Вступая в профессиональную жизнь: выпускники факультета экономики и менеджмента ЕГУ получили сертификаты об окончании школы

ԵՊՀ-ն մասնագիտական մեծ ճանապարհորդության ուղարկեց իր հնագույն ֆակուլտետներից մեկի՝ Տնտեսագիտության և կառավարման ֆակուլտետի 100-րդ շրջանավարտներին՝ օրը հիշարժան դարձնելով տոնական միջոցառմամբ:

Տնտեսագիտության և կառավարման ֆակուլտետի 2023-2024 ուստարվա շրջանավարտներին իր շնորհավորական խոսքը հղեց ԵՊՀ ռեկտոր Հովհաննես Հովհաննիսյանը՝ ընդգծելով, որ Երևանի պետական համալսարանի գլխավոր նպատակը որակյալ կրթության ապահովումն է, քանի որ այն ուղղակիորեն կապված է մեր երկրի տնտեսության, բիզնեսի, կառավարման և պետական համակարգի հետ: Նա նաշեց, որ այս առումով շրջանավարտները կարող են վստահ լինել, որ ստացել են անհրաժեշտ գիտելիքներ՝ ճիշտ շարունակելու և զարգացնելու մասնագիտական ուղին:

«Որքան հարուստ կլինեն ձեր գիտելիքները, այնքան կնպաստեք մեր երկրի զարգացմանը: Հիշե՛ք՝ կրթությունը չի ավարտվում համալսարանական ուսումնառությամբ: Ամբողջ կյանքը սովորելու գործընթաց է, հետևաբար՝ միշտ պետք է կարդալ նոր տեսություններ, ծանոթանալ նոր ծրագրերի, որ հնարավորություն ունենաք շարժվելու ժամանակին համընթաց»,- նշեց ԵՊՀ ռեկտորը:

ԵՊՀ տնտեսագիտության և կառավարման ֆակուլտետի տարբեր տարիների շրջանավարտները դարձել են պետական և մասնավոր ոլորտների առաջադեմ մասնագետներ: Նրանցից մի քանիսի անցած մասնագիտական ուղուն համառոտ անդրադարձավ ԵՊՀ տնտեսագիտության և կառավարման ֆակուլտետի դեկան, տ․գ․թ․, դոցենտ Կառլեն Խաչատրյանը:

«Ուզում եմ ձեզ պատմել ֆակուլտետի 2000 թ. շրջանավարտների՝ ՀՀ ֆինանսների նախարար Վահե Հովհաննիսյանի, «Կոկա-Կոլա Հելլենիկ Բոթլինգ Քամփնի Արմենիա» ՓԲԸ-ի գլխավոր տնօրեն Արթուր Սահակյանի և ԵՊՀ տնտեսագիտության և միջազգային տնտեսական հարաբերությունների ամբիոնի վարիչ, դոցենտ Գրիգոր Հայրապետյանի մասնագիտական հաջողությունների մասին: Նրանք լավագույն շրջանավարտների օրինակ են, որոնք ֆակուլտետն ավարտելուց հետո ընտրել են մասնագիտական տարբեր ուղիներ՝ հաջողելով պետական, մասնավոր ու գիտակրթական ոլորտներում: Վստահ եմ, որ ձեր շարքերում են նրանց գործը շարունակողներն ու նրանց ապագա փոխարինողները, վաղվա նախարարները, գործարարներն ու կառավարիչները, պրոֆեսորներն ու գիտնականները»,- նշեց Կ. Խաչատրյանը:

Խոսելով համալսարանի՝ ուսանողների կյանքում ունեցած ավանդի և դերի մասին՝ նա շեշտեց, որ համալսարանական լինելը պարտավորեցնող է, և ցանկացած միջավայրում ԵՊՀ ներկայացուցիչներից սպասելիքներն ու ակնկալիքները մեծ են:

«Սիրելի՛ շրջանավարտներ, այս տարիները եղել են մասնագիտական կերտման և զարգացման ամենակարևոր շրջանը: Դուք հաղթահարել եք բազմաթիվ դժվարություններ և մարտահրավերներ: Վստա՛հ եղեք, որ համալսարանի պրոֆեսորադասախոսական կազմն արել է ամեն բան մրցունակ կրթություն ապահովելու համար: Հիշե՛ք, որ հարափոփոխ աշխարհում հաղթում է նա, ով չի վհատվում դժվարություններից, չի խուսափում պատասխանատվությունից և կարողանում է սահմանել հստակ առաջնահերթություններ, լուծել խնդիրներ: Ուրեմն, հպարտորեն կրե՛ք համալսարանական լինելու կոչումը և միշտ բա՛րձր պահեք ԵՊՀ-ի և ձեր հարազատ ֆակուլտետի անունը: Շարունակե՛ք կրթվել ու վստա՛հ եղեք, որ աշխատաշուկայում կգտնեք ձեր տեղը»:

Ինչո՞ւ և ինչո՞վ է կարևորվում շրջանավարտների դերը. շնորհավորական իր խոսքում այս հարցերին անդրադարձավ ՀՀ ֆինանսների նախարար Վահե Հովհաննիսյանը:

«Այսօր չափազանց կարևոր օր է ոչ միայն ձեզ, այլև պետության համար, քանի որ մարդու ծնունդից սկսած՝ պետությունն իր անընդհատական ներդրումն է ունենում քաղաքացու կյանքում: Հետո, երբ քաղաքացին ավարտում է ուսումը, սկսվում է հակառակ գործընթացը. անհատն է ներդրում կատարում պետության զարգացման գործում: Ուստի, ձեզնից յուրաքանչյուրը խիստ կարևոր է մեզ համար, և դուք մեծ արժեք եք ներկայացնում պետության ապագայի համար»:

Շնորհավորական ուղերձներով հանդես եկան նաև ԵՊՀ տնտեսագիտության և կառավարման ֆակուլտետի շրջանավարտներ Արթուր Սահակյանը («Կոկա-Կոլա Հելլենիկ Բոթլինգ Քամփնի Արմենիա» ՓԲԸ-ի գլխավոր տնօրեն), Անդրանիկ Գրիգորյանը («Կոնվերս բանկ» ՓԲԸ գլխավոր գործադիր տնօրեն), Սերգեյ Խաչատրյանը («Երևանի կոնյակի գործարան» ՓԲԸ գործադիր տնօրեն), ինչից հետո անցկացվեց ավարտական վկայականների հանձնման հանդիսավոր արարողությունը:

Հավելենք, որ 1934 թվականից ի վեր՝ ԵՊՀ տնտեսագիտության և կառավարման ֆակուլտետն ավարտել են հազարավոր բարձրակարգ մասնագետներ, որոնք, գերազանց տիրապետելով իրենց մասնագիտությանը, հաջողությամբ և բարձր արդյունավետությամբ աշխատում են տնտեսության տարբեր ոլորտներում, պետական կառավարման համակարգում, գիտահետազոտական կենտրոններում և համալսարաններում:

Տարբեր կրթական ծրագրերով շուրջ 1300 ուսանողներ (առկա և հեռակա ուսուցման բակալավրիատի և մագիստրատուրայի ուսանողներ, ասպիրանտներ և հայցորդներ) այսօր մասնագիտական կրթություն են ստանում համալսարանում: