Տերամոյի համալսարանի պրոֆեսորը ԵՊՀ-ում հանդես է եկել բաց դասախոսությամբ

Եվրոպական միության կողմից համաֆինանսավորվող «ARMDOCT» նախագծի և «Էրազմուս+» ծրագրի շրջանակում կազմակերպված դասախոսության նպատակն էր արդյունաբերական դոկտորական ծրագրերի վերաբերյալ իտալական փորձի համապարփակ ներկայացումը համալսարանում:

ԵՊՀ գիտական հարցերի գծով պրոռեկտոր Ռաֆայել Բարխուդարյանը, ողջունելով այսօրինակ հանդիպումների անցկացումը, կարևորեց ծրագրի հիմնական նպատակը, այն է՝ բարեփոխել դոկտորական կրթությունը ԵՊՀ-ում, ինչպես նաև հայաստանյան այլ բուհերում: Նրա խոսքով՝ նման քննարկումներն ու միջոցառումները կնպաստեն դոկտորական կրթության բարեփոխումներին, արհեստական բանականության, ինչպես նաև այլ բնագավառների զարգացմանն ու կատարելագործմանը:

ԵՊՀ գիտական քաղաքականության վարչության պետ Երանուհի Մանուկյանը նշեց, որ «ARMDOCT» նախագծի շրջանակում համագործակցում են հայաստանյան 9 և եվրոպական 4 բուհեր:

Անդրադառնալով արդյունաբերական դոկտորական դպրոցի կարևորությանը՝ Երանուհի Մանուկյանն ընդգծեց. «Տերամոյի համալսարանն արդյունաբերական դոկտորական դպրոցի մեծ փորձառություն ունի։ Պաոլա Պիտտիայի այս դասախոսությունը կնպաստի, որ համալսարանը հեշտությամբ ներգրավվի ծրագրում»:

Դասախոսության ընթացքում պրոֆեսոր Պաոլա Պիտտիան խոսեց Իտալիայում արդյունաբերական դոկտորական ծրագրերի վերաբերյալ իր պատկերացումների և փորձի մասին:

Դասախոսությանը ներկա էին համալսարանի պրոֆեսորադասախոսական կազմի ներկայացուցիչներ, կրթության կառավարիչներ, հետազոտողներ, դասախոսներ, ոլորտի ներկայացուցիչներ, ապագա ասպիրանտներ, որոնք հետաքրքրված են արդյունաբերական դոկտորական ծրագրերով։

Նշենք, որ Տերամոյի համալսարանի պրոռեկտորը, լինելով կենսաբան, դասախոսություններով է հանդես եկել նաև ԵՊՀ կենսաբանության ֆակուլտետում, գործնական հանդիպումներ է ունեցել ԵՊՀ պրոֆեսորադասախոսական կազմի ներկայացուցիչների հետ:

Հավելենք, որ ԵՊՀ պատվիրակությունը 2022 թ. «ARMDOCT» ծրագրի շրջանակում այցելել էր Տերամոյի համալսարան: