Ноября 01, 2024 | 17:43
Գիտություն
Կրթություն
Միջազգային համագործակցություն
ԵՊՀ-ում կայացավ աշխատաժողով «DEvision» նախագծի շրջանակում
Երևանի պետական համալսարանում «DEvision. իրական և վիրտուալ միջավայրերի թվային միացում» նախագծի շրջանակում ս.թ. հոկտեմբերի 28-ից նոյեմբերի 1-ը անցկացվեց նախագծի կառավարման և մշտադիտարկման աշխատաժողովը («Project Management & Monitoring Meeting Workshop»)՝ համախմբելով ակադեմիական և ոլորտային փորձագետների Հայաստանից, Ղրղզստանից և Ավստրիայից։
Աշխատաժողովի շրջանակում անցկացվեցին քարտեզագրման, տվյալների հավաքագրման և թվային ուսուցման նորարարական մոտեցումների ուսումնասիրմանն ուղղված սեմինարներ, շնորհանդեսներ և դաշտային հետազոտություններ:
Գիտական միջոցառումը մեկնարկեց CAC պորտալի միջոցով Երևանի ժառանգության քարտեզագրմանը նվիրված սեմինարով, որը վարեցին Զալցբուրգի համալսարանի գեոինֆորմատիկայի-Z-GIS բաժնի ավագ գիտաշխատող Մանֆրեդ Միթլբլոքը և ԵՊՀ աշխարհագրության և երկրաբանության ֆակուլտետի ասպիրանտ Մարիամ Պետրոսյանը։
Սեմինարին հաջորդեց հանդիպումը Ավստրիայի զարգացման գործակալության «APPEAR» ծրագրի համակարգող Ռայներ Այնզեբերգերի հետ, որի ժամանակ ներկայացվեցին «DEvision» նախագծի կարգավիճակը, ընթացքն ու ձեռքբերումները: Անցկացվեցին նաև գործնական քննարկումներ, ինչպիսիք են «Quick Capture My_City_TOUR»-ը և մշակված մոդուլների վերանայումը:
Հոկտեմբերի 30-ին մասնակիցներն ուղևորվեցին Սևանա լիճ՝ դաշտային հետազոտության՝ «OpenStreetMap» տվյալների ներդրման նպատակով:
Աշխատաժողովի եզրափակիչ օրը ներկայացվեցին Երևանի պետական համալսարանի և Ճարտարապետության և շինարարության Հայաստանի ազգային համալսարանի ասպիրանտների կատարած հետազոտական աշխատանքները։
Միջոցառումը բացառիկ հարթակ էր գիտելիքների փոխանակման, համագործակցության և թվային ու ֆիզիկական քարտեզագրման միջավայրերի միջև առկա գործակցությունն ուսումնասիրելու համար:
