ԶԱՐԳԱՑՄԱՆ ՆՈՐ ՀԵՌԱՆԿԱՐՆԵՐ ԿԵՆՍԱԲԱՆՈՒԹՅԱՆ ԵՎ ԲԺՇԿԱԳԻՏՈՒԹՅԱՆ ԲՆԱԳԱՎԱՌՆԵՐՈՒՄ․ ԿՆՔՎԵԼ Է ՀԱՄԱԳՈՐԾԱԿՑՈՒԹՅԱՆ ՀՈՒՇԱԳԻՐ

Հանդիպմանը ներկա էին ԵՊՀ ուսումնական հարցերի գծով պրոռեկտոր Էլինա Ասրիյանը, մարդու և կենդանիների ֆիզիոլոգիայի ամբիոնի վարիչ Աննա Կարապետյանը և ՀՀ առողջապահության նախարարության ակադեմիկոս Սուրեն Ավդալբեկյանի անվան առողջապահության ազգային ինստիտուտի ներկայացուցիչներ։

ԵՊՀ ռեկտորը, ներկայացնելով բուհում ընթացող բարեփոխումներն ու իրականացվող ծրագրերը, նշեց, որ նախատեսվում է ԵՊՀ-ում զարգացնել բժշկագիտության բնագավառը՝ հիմք ընդունելով առկա մեծ ներուժն ու ռեսուրսները։

Հ․ Հովհաննիսյանը տեղեկացրեց, որ ԵՊՀ-ում բժշկագիտության առանձին հիմնախնդիրներ արդեն իսկ դասավանդվում են և հետազոտվում, ապա հույս հայտնեց, որ առաջիկայում այս ուղղությամբ մեծ առաջընթաց ու զարգացում կարձանագրվեն։

Ա․ Բազարչյանն ասաց, որ այսօր շատ մեթոդներ, որոնք կիրառվում են բժշկագիտության մեջ, հիմնականում կենսաբանական են, և ըստ այդմ՝ պետք է աստիճանաբար վերանայել որոշ մասնագիտությունների կրթական ուղիներ։  Նա փաստեց, որ այսօր կան բժշկական մի շարք մասնագիտություններ, որոնց դասավանդման և զարգացման ուղղությամբ ԵՊՀ-ն հսկայական ներուժ ունի։

Ինստիտուտի տնօրենը նշեց, որ մեծ պատիվ է համագործակցել Երևանի պետական համալսարանի հետ`շեշտելով, որ այն հայաստանյան կրթական համակարգի դրոշակակիրն է։

Հանդիպման ընթացքում կողմերը հույս հայտնեցին, որ հաստատված համագործակցությունը գործնական ազդեցություն կունենա բոլոր այն ուղղությունների զարգացման գործում, որոնք փոխգործակցության հիմքում են:

Տեղեկացնենք, որ ըստ համագործակցության հուշագրի՝  կողմերը փոխանակելու են մասնագիտական տեղեկատվություն կենսաբանության և բժշկագիտության բնագավառներում, մշակելու և համատեղ իրականացնելու են գիտահետազոտական, գիտաուսումնական և դրամաշնորհային ծրագրեր, ինչպես նաև համատեղ կազմակերպելու են հանդիպումներ, խորհրդակցություններ, քննարկումներ ու գիտական այլ միջոցառումներ։