Олимпиада грабара в ЕГУ для школьников: подведены итоги
ԵՊՀ հայ բանասիրության ֆակուլտետում ամփոփվեցին նոյեմբերից մեկնարկած «Դասական լեզու Հայոց» մրցույթի արդյունքները: Հաղթողներ ճանաչվեցին հանրապետության տարբեր դպրոցների աշակերտներ 10 անվանակարգերում։
![](/sites/default/files/styles/large_slide/public/2024-03/01_0.jpg?h=02cb7f90&itok=frC2HpHN)
ԵՊՀ հայ բանասիրության ֆակուլտետի դեկան Արշալույս Գալստյանը, կարևորելով համալսարանում նման միջոցառումների անցկացումը, նշեց, որ չնայած ֆակուլտետում Հայոց լեզվի պատմության և ընդհանուր լեզվաբանության ամբիոնը ավանդաբար կազմակերպել է գրաբարին նվիրված բազում միջոցառումներ և օլիմպիադաներ, սակայն «Դասական լեզու Հայոց» մրցույթը բացառիկ է. առաջին անգամ է, երբ օլիմպիադան կազմակերպվել է աշակերտների համար։
![](/sites/default/files/styles/large_half_text/public/2024-03/galstyan.jpg?itok=oUPu3uEo)
«Չափազանց կարևորում եմ նմանօրինակ միջոցառումների կազմակերպումը՝ հայոց լեզվի թանկարժեք մասի՝ ոսկեղենիկ գրաբարի պահպանման և տարածման տեսանկյունից։ Հուսով եմ, որ այս օլիմպիադայի անցկացումը կդառնա շարունակական, նաև վստահ, որ ԵՊՀ-ն մշտապես պատրաստ է հյուրընկալելու և մնալու ջերմ ու հարազատ միջավայր բոլոր նրանց համար, ովքեր ցանկանում են ուսումնասիրել ու լավագույնս ճանաչել մեր լեզուն»,- ասաց Ա․ Գալստյանը:
Օլիմպիադայի կազմակերպման հարցում գործուն դերակատարում է ունեցել Հայ բանասիրության ֆակուլտետի Հայոց լեզվի պատմության և ընդհանուր լեզվաբանության ամբիոնի վարիչ, բ.գ.դ., պրոֆեսոր Աննա Աբաջյանը:
Շեշտադրելով մրցույթի կարևորությունն ու առանձնացնելով նպատակները՝ Ա. Աբաջյանն ասաց. «ԿԳՄՍՆ-ի կողմից նախօրոք պաշտոնապես հաստատված, իր տեսակի մեջ բոլորովին նոր ու յուրօրինակ այս մրցույթի անցկացման նպատակը թե՛ գրաբարի ուսուցանումը, արժևորումն ու տարածումն է, թե՛ ԵՊՀ-դպրոց կապի սերտացումը։ Նման մրցույթների շնորհիվ աշակերտները նաև հնարավորություն են ունենում այցելելու մայր բուհի մայր ֆակուլտետ, ծանոթանալու հայոց լեզուն ուսումնասիրելու՝ համալսարանի ընձեռած լայն հնարավորություններին: Հուսով եմ, որ այսպիսի սերտ շփումը նաև կապահովի ապագա որակյալ բանասերների հոսք դեպի ԵՊՀ»։
![](/sites/default/files/styles/large_half_text/public/2024-03/abajyan.jpg?itok=4EEoDS_1)
Մրցույթի համակազմակերպիչ, «Դասական դպրոց» կրթական հիմնադրամի նախագահ Մանե Ղևոնդյանը նշեց, որ խորհրդանշական ու պարտավորեցնող է համատեղ նախագիծ իրականացնել հատկապես ԵՊՀ-ի հիմնադիր ֆակուլտետի հետ. «ԵՊՀ հայ բանասիրության ֆակուլտետը դասական հայերենը կենսունակ պահող օղակներից է՝ կարևորագույնը, քանի որ այստեղ ապահովվում է լեզվի խոր և բազմակողմանի ուսուցում, որակյալ մասնագետների պատրաստում։ Ուզում եմ նաև շեշտել, որ 21-րդ դարում գրաբարով ստեղծված այսչափ նյութը անգնահատելի է, և այս գործում յուրաքանչյուրի ներդրումը՝ թանկ»։
Օլիմպիադան ամփոփող միջոցառմանը ներկա էին նաև Երևանի և հանրապետության տարբեր մարզերի դպրոցներից մրցույթի վերջին փուլ անցած աշակերտներ: Արտաշատի ավագ դպրոցի 10-րդ դասարանի աշակերտ Մայիս Պետրոսյանը, ներկայացնելով իր թիմի կատարած աշխատանքը, պատմեց, որ օլիմպիադային ներկայանալու համար ընտրել են գրաբարով ստեղծված շարականները։
«Մեր թիմի անդամներին միացել եմ 3-րդ փուլից, մեծ ոգևորվածությամբ։ Գրաբարը շատ եմ սիրել ու կարևորում եմ գործածումը՝ որպես մեր վաղեմի պատմության վկայություն»,-ասաց Մայիսը։
![](/sites/default/files/styles/large_half_text/public/2024-03/mane.jpg?itok=qUkG3fLL)
Հավելենք, որ մրցույթին մասնակցել են 170-ից ավելի աշակերտներ Երևանից և յոթ մարզերից` Արմավիր, Արարատ, Կոտայք, Լոռի, Գեղարքունիք, Սյունիք, Տավուշ։ Նրանք նոյեմբերից մինչև մարտ աշխատել են դպրոցներում՝ ուսուցիչների ղեկավարությամբ:
Մրցույթն անցկացվել է եռափուլ ձևաչափով։ Առաջին երկու փուլերում ստուգվել է աշակերտի՝ գրաբարով նյութի ընթերցանությունը, ինչը հետապնդում էր գրաբար ընթերցելը խթանելու, ինչպես նաև գրաբարով ստեղծագործություններին ծանոթացնելու նպատակներ։
Վերջին` երրորդ փուլը (70 մասնակից) նվիրված էր նախագծային ուսուցմանը, որի շրջանակում աշակերտները դասական հայերենով ստեղծել են տարբեր նախագծեր` կոմիքսներ, տեսանյութեր, շարժանկարներ և այլն (դահլիճին կից ճեմասրահում ցուցադրված էին բազմաբովանդակ նկարներ, պատկերներ)։ Այսկերպ դպրոցականների շրջանում մեծանում է հետաքրքրությունը հայոց դասական լեզվի հանդեպ, միաժամանակ զարգանում են աշակերտների ստեղծագործական հմտություններն ու թվային գրագիտության կարողությունները։
![](/sites/default/files/styles/large_half_text/public/2024-03/06.jpg?itok=XaBr9w82)
Օլիմպիադայի ավարտին «Դասական լեզու Հայոց» մրցույթի հաղթողներն արժանացան դրամական պարգևի («Ինստիգեյթ» ընկերության կողմից), պատվոգրերի, գրքերի, իսկ հաղթող խմբերի ուսուցիչները՝ հայկական արտադրության սալիկային համակարգիչների (հովանավոր՝ «Բուտեխ» ընկերություն)։
Մրցույթը կազմակերպվել է ԵՊՀ հայ բանասիրության ֆակուլտետի հայոց լեզվի պատմության և ընդհանուր լեզվաբանության ամբիոնի, ֆակուլտետի ՈւԳԸ-ի, Արարատյան Հայրապետական Թեմի, «Իրական դպրոց» կրթամշակութային հիմնադրամի և «Դասական դպրոց» կրթական հիմնադրամի համագործակցությամբ: