Աշխարհագրության և երկրաբանության ֆակուլտետի աշխարհագրության բաժնի ֆիզիկական աշխարհագրության և ջրաօդերևութաբանության ամբիոնի 3-րդ կուրսի ուսանողները ապրիլի 7-ին ճանաչողական այց կատարեցին ՀՀ Շրջակա միջավայրի «Զվարթնոց» ավիաօդերևութաբանական կենտրոն։ Այցի նպատակն էր ծանոթանալ օդերևութաբանական հրապարակի և օդերևութաբանական դիտարկումների, օդերևութաբանական կայանի աշխատանքների հետ, օդերևութաբանական տվյալների արձանագրման ու մշակման, տեղեկատվության հաղորդման գործընթացին, ավիացիայի օդերևութաբանական սպասարկման որակի ապահովման, կանխատեսումների կազմման աշխատանքներին։
Դիտարկումների բաժնում ծանոթացան AMIS-РФ ծրագրի հետ, որտեղ հավաքվում է եղանակային տվյալների տեղեկությունը։ Դիտարկումների բաժնի աշխատանքներին ծանոթացրեց բաժնի պետ Արփենի Վարդանյանը։ Արփենի Վարդանյանի և բաժնի մյուս աշխատակիցների ուղեկցությամբ մեր ուսանողները եղան օդերևութաբանական հրապարակում, ծանոթացան օդերևութաբանական դիտարկումների և քամու, խոնավության, ջերմաստիճանի, ամպերի ներքին սահմանը չափող, տեսանելիությունը գնահատող սարքավորումների և ամպրոպի տեղորոշիչի հետ։ Ներկայացվեց դիտարկումների կենտրոնից կանխատեսումների կենտրոն տվյալների փոխանցման, որտեղից էլ ապա օդանավակայանի կարգավարներին հաղորդման գործընթացը։
Օդերևութաբանական կանխատեսումների բաժնի պետ Արմենուհի Հարությունյանը ծանոթացրեց օդանավակայանի 24 ժամյա, ինչպես նաև ՀՀ օդային տարածքում սպասվող/կանխատեսվող վտանգավոր մթնոլորտային երևույթների կանխատեսումներ կազմելու գործընթացը և դրանց միջազգային օդերևութաբանական տվյալների բանկում տարածումը։ Նշեց, որ սպասվող եղանակի մասին տեղեկությունները հաղորդվում են նաև դեպի Երևան թռիչք իրականացնող միջազգային օդանավակայաններին:
«Զվարթնոց» ԱՕԿ-ի տնօրեն Թաթուլ Հայրապետյանը ներկայացրեց ավիաօդերևութաբանական կենտրոնի գործունեությունը և ոլորտում առկա խնդիրները (այդ թվում նաև մասնագետ-կադրերի հետ կապված)՝ նշելով, որ կենտրոնը վերազինվել է վերջին սերնդի ժամանակակից սարքավորումներով: Կարևորվեց ՀՀ Շրջակա միջավայրի «Զվարթնոց» ավիաօդերևութաբանական կենտրոնի ու ֆիզիկական աշխարհագրության և ջրաօդերևութաբանության ամբիոնի միջև համագործակցության խորացումը և շարունակականությունը, ուսումնական և արտադրական պրակտիկաների անցկացումը կենտրոնում, նմանատիպ ճանաչողական այցերի ավելի հաճախակի կազմակերպումը:
