Май 31, 2022 | 14:27
Կրթություն
Մշակույթ
ՀԱՄԱԼՍԱՐԱՆԱԿԱՆՆԵՐՆ ԱՅՑԵԼԵՑԻՆ ԹԲԻԼԻՍԻ
ԵՊՀ Շառլ Ազնավուրի անվան մշակույթի կենտրոնի ներկայացուցիչները երկօրյա այց իրականացրին Թբիլիսի; Հովհաննես Թումանյանի տուն-թանգարանում համալսարանականները մասնակցեցին Հայաստանի գրողների միության նախագահ Էդվարդ Միլիտոնյանի «Բազմաձայն երկիր Վրաստանը» գրքի շնորհանդեսին, Վարդատոնին, հանդես եկան երաժշտական և պարային կատարումներով:
ԵՊՀ Շառլ Ազնավուրի անվան մշակույթի կենտրոնի ղեկավար Կարինե Դավթյանը և կենտրոնի սաները Թբիլիսիում մասնակցեցին Վարդատոնին՝ նվիրված Սայաթ-Նովայի հիշատակին: Հյուրերն ու մասնակիցները քայլերթ իրականացրին մինչև Սուրբ Գևորգ եկեղեցի և ծաղիկներ խոնարհեցին Սայաթ-Նովայի գերեզմանին, ինչից հետո մեկնարկեց համերգային ծրագիր, որին մասնակցում էին նաև ԵՊՀ Շառլ Ազնավուրի անվան մշակույթի կենտրոնի երգչախումբն ու աղջիկների պարային համույթը:
_6.jpg)
Մեզ հետ զրույցում Կ․ Դավթյանը նշեց․ «Հանդիպեցինք Վրաստանի գրողների միության նախագահ Մաղվալա Գոնիաշվիլիի և Թբիլիսիի Պետրոս Ադամյանի անվան պետական հայկական թատրոնի գեղարվեստական ղեկավար Արմեն Բայանդուրի հետ, քննարկեցինք համագործակցության ծրագրեր, ինչպես նաև որոշեցինք` երբ պատրաստ կլինի Թբիլիսիի հայկական թատրոնի նոր շենքը, մենք այնտեղ կբեմադրենք մեր ներկայացումներից մեկը»։
«Հանդիպեցինք նաև Թբիլիսիի Իվանե Ջավախիշվիլու անվան պետական համալսարանի պարային համույթի գեղարվեստական ղեկավար Դավիթ Կիկվաձեի և Թբիլիսիի վիրահայերի նախագահ Մարի Առաքելովայի հետ, ով նսև Վարդատոնի կազմակերպիչն էր։ Կարծում եմ՝ այս այցը էական նշանակություն ունեցավ ապագայում մշակութային համատեղ ծրագրերի իրականացման գործում», հավելեց Կ. Դավթյանը։
_10.jpg)
Նշենք, որ միջոցառումը նվիրված էր հայ-վրացական դիվանագիտական հարաբերությունների 30-ամյակին:
