ՀՀ Սահմանադրության էվոլյուցիան

Քննարկման թեման նախօրոք ընտրվել էր ուսանողական հանրույթի և բանախոսի կողմից, քանի որ 1995թ.-ին ընդունված ՀՀ սահմանադրության կրկնակի փոփոխությունները (2005թ. և 2015թ.) որոշակի վիճահարույց հարցեր են առաջացրել`  կապված մարդու և քաղաքացու հիմնական իրավունքները և ազատություններն ամրագրող և պետական կառավարման համակարգը ձևավորող  իրավական դրույթների բովանդակային փոփոխությունների անհրաժեշտությունը հիմնավորելու համար: Պարոն Այվազյանը համապարփակ կերպով ներկայացրեց սահմանադրական յուրաքանչյուր փոփոխության դերն ու նշանակությունն, առաջնային մի շարք դրույթների ընդունման տրամաբանությունը, դրանց փոփոխման, ուղղման կամ լրացման ընթացակարգը`  համեմատական վերլուծության ենթարկելով մի շարք ժողովրդավարական պետությունների Հիմնական օրենքի հետ:

Խոսվեց նաև կիսանախագահական և խորհրդարանական հանրապետության`  որպես պետական կառավարման ձևի սկզբունքային տարրերի մասին, քննարկվեց դրանց համապատասխանությունը հայ իրականությանը: Ներկաներն իրենց հետաքրքրող հարցերը հղեցին բանախոսին և ստացան հիմնավոր պատասխաններ: Հատկանշական է, որ ներկա գտնվողների մեջ կային նաև հյուրեր Ֆրանսիական և Սլավոնական համալսարանների իրավագիտության ֆակուլտետներից, ինչը խոսում է թեմայի հետաքրքրության բարձր աստիճանի մասին: Քննարկման վերջում պրն. Այվազյանը խորհուրդ տվեց ուսանողներին աշխատել իրավագիտակցության մակարդակը նոր աստիճանի բարձրացնելու ուղղությամբ, ինչը հնարավորություն կտա խորապես ընկալելու սահմանադրական նորմերի բովանդակությունը:

Հեղինակ`  Արման Հակոբջանյան