Трехдневные учебные курсы для сотрудников пенитенциарных учреждений и службы пробации МВД РА в ЕГУ

Եռօրյա դասընթացների ժամանակ անցկացվելու են տեսական-օրենսդրական և գործնական հմտությունների կատարելագործմանն ուղղված քննարկումներ։ Դասընթացների նպատակն է հարստացնել մասնակիցների տեսական գիտելիքները և գործնականում դրանք կիրառելու հմտությունները։ Տեսական դասախոսությունները կզուգորդվեն պրակտիկ քննարկումներով և բանավեճերով։

Շահառու խմբերում ներառված են ՀՀ ԱՆ քրեակատարողական և պրոբացիայի ծառայողներ, վերասոցիալականացման և վերականգնողական ծրագրեր իրականացնող պաշտոնատար անձինք, ինչպես նաև քրեակատարողական հիմնարկներում աշխատող բժիշկներ:

Դասընթացավար, ԵՊՀ եվրոպական ուսումնասիրությունների կենտրոնի փորձագետ, դասախոս Սերգեյ Ղազինյանը, մեզ հետ զրույցում ընդգծելով ընտրված թեմայի կարևորությունը, վստահեցրեց, որ քրեակատարողական ծառայողները պետք է թեմայի վերաբերյալ պատշաճ գիտելիք ունենան և իմանան, թե այդօրինակ իրավիճակներում ինչ մեխանիզմներ պետք է կիրառել, որպեսզի հետագայում անհրաժեշտ քայլեր ձեռնարկվեն:

Ս. Ղազինյանը նշեց. «Դասընթացի ավարտին մասնակիցները կունենան ընդհանուր գիտելիք վատ վերաբերմունքի տեսակների և առանձնահատկությունների մասին, կծանոթանան դրանց վերաբերյալ ներպետական և միջազգային կարգավորումներին ու չափանիշներին, կտիրապետեն քրեակատարողական հիմնարկ ընդունվելիս և այնտեղ գտնվելու ընթացքում վատ վերաբերմունքի դեպքերի բացահայտման համար անհրաժեշտ գործոններին, դրանց առնչվող միջազգային փորձին»:

Նրա խոսքով՝ վերապատրաստվողները կկարողանան նաև բացահայտել վատ վերաբերմունքի դեպքերի քննության բաղադրիչները, կտիրապետեն քրեակատարողական հիմնարկում վատ վերաբերմունքի դեպքերի բացահայտման,  արձանագրման և կանխարգելման տեսանկյունից քրեակատարողական ծառայողների և բուժաշխատողների փոխգործակցության առանձնահատկություններին։

Նշենք, որ դասընթացի ավարտին վերապատրաստման ծրագրի մասնակիցները կհանձնեն նախապես մշակված թեստ, որի արդյունքների հիման վրա կգնահատվեն: Մասնակիցներին կտրամադրվի գնահատման թերթիկ, որի միջոցով նրանք ևս հնարավորություն կունենան գնահատելու դասընթացի արդյունավետությունը (տրամադրված նյութերը, պայմանները, դասընթացավարին և այլն)։

Դասընթացները հաջողությամբ ավարտած մասնակիցները կստանան պատվոգիր: