ԵՊՀ ԴԱՍԱԽՈՍՆԵՐԸ ՇԱՐՈՒՆԱԿՈՒՄ ԵՆ ՀԱՄԱԳՈՐԾԱԿՑԵԼ ԱՐՏԵՐԿՐԻ ԳԻՏԱՇԽԱՏՈՂՆԵՐԻ ՀԵՏ

«BioBlitz Երևան» միջոցառմանը ԵՊՀ-ից մասնակցեցին կենսաբանության ֆակուլտետի՝ կենդանաբանության ամբիոնի վարիչ կ.գ.դ., պրոֆեսոր Մարինե Առաքելյանը, կ.գ.թ., դոցենտ Գեորգի Պապովը և կ.գ.թ., դոցենտ Աստղիկ Ղազարյանը:

Աստղիկ Ղազարյանը, խոսելով «BioBlitz Երևան» միջոցառման կարևորությունից, նշեց. «Այս նախաձեռնությունը հնարավորություն է ստեղծում, որ մի խումբ գիտնականներ, բնագետներ և կամավորներ միասին ուսումնասիրեն տարածքի կենսաբազմազանությունն ու հանձն առնեն դրա պահպանության գործը: Կարելի է ասել, որ այս միջոցառման շրջանակում սովորական քաղաքացին դառնում է գիտնական, և գիտնականների ղեկավարությամբ կատարվում է ուսումնասիրություն»:

Անդրադառնալով ուսանողների՝ միջոցառմանն ունեցած ակտիվ ներգրավվածությանն ու ցուցաբերած գիտելիքներին՝ Ա. Ղազարյանն ընդգծեց. «Ճիշտ է, մեզ թարգմանիչներ էին ուղեկցում, սակայն արտերկրից եկած գիտնականների հետ ուսանողները հիմնականում շփվում էին անգլերենով: Սա նպաստում է ուսանողների՝ մասնագիտական բառապաշարի զարգացմանը և ստեղծում տեսական գիտելիքները պրակտիկայում կիրառելու հնարավորություն»:

Նշենք նաև, որ «BioBlitz Երևան»-ի մասնակիցներին նախապես տրամադրվել էր ժամանակացույց, որով սահմանված էր, թե որ ժամանակահատվածում կենդանիների որ տեսակի ուսումնասիրությունն է կատարվելու:

«BioBlitz Երևան»-ն իրականացավ «CaBol» ծրագրի շրջանակում: «CaBol» ծրագրի նպատակն է ստեղծել Կովկասի ցամաքային ու ջրային բոլոր օրգանիզմների՝ բույսերի, կենդանիների, մանրէների հավաքածուներ: