Գերմանական ASIIN գործակալությունը ևս 5 տարով երկարաձգել է ԵՊՀ 4 կրթական ծրագրերի միջազգային հավատարմագրումը

Գերմանական ASIIN միջազգային գործակալությունը հավատարմագրել է Կենսաբանության ֆակուլտետի «Կենսաքիմիա և կենսատեխնոլոգիա» բակալավրի, «Ընդհանուր և բժշկական կենսաքիմիա» մագիստրոսական, Ֆարմացիայի ինստիտուտի «Ֆարմացիա» բակալավրի և մագիստրոսական կրթական ծրագրերը։

Այս գործընթացը ստեղծում է զարգացման նոր ուղիներ և բացում լայն հնարավորություններ՝ նպաստելով կրթության որակի մշտական բարձրացմանը և գիտական ներուժի առավել արդյունավետ օգտագործմանը։

Դեռ նախորդ տարի ԵՊՀ այս կրթական ծրագրերը առաջին անգամ երաշխավորվեցին հավատարմագրման՝ հաշվի առնելով այդ ուղղությունների արդիականությունը, յուրատիպությունը, աշխատաշուկայում ունեցած մեծ պահանջարկը, մարդկային և նյութատեխնիկական ռեսուրսների համապատասխանությունը հավատարմագրման միջազգային չափանիշներին: Սակայն այս արդյունքին հասնելու ճանապարհը դյուրին չի եղել․ միջազգային հավատարմագրմանն արժանանալը պահանջել է երկարատև և բազմակողմանի աշխատանք, մեծ ջանքեր և ռեսուրսներ։

Նշենք, որ միջազգային հավատարմագրումն ընձեռում է բազմաթիվ հնարավորություններ և առավելություններ: Այն նպաստում է ԵՊՀ միջազգայնացմանը՝ խթանելով ուսանողների և դասախոսների միջազգային շարժունությունը։ Միջազգային հավատարմագրումը բարձրացնում է համալսարանի կրթական ստորաբաժանումների և կրթական ծրագրերի վարկանիշը՝ դարձնելով դրանք առավել գրավիչ թե՛ հայ, թե՛ օտարազգի ուսանողների համար։