ԵՊՀ ֆարմացիայի ինստիտուտում մայիսի 19-ին կայացել է անվանի բժիշկ, բ.գ.դ., պրոֆեսոր Ռուբեն Անդրանիկի Հովհաննեսյանի «Ապացուցողական բժշկության տերմինների բացատրական բառարան»-ի շնորհանդեսը։
2015 թ.-ից Ռուբեն Հովհաննեսյանը աշխատել է ԵՊՀ-ում, սկզբում դեղագիտության և քիմիայի ֆակուլտետի դեղագիտության բաժնում, այնուհետև ֆարմացիայի ինստիտուտում, որտեղ 2017 թ.-ից մինչև կյանքի վերջը (2021 թ.) կենսաբժշկագիտության ամբիոնի վարիչն էր։ Հեղինակ է շուրջ 200 գիտական աշխատությունների, 4 արտոնագրված գյուտերի և 14 նորարական առաջարկությունների։
Լույս տեսած բացատրական բառարանը նախատեսված է կլինիկական համաճարակաբանության և ապացուցողական բժշկության բնագավառի մասնագետների, կլինիկական փորձարկումներ կատարող բժիշկ-հետազոտողների, ինչպես նաև բժշկական և դեղագործական համալսարանների ուսանողների, կլինիկական օրդինատորների և ասպիրանտների համար։
ԵՊՀ պրոֆեսորադասախոսական կազմը, գործընկերները և ուսանողները ներկայացրին գիտնականի մասին իրենց հիշողությունները, որոնց ամբողջությունը խտացված գույներով խճանկար էր հիշեցնում: Պրոֆեսորի մասին խոսելիս կարոտով էին հիշում գործընկերոջը, նշելով որ կյանքի վերջին տարիներին անկասկած երջանիկ էր, աշխատելով Ֆարմացիայի ինստիտուտում։ Խիստ լինելով ուսանողների հետ՝ միաժամանակ բարի էր ու ներողամիտ։ Իսկ կին կոլեգաների հետ շփվելիս անպակաս էին փաղաքշական խոսքերը (ջանիկս) և ուշադիր վերաբերմունքը, որը նաև վառ էր դրսևորում Հովհաննեսյանը իր մայրիկի նկատմամբ։
Ռուբեն Հովհաննեսյանը եղել է Ապացուցողական բժշկության մասնագետների հայկական ասոցիացիայի նախագահ, Բժշկական սեղմագրերի հայկական հանդեսի գլխավոր խմբագիր, Պաթոֆիզիոլոգների համաշխարհային ընկերության անդամ, Բժշկական ամսագրերի խմբագիրների համաշխարհային միության անդամ, Քոքրենյան համագործակցության (Cochrane Collaboration) անդամ:
Ռուբեն Հովհաննեսյանը միշտ կմնա իրեն ճանաչողների հուշերում որպես վառ անհատականություն, ով հետապնդել է Հայաստանում մեծ նպատակներ և իր կարևորագույն ներդրումն ունեցել մեր բժշկագիտության առաջխաղացման գործում։ Մարդ, ով իր կյանքն ու գործունեությունը անմնացորդ ծառայեցրել է գիտությանը՝ թողնելով աշխատանքային հարուստ կենսագրություն, վաստակած սեր ու հարգանք:
