Кафедра социальной и клинической психологии

Սոցիալական և կլինիկական հոգեբանության ամբիոնը հիմնադրվել է 2005 թ․։ Սկզբում այն կոչվել է Կիրառական հոգեբանության ամբիոն, 4 տարի անց վերանվանվել է Սոցիալական հոգեբանության ամբիոն, իսկ 2018 թ․՝ Սոցիալական և կլինիկական հոգեբանության ամբիոն։

Ամբիոնն իր գործունեությունն սկսել է արդեն իսկ գործող Հոգեբանության ամբիոնի հիմքի վրա, որը հիմնադրվել է դեռևս 1976 թ․ ԵՊՀ հայ բանասիրության ֆակուլտետում, իսկ 25 տարի անց միացել է Փիլիսոփայության և սոցիոլոգիայի ֆակուլտետին։ 2001 թ․ ամբիոնի ղեկավարումը ստանձնել է հ․գ․դ․, պրոֆեսոր Գայանե Շավերդյանը, որի նախաձեռնությամբ արմատապես փոխվեցին ուսումնական պլաններն ու դրվեցին մագիստրատուրայի ինստիտուտի հիմքերը։ Հոգեբանության ամբիոնի զարգացումը և ուսումնական ծրագրերի մեծացումը նպաստեցին 2005 թ․ Հոգեբանության տեսության և պատմության և Կիրառական հոգեբանության ամբիոնների ստեղծմանը։ Վերջինիս վարիչը շարունակեց մնալ պրոֆ․ Գ․ Մ․ Շավերդյանը։ 2009 թ․ ամբիոնը վերանվանվեց Սոցիալական հոգեբանության, իսկ 2018 թ․՝ Սոցիալական և կլինիկական հոգեբանության ամբիոն։ 2008 թ․ ամբիոնի ջանքերով բացվել է ԵՊՀ կիրառական հոգեբանության կենտրոնը, որի տնօրենը մինչ օրս ամբիոնի դասախոս, հավատարմագրված հոգեթերապևտ Դ․ Գևորգյանն է։

Այս տարիների ընթացքում ամբիոնի նախաձեռնությամբ կազմակերպվել են մի շարք հանրապետական և միջազգային գիտաժողովներ՝ նվիրված հոգեբանության տեսական և կիրառական արդի հիմնախնդիրներին, գիտությունների համակարգում հոգեբանության տեղի խնդրին, ցեղասպանության սոցիալ-հոգեբանական և ախտահոգեբանական հետևանքներին, հոգեբանական գիտության մեջ Ա․ Մասլոուի և Կ․ Գ․ Յունգի ունեցած ներդրմանը։

Ամբիոնում աշխատում են հոգեբանական գիտությունների դոկտորներ և թեկնածուներ, ասիստենտներ ու հրավիրյալ դասախոսներ, որոնք ունեն մանկավարժական և պրակտիկ մասնագիտական աշխատանքային մեծ փորձ, պարբերաբար մասնակցում են վերապատրաստումների, ինչպես նաև իրենք են կազմակերպում որակավորման բարձրացման ու վերապատրաստման դասընթացներ։ Նրանց մասնագիտական փորձի և մանկավարժական հմտությունների շնորհիվ ապահովվում է որակյալ կրթություն և տեսագործնական արդի գիտելիքների տրամադրում ուսանողներին։ 

Սոցիալական և կլինիկական հոգեբանության ամբիոնի ջանքերով բացվել է մեծ պահանջարկ ունեցող «Կլինիկական հոգեբանություն և հոգեթերապիա» մագիստրոսական կրթական ծրագիրը, որը գործում է արդեն 17 տարի։ Ամբիոնի առաջարկած կրթական ծրագրերին հնարավոր է ծանոթանալ «Կրթական ծրագրեր» էջում։