Кафедра английской филологии

Անգլիական բանասիրության ամբիոնը ձևավորվել է Երևանի պետական համալսարանում դեռևս 1935 թվականին հիմնադրված ռոմանագերմանական բանասիրության ամբիոնի հիմքի վրա։ 1991 թ․ հայ բանասիրության ֆակուլտետի օտար լեզուների մասնագիտական բաժինների հիման վրա ձևավորվել է ռոմանագերմանական բանասիրության ֆակուլտետը՝ միաժամանակ սկիզբ դնելով անգլիական բանասիրության ամբիոնի գործունեությանը:

Ժառանգելով իր վաստակաշատ ու բազմահմուտ նախորդների` բ.գ.դ., ակադեմիկոս Գ. Ջահուկյանի, փ.գ.դ., ակադեմիկոս Է. Աթայանի, բ.գ.թ., դոցենտ Լ. Ալոյանի, բ.գ.թ., պրոֆեսոր Հ. Թոքմաջյանի, բ.գ.թ., պրոֆեսոր Ե. Մխիթարյանի գիտամանկավարժական հարուստ փորձը` նորաստեղծ ամբիոնի վարիչի պարտականությունները ստանձնել է ՀՀ ԳԱԱ թղթակից անդամ, բ.գ.դ., պրոֆեսոր Սեդա Գասպարյանը։

Անգլիական բանասիրության ամբիոնը, որն այսօր իրականացնում է ուսումնամեթոդական և գիտական բազմաբնույթ գործունեություն, ապահովում է գործնական անգլերենի` որպես հիմնական լեզվի ուսուցում, ինչպես նաև տեսական գիտելիքներ հաղորդում անգլիական բանասիրության տարբեր գիտակարգերի ոլորտում, ծանոթացնում անգլերենի դասավանդման հմտություններին և երկրագիտական ու լեզվամշակութաբանական արժեք ունեցող փաստերի: Ամբիոնի առաջնակարգ բազմաթիվ աշխատակիցներ կատարում են միջգիտակարգային ուսումնասիրություններ, որոնք տպագրվում են արտասահմանյան առաջատար ամսագրերում, հրապարակվում են մենագրությունների տեսքով։ Ամբիոնում հաճախակի կազմակերպվում են գիտական և գիտագործնական սեմինարներ։ Հմուտ դասավանդող դոցենտներն ու պրոֆեսորները գիտական զեկուցումներով մասնակցում են ինչպես հանրապետության, այնպես էլ արտասահմանյան բուհերում։

Ամբիոնն առաջնորդվում է այն սկզբունքով, որ գիտելիքի հաղորդումը լայն իմաստով պետք է ծառայի հասարակական առաջընթացին։ Սկզբունքային է նաև այն, որ գիտական կարևոր ձեռքբերումները հնարավորինս շուտ ներմուծվեն դասընթացների մեջ` արդիականացնելով դրանց բովանդակությունը և նոր գիտելիքներ տալով սովորողներին: Ուսուցման եռաստիճան համակարգի անցնելու կապակցությամբ ամբիոնը վերամշակել և ստեղծել է ուսումնական նոր ծրագրեր, որոնք նպատակաուղղված են մասնագիտական համակողմանի և բարձրորակ կրթություն ապահովելուն:

Մասնագիտական ոլորտում ստանձնելով առաջատար դեր՝ անգլիական բանասիրության ամբիոնը մշտապես բարձր պատասխանատվությամբ է մոտենում մասնագետների որակի բարձրացման դժվարին, սակայն կարևոր գործին` ամբիոնի գիտական աշխատանքը զարգացնելով մի շարք հիմնարար ուղղություններով՝ կիրառական լեզվաբանություն, լեզվական փաստերի և խոսքային ակտերի գործաբանական նկարագրին առնչվող խնդիրներ, հոգելեզվաբանական քննություն, արդյունավետ հաղորդակցություն, մեդիադիսկուրսի ժանրային և լեզվաոճական առանձնահատկությունների լուսաբանում և դրա հիմքի վրա ուսանողի՝ անգլերեն մեդիատեքստ ստեղծելու հմտությունների ձևավորում, համացանցային դիսկուրս, լեզվամտածողության կաղապարներին վերաբերող խնդիրներ, անգլերենի բառագիտության և ոճագիտության հիմնահարցեր, միջմշակութային հաղորդակցության տեսագործնական խնդիրներ, թարգմանությունը որպես բանասիրական քննության առարկա և այլն։ Հատուկ ուշադրություն է դարձվում միջգիտակարգային ուսումնասիրությունները խթանելուն։

Ամբիոնն իրականացնում է ՝ «Անգլերեն լեզու և գրականություն (հեռակա)» բակալավրիատական կրթական ծրագիրը և «Անգլերեն և գրականություն (առկա)», «Անգլերեն և գրականություն (հեռակա)», «Կիրառական լեզվաբանություն» մագիստրոսական կրթական ծրագրերը։