ԲԱՐՁՐ ԷՆԵՐԳԻԱՆԵՐԻ ՖԻԶԻԿԱՅԻՆ ՆՎԻՐՎԱԾ ԴԱՍԱԽՈՍՈՒԹՅՈՒՆՆԵՐ ԵՊՀ-ՈՒՄ

Եռամսյա ծրագրի ընթացքում ոլորտի հայ և օտարերկրյա առաջատար մասնագետները մասնակիցներին ներկայացնում են բարձր էներգիաների ֆիզիկայի հիմունքները, ժամանակակից խնդիրներն ու ձեռքբերումները, ընթացիկ և առաջիկա ծրագրերը։ Դասախոսությունների և գործնական վարժությունների նպատակն է խրախուսել մասնակիցների գիտահետազոտական գործունեությունը բարձր էներգիայի ֆիզիկայի ոլորտում։

Ծրագրի շրջանակում Ռուսաստանի միջուկային հետազոտությունների միացյալ ինստիտուտի բարձր էներգիայի ֆիզիկայի լաբորատորիայի ավագ գիտաշխատող Ալեքսեյ Ապարինը և առաջատար ծրագրային ինժեներ Գրիգորի Նիգմատկուլովը Հայաստան են հրավիրվել վերոնշյալ ինստիտուտի` Երևանի տեղեկատվական կենտրոնի փոխգործակցության շնորհիվ։ Երկշաբաթյա այցելության ընթացքում բանախոսները ներկայացրել են բարձր էներգիայի ֆիզիկայում տվյալների մշակման ու վերլուծության մեթոդները և այլ թեմաներ։

Նշենք, որ դասընթացի մասնակից դառնալու հնարավորություն են ունեցել ոչ միայն ուսանողները, այլև թեմայով հետաքրքրված այլ անձինք։ Եռամսյա ծրագիրը հաջողությամբ ավարտած մասնակիցները հնարավորություն կունենան ներգրավվելու ԵՊՀ և ԱԱԳԼ գիտական խմբերի աշխատանքներում և դառնալու միջազգային գործակցությունների անդամ։