Кафедра неорганической и аналитической химии

Անօրգանական և անալիտիկ քիմիայի ամբիոնը ձևավորվել է 2013 թ., անօրգանական քիմիայի և անալիտիկ քիմիայի ամբիոնների հիմքի վրա, որոնք հիմնադրվել են 1923 թ.: Անօրգանական և անալիտիկ քիմիայի ամբիոնի վարիչ է եղել ականավոր գիտնական, նշանավոր պրոֆեսոր Լ․ Ռոտինյանը։ Հետագայում ամբիոնը ղեկավարել են պրոֆեսորներ Ղ․ Տեր-Ղազարյանը, Դ․ Մարուխյանը, Տ․ Ղազանչյանը, Մ․ Դարբինյանը, Հ․ Բաբայանը, Ս․ Ավագյանը, Ս․ Գրիգորյանը, Ռ․ Հարությունյանը, իսկ 1938 թվականից առանձնացած անալիտիկ քիմիայի ամբիոնը ղեկավարել են ՀՀ ԳԱԱ թղթակից անդամ Վ․ Թառայանը, պրոֆեսորներ Մ. Դարբինյանը, Ժ. Հովսեփյանը, Հ․ Խաչատրյանը:

Ամբիոնը զբաղվել և զբաղվում է գիտահետազոտական, գիտատեխնոլոգիական և գիտաարտադրական բազմաթիվ աշխատանքներով՝ գրանցելով բազմաթիվ ձեռքբերումներ: Ամբիոնում կատարվել են աշխատանքներ մի շարք ոլորտներում՝

• անօրգանական միացությունների սինթեզ,
• ցածր ջերմաստիճանային քիմիական տեղափոխության ռեակցիաների ուսումնասիրություն,
• բարձրջերմաստիճանային ինքնատարածվող սինթեզ,
• հանքարդյունաբերության դասական տեխնոլոգիաների ուսումնասիրություն:

Ներկայում ամբիոնում տարվում են աշխատանքներ՝ հիմնարար և ժամանակակից գիտահետազոտական, գիտատեխնոլոգիական և կիրառական մի շարք ուղղություններով, ինչպիսիք են՝

• հակաօքսիդիչ նյութերի և հակառադիկալային ակտիվության ուսումնասիրություն,
• կատալիտիկորեն և կենսաբանորեն ակտիվ կոմպլեքս միացությունների սինթեզ և հետազոտություն,
• հանքահումքային արդյունաբերության ժամանակակից տեխնոլոգիաների մշակում և կիրառություն,
• անալիզի ժամանակակից մեթոդների զարգացում և կիրառում,
• բարձր արդյունավետ հեղուկային քրոմատոգրաֆիայի և նմուշապատրաստման նոր հիբրիդային հանքապոլիմերային կլանիչների սինթեզ և ուսումնասիրություն,
• բնական կլանիչների վերափոխում և կիրառում,
• կենսաբանորեն ակտիվ միացությունների անալիզ և կիրառություն կոսմետիկ խնամքի միջոցներում և սննդում,
• կենցաղային քիմիայի և տեխնիկական սպասարկման միջոցների տեխնոլոգիաների և բաղադրությունների մշակում և կիրառության ուսումնասիրություն, կատարելագործում,
• սննդամթերքի և ալկոհոլային ըմպելիքների անալիզ, արտադրական տեխնոլոգիաների ուսումնասիրություն, կատարելագործում:

Ամբիոնում աշխատում են առաջատար մասնագետներ, որոնք պարբերաբար անցնում են վերապատրաստումներ, ներգրավված են միջազգային ու տեղական դրամաշնորհային ծրագրերում, հեղինակ են ուսումնամեթոդական ձեռնարկների, մենագրությունների, դպրոցական դասագրքերի, գիտական հոդվածների, որոնց մեծ մասը տպագրվում է բարձր ազդեցության գործակից ունեցող պարբերականներում։

Ամբիոնում գործում են մի շարք դրամաշնորհներ, որոնց շնորհիվ զարգանում են մի շարք գիտատեխնոլոգիական և կիրառական ուղղություններ, համալրվում է տեխնիկական բազան և հագեցվում ժամանակակից ու միջազգային չափորոշիչներին համապատասխան սարքավորումներով: Ամբիոնը համալրված է հետևյալ սարքավորումներով՝

• Waters 600S HPLC with “Waters 486” UV detector,
• KNAUER “Asura HPLS with variable multi wavelength UV/Vis detector” (Agilent technology),
• UV-Visable Spectrophotometer T60,
• Spectrophotometer “SPECTRO UV-18PC”,
• M550 Double Beam Scanning UV/Visable Spectrophotometer,
• Gemini VII Surface Area and Porosity, Flow Prep060-Sample Degas System (Micrometrics),
• HACH Lange DR3900 spectrometer,
• LECO “SC-144DR”,
• Atomic Absorption Spectrophotometer “PG-990” & Graphite Furhace Power “Supply GF-990”։

Թվարկված սարքավորումներից շատերը եզակի են տարածաշրջանում և լայն հնարավորություններ են ստեղծում ինչպես ամբիոնի, այնպես էլ համալսարանի ու ՀՀ-ում զարգացող գիտության համար։ Դրանք հնարավորություն են տալիս կատարելու մի շարք հետազոտություններ սպեկտրաչափական, քրոմատոգրաֆիական և այլ եղանակներով տարբեր գիտահետազոտական, գիտատեխնոլոգիական և կիրառական ոլորտներում, ինչի շնորհիվ ընդլայնվում են գործակցային կապերը ինչպես գիտության, այնպես էլ աշխատաշուկայի ու արդյունաբերության տարբեր բնագավառներում (հանքարդյունաբերություն, հանքահումքային արտադրություն, էկոլոգիական անվտանգություն, սննդի արդյունաբերություն, կենցաղային քիմիա, կոսմետիկա և խնամքի միջոցներ, դեղագործական քիմիա և այլն)։

Կիրառական քիմիայի գիտատեխնոլոգիական լաբորատորիա

2023 թ. ամբիոնում սկսել է գործել կիրառական քիմիայի գիտատեխնոլոգիական լաբորատորիան, որը հագեցած է միջազգային ստանդարտներին համապատասխան, հետազոտական և տեխնոլոգիական ժամանակակից սարքերով ու տեխնիկայով: Լաբորատորիան զբաղվում է քիմիայի կիրառական արդի հարցերի և արտադրական տարբեր ոլորտների խնդիրների ուսումնասիրությամբ ու սպասարկման ուղղությամբ:

Գործունեության ուղղություններն են՝

• մաքրող, լվացող, ախտահանող միջոցների և տեխնիկական սպասարկման միջոցների բաղադրությունների և տեխնոլոգիաների մշակում և կիրառում,
• կոսմետիկայի և խնամքի միջոցների տեխնոլոգիաների մշակում և կիրառում,
• սիլիկատային շինանյութերի և շինարարական քիմիայի բաղադրությունների և տեխնոլոգիաների մշակում և կիրառում,
• պոլիմերային, ներկալաքային շինանյութերի, թաղանթապատող նյութերի տեխնոլոգիաների մշակում և կիրառում,
• արտադրական թափոնների վերամշակման տեխնոլոգիաների մշակում և կիրառում,
• էկովառելիքի բաղադրությունների և տեխնոլոգիաների մշակում և կիրառում,
• արտադրության և արտադրական լաբորատորիաների նախագծում, պլանավորում, մոդելավորում (խորհրդատվություն և կազմակերպում):