նվիրվածության շնորհիվ: Եթե դու սիրում ես քո աշխատանքը, այն քեզ համար դառնում է հաճելի, և ձգտում ես փորձդ փոխանցել ուսանողներին: Սիրելի աշխատանքը բերում է այն հաղթական արդյունքներին, ինչը մենք այսօր ունենք»,- նշեց նա:

Խոսելով այս սպորտաձևով մրցաշարին աղջիկների մասնակցության և բարձր արդյունքներ գրանցելու մասին՝ Վ. Ավագիմյանցը նշեց, որ վերջին տարիներին հրաձգության ասպարեզում աղջիկների ակտիվության աճ է նկատվում, նրանք ցանկանում են զբաղվել այդ մարզաձևով, ինչի վառ վկայությունն էլ մրցաշարի արդյունքն է: 

Հավելենք, որ ԵՊՀ-ն հաջողություն է գրանցել նաև ՀՀ ուսանողական մարզական 25-րդ խաղերի՝ շախմատի մրցաշարում։