ԵՊՀ-ն՝ ի նպաստ շարունակական մասնագիտական զարգացման․ ինժեներ-երկրաբանները կկատարելագործեն հմտությունները

ԵՊՀ շարունակական կրթության կենտրոնը ս․թ․ մարտին դիմել էր ՀՀ քաղաքաշինության կոմիտե՝ շարունակական մասնագիտական զարգացման (ՇՄԶ) ծրագրի կրեդիտավորման համար: Կոմիտեն հաստատել է քաղաքաշինության բնագավառում նախատեսվող շարունակական մասնագիտական զարգացումն ապահովող ԵՊՀ-ի ներկայացրած «Ինժեներային երկրաբանություն» միջոցառման ծրագիրը՝ շնորհելով 34 կրեդիտ։

Ծրագրում ընդգրկված են մասնագետներ, այդ թվում՝ առաջին, երկրորդ կամ երրորդ կարգի ինժեներ-երկրաբաններ։ Դասընթացը նախատեսված է ինչպես արդեն հավաստագրված, այնպես էլ հավաստագրման պատրաստվող մասնագետների համար, որոնց առջև դրված է ՇՄԶ կրեդիտների կուտակման պահանջ։

Հաշվի առնելով ՇՄԶ գործընթացի իրավական կարգավորման հետ կապված մասնակիցների հարցերը՝ ԵՊՀ շարունակական կրթության կենտրոնի աջակցությամբ Աշխարհագրության և երկրաբանության ֆակուլտետում կազմակերպվեց տեղեկատվական հանդիպում ՀՀ քաղաքաշինության կոմիտեի ներկայացուցիչների հետ։ Ներկա էին կոմիտեի լիցենզավորման վարչության պետ Նշան Մարտիրոսյանը և վարչության աշխատակից Աննա Պետրոսյանը։ Հանդիպմանը մասնակիցները հնարավորություն ունեցան ուղղելու հարցեր՝ կապված իրենց աշխատանքային պրակտիկայի հետ։ Քննարկվեցին նաև ՇՄԶ ոլորտում առկա խնդիրներն ու հնարավորությունները։

«Ինժեներային երկրաբանություն» դասընթացի ծրագիրը մշակել է Աշխարհագրության և երկրաբանության ֆակուլտետի Երկրաֆիզիկայի, ճարտարագիտական երկրաբանության և ջրաերկրաբանության ամբիոնի պրոֆեսոր Սարգիս Հայրոյանը: Ծրագիրը մշակվել է՝ հաշվի առնելով մասնակիցների կարիքները: 

Պրոֆեսորը հանդիպման ընթացքում հանդես եկավ դասախոսությամբ՝ ընդգծելով երկրաբանական միջավայրի ուսումնասիրության կարևորությունը կայուն և անվտանգ շինարարական լուծումներ ապահովելու համար։ Պրոֆեսորի ելույթն ուղեկցվեց թեմատիկ քննարկմամբ, որին ակտիվորեն ներգրավվեցին մասնակիցները՝ բարձրացնելով ինչպես տեսական, այնպես էլ կիրառական բնույթի հարցեր։

Քաղաքաշինության ոլորտում աշխատող ինժեներ-երկրաբանների համար անցկացվող դասընթացն ուղղված է նրանց մասնագիտական գիտելիքների և գործնական հմտությունների խորացմանը։ 

Ծրագիրն ընդգրկում է այնպիսի թեմատիկ ուղղություններ, ինչպիսիք են գրունտների հատիկաչափական դասակարգումը, գրունտների ջրաֆիզիկական հատկությունները, ջրերը դիսպերս գրունտներում, կառուցվածքային անկայուն գրունտների ինժեներաերկրաբանական առանձնահատկությունները, երկրաբանական պրոցեսների և երևույթների դասակարգումը, սողանքային երևույթներ և այլ ոլորտային հարցեր։

Նմանատիպ նախաձեռնությունները կարևոր քայլ են մասնագիտական կրթության և որակավորված կադրերի շարունակական մասնագիտական զարգացման գործընթացում։

Նշենք, որ դասընթացը մեկնարկել է ս․թ․ ապրիլի 16-ին և կշարունակվի մինչև հունիսի 18-ը։ Ավարտին մասնակիցները կստանան վկայականներ։