Ս.թ. սեպտեմբերի 15-ին՝ ժամը 16։00-ին, ԵՊՀ-ում տեղի կունենա նոր ուսումնական տարվա մեկնարկին և առաջինկուրսեցիների ընդունելությանը նվիրված «105-ՐԴ ԲԱՐԵՎԸ» միջոցառումը։
Միջոցառման նպատակն է ծանոթացնել ուսանողներին համալսարանի ընձեռած արտաուսումնական բազմաթիվ հնարավորություններին և օգնել նրանց ստանալ իրենց հետաքրքրող բազմաթիվ հարցերի պատասխանները։ Սա բացառիկ հնարավորություն է հանդիպելու և շփվելու համակուրսեցիների ու այլ ուսանողների, դասախոսների և համալսարանական անձնակազմի հետ։
Միջոցառման շրջանակում ԵՊՀ շարունակական կրթության կենտրոնն առաջարկում է ԵՊՀ քվեսթ՝ ուսանողների և դասախոսների համար:
Մասնակիցները հնարավորություն կունենան խաղի միջոցով ծանոթանալու համալսարանական միջավայրին: Խաղը նրանց համար է, ովքեր սիրում են ինտելեկտուալ թիմային խաղեր և գլուխկոտրուկներ, պատրաստ են շարժման մեջ նորովի բացահայտելու ծանոթ տարածքը:
Քվեսթին մասնակցելու համար անհրաժեշտ է ձևավորել մինչև 10 մասնակիցներից բաղկացած թիմ և գրանցվել մինչև ս.թ. սեպտեմբերի 14-ը:
Հարցերի դեպքում դիմել ԵՊՀ շարունակական կրթության կենտրոն (հեռ.՝ (+374 60) 710 212, էլհասցե՝ postgraduate@ysu.am)։
